GENESIS 14 - Edisana ñwed Abasi Ibom

Emum Lot Ndien Abram Aka Akanyaŋa Enye

¹ EDIKEM, ke usen Amraphel edidem Shinar, Arioch edidem Ellasar, Chedorlaomer edidem Elam, ye eke Tidal edidem mme idut;

² mmɔ eŋwana ekɔŋ ye Bera edidem Sodom, ye Birsha edidem Gomorrah, ye Shinab edidem Admah, ye Shemeber edidem Zeboim, ye edidem Bela,

³ enye edi Zoar. Mme mmɔ emi kpukpru edi ekɔŋ ke itihere Siddim, enye edi Inyaŋ Inuŋ.

⁴ Mmɔ enam ŋkpɔ enɔ Chedorlaomer ke isua duopeba, ndien esɔŋ ibuot ke ɔyɔhɔ isua duopeta.

⁵ Ekem ke ɔyɔhɔ isua duopenaŋ, Chedorlaomer ye ndidem emi esaŋade ye enye, edi edisuan mme Rephaim ke Ashteroth-karnaim, ye mme Zuzim ke Ham, ye mme

⁶ Emim ke Shaveh-kiriathaim, ye mme Horite ke akamba obot mmɔ Seir, osim ke ofriyo Paran, emi

⁷ ekperede wilderness. Ndien mmɔ efiak edi ke En-mishpat, enye edi Kadesh, edisuan ofuri isɔŋ mme Amalekite, ye mme Amorite nde emi etiede ke Hazazon-tamar.

⁸ Ndien edidem Sodom ɔwɔrɔ ye edidem Gomorrah, ye edidem Admah, ye edidem Zeboim, ye edidem Bela, enye edi Zoar, ndien mmɔ edi ediŋwana ekɔŋ ye mmɔ ke itihere Siddim;

⁹ ye Chedorlaomer edidem Elam, ye Tidal edidem mme idut, ye Amraphel edidem Shinar, ye Arioch edidem Ellasar, ndidem inaŋ ye ition oro.

¹⁰ Ndien obube bitumen ewak ke itihere Siddim; ndien ndidem Sodom ye Gomorrah efeŋe itɔk, ekeduɔŋɔ do; ndien mmɔ ekesuhɔde efeŋe eka ikpɔ obot.

¹¹ Ndien mmɔ etaŋ kpukpru inyene Sodom ye Gomorrah, ye udia mmɔ kpukpru, enyɔŋɔ.

¹² Mmɔ enyuŋ eda Lot, eyen eyen eka Abram, emi etiede ke Sodom ye inyene esie enyɔŋɔ.

¹³ Ekem owo kiet emi ɔkɔbɔhɔde, edi editiŋ ɔnɔ Abram eyen Hebrew, ndien enye oduŋ ke ɔtɔwɔk eto Mamre, eyen mme Amorite, eyen eka Eshcol, ye eyen eka Aner; mmɔ oro enyuŋ ediana ye Abram ke ufan.

¹⁴ Ekem, Abram okop ete ke ekemum eyen ete imɔ enyɔŋɔ, ndien enye osio nditɔ ufɔk esie, emi enye ekekpepde mmɔ ekɔŋ, owo ikie ita ye efureta, ekebine tutu osim ke Dan.

¹⁵ Ndien enye ye nditɔ ufɔk esie ebahare idem mmɔ; etiene mmɔ oro ke okoneyo, edisuan mmɔ, enyuŋ ebine mmɔ tutu osim ke Hobah, emi odude ke ubɔk ufien Damascus.

¹⁶ Ndien enye ada kpukpru inyene oro afiak, onyuŋ ada Lot eyen ete esiemɔ, ye inyene esie, afiak, ye iban nde, ye kpukpru owo.

¹⁷ Ekem edidem Sodom ɔwɔrɔ aka ke itihere Shaveh, enye edi itihere edidem, ete isobo ye enye, ke ini enye otode ndisuan Chedorlaomer ye ndidem oro ekedude ye enye, afiak edi.

¹⁸ Ndien Melchizedek edidem Salem osio uyo ye wine edi: enye onyuŋ edi oku Abasi Ibom.

¹⁹ Ndiem enye ɔdiɔŋ enye, ete, Abasi Ibom, andinyene enyɔŋ ye isɔŋ, osuk ɔdiɔŋ Abram:

²⁰ enyuŋ etoro Abasi Ibom, emi adade mme asua fo, esin fi ke ubɔk. Ndien enye osio ubak kpukpru ŋkpɔ kiet kiet ke itie duop ɔnɔ enye.

²¹ Ndien edidem Sodom ɔdɔhɔ Abram, ete, Nɔ mi owo-owo, ndien bɔ inyene ke idem fo.

²² Ndien Abram ɔdɔhɔ edidem Sodom, ete, Mma mmen ubɔk nnɔ Jehovah, Abasi Ibom, andinyene

²³ enyɔŋ ye isɔŋ, nte ke mbɔhɔ baba ndidi ye idem uruk ikpa-ukot ke kpukpru se inyenede fi, mbak afo edidɔhɔ ete, Edi ami mfori Abram:

²⁴ ke mibɔhɔke se mkparawa ekediade, ye udeme mbɔŋ emi esaŋade ye ami, Aner, ye Eshcol, ye Mamre: yak mmɔ ebɔ udeme mmɔ.