GENESIS 15 - Edisana ñwed Abasi Ibom

Abasi Anam Ediomi ye Abram

¹ KE ŋkpɔ emi ema ekebe, ikɔ Jehovah osim Abram ke ŋkukut, ete, Kufehe ndik, Abram: Ami ndi otu ekɔŋ fo, utip fo awak eti-eti.

² Ndien Abram ɔdɔhɔ, ete, Jehovah Ɔbɔŋ, afo edinɔ mi nso ŋkpɔ, sia ami nsaŋa ntem nnyeneke eyen, ndien adia ufɔk mi edi Eliezer Damascus?

³ Ndien Abram ɔdɔhɔ, ete, Sese, unɔŋɔ mi eyen: ndien sese, edi eyen ufɔk mi edidia akpa mi.

⁴ Ndien, sese, ikɔ Jehovah osim enye, ete, Idige owo emi edidia akpa fo: edi owo emi afo edibonde edidia akpa fo.

⁵ Ndien enye ada enye ɔwɔrɔ ke edem esa, ete, Nam se enyɔŋ ko, nyuŋ bat ntantafiɔŋ, edieke afo ekemede ndibat mmɔ: onyuŋ ɔdɔhɔ enye ete, Ntem ke ubon fo editie.

⁶ Ndien enye ɔbuɔt idem ye Jehovah; ndien enye abat oro ɔnɔ enye ke edinen ido.

⁷ Ndien enye ɔdɔhɔ enye, ete, Ami ndi Jehovah emi ŋkosiode fi ke Ur mme Chaldee, nte nnɔ fi isɔŋ emi ada enye enyene.

⁸ Ndien enye ɔdɔhɔ, ete, Jehovah Ɔbɔŋ, nda nso mfiok nte nyenyene?

⁹ Ndien Enye ete, Sio uman enaŋ isua ita, ye uman ebot isua ita, ye okukim erɔŋ isua ita, ye mbomoŋkuku kiet, ye eyen ibiom kiet nɔ mi.

¹⁰ Ndien enye osio kpukpru mmɔ emi ɔnɔ Enye, onyuŋ asiak mmɔ ukem-ukem, onyuŋ onim ubak kiet ana ukem ye eken, edi isiakke mme inuen.

¹¹ Ndien mme utere esuhɔre etiene okpo oro, edi Abram ebin mmɔ efep.

¹² Ekem ke ini eyo oyomde ndikut, ɔkpɔsɔŋ idap edimun Abram; ndien, sese, akamba ekim ɔduɔ enye ke idem, ndik onyuŋ omum enye.

¹³ Ndien enye ɔdɔhɔ Abram, ete, Tim fiɔk ete ke ubon fo eyedi isen ke isɔŋ kiet eke midige eke mmɔ; eyenyuŋ enam ŋkpɔ enɔ mmɔ; mmɔ eyenyuŋ efik mmɔ ke isua ikie inaŋ:

¹⁴ ndien Ami nyekpe ikpe ye idut oro ŋko, emi mmɔ edinamde ŋkpɔ enɔ mmɔ; ndien ŋkpɔ oro ama ebe, mmɔ eyewɔŋɔ ye ediwak inyene.

¹⁵ Edi afo eyetiene mme usɔ ke emem; eyebuhɔ ke ata usɔn.

¹⁶ Ndien ke ɔyɔhɔ emana inaŋ mmɔ eyenyɔŋ ken: koro mme idiɔkŋkpɔ mme Amorite mika-iyɔhɔke kaŋa.

¹⁷ Ekem eyo okut, onyuŋ okim eti eti ndien sese, usaŋ uyo eke ɔwɔrɔde nsuŋikaŋ ye edeme ikaŋ, eke asaŋade ke ufɔt okpo oro ebe.

¹⁸ Ke usen oro Jehovah odiomi ediomi ye Abram, ete, Ndada isɔŋ emi nnɔ ubon fo, ɔtɔŋɔde ke akpa Egypt, tutu osim akamba akpa, akpa Euphrates:

¹⁹ mme Kenites, ye mme Kenizzite,

²⁰ ye mme Kadmonite, ye mme Hitite, ye mme Perizzite, ye mme Rephaim, ye mme Amorite,

²¹ ye mme Canaanite, ye mme Girgashite, ye mme Jebusite.