GENESIS 11 - Edisana ñwed Abasi Ibom

Ubahare Oduk ke Ofuri Ererimbot Oto ke Tower Babel

¹ NDIEN ofuri ererimbot ekedi usem kiet ye ikɔ kiet.

² Ekem ke mmɔ ema ekedaha ke edem usiaha utin mmɔ edisim ke una isɔŋ kiet ke isɔŋ Shinar; ndien etie do.

³ Ndien mmɔ edɔhɔ kiet ye kiet ete, ekam eyak nnyin ibot brick inyuŋ itim mmɔ. Ndien brick oro eyedi itiat mmɔ, bitumen onyuŋ edi mortar mmɔ,

⁴ Ndien mmɔ edɔhɔ ete, Ekam eyak nnyin ibɔp obio inɔ idem nnyin, ye edikoŋ ufɔk eke ibuot esie edisimde ke enyɔn; inyuŋ inam enyiŋ inɔ idem nnyiŋ, mbak idisuana ke iso ofuri ererimbot.

⁵ Ekem Jehovah osuhɔre ete ise obio oro ye edikoŋ ufɔk oro nditɔ Adam ebɔpde.

⁶ Ndien Jehovah ete, Sese, mbio emi edi kiet, kpukpru mmɔ enyuŋ enyene usem kiet; enyuŋ etɔŋɔ ndinam emi: ndien ke emi idikpanke mmɔ baba ŋkpɔ kiet eke mmɔ edikerede ndinam.

⁷ Ekam eyak nnyin isuhɔre, inyuŋ itimere usem mmɔ do, man kiet okukop ikɔ kiet eken.

⁸ Ndien Jehovah anam mmɔ edaha do esuana ke iso ofuri ererimbot: ke ntre ke mmɔ etre ndibɔp obio oro.

⁹ Mmɔdo enyiŋ esie ekerede Babel; koro Jehovah etimerede usem ofuri ererimbot do: Jehovah onyuŋ anam mmɔ edaha do esuana ke iso ofuri ererimbot.

¹⁰ Mme mmɔ emi edi emana Shem: Shem osim isua ikie, ndien obon Arpachshad, ini ukwɔ ebede isua iba:

¹¹ ndien Shem odu uwem ke ama okobon Arpachshad, isua ikie ition, onyuŋ obon nditɔ-iren ye nditɔ-iban.

¹² Ndien Arpachshad odu isua edip ye efut, ndien obon Shelah:

¹³ ndien Arpachshad odu uwem, ke ama okobon Shelah, isua ikie inaŋ ye ita, onyuŋ obon nditɔ-iren ye nditɔ-iban.

¹⁴ Ndien Shelah odu uwen ke isua edip ye duop, ndien obon

¹⁵ Eber: ndien Shelah odu uwem, ke ama okobon Eber, ke isua ikie inaŋ ye ita, onyuŋ obon nditɔ-iren ye nditɔ-iban.

¹⁶ Eber onyuŋ odu uwem isua edip ye duopenaŋ, ndien obon

¹⁷ Peleg: ndien Eber odu uwem, ke ama okobon Peleg, ke isua ikie inaŋ ye edip ye duop, onyuŋ obon nditɔ-iren ye nditɔ-iban.

¹⁸ Ndien Peleg odu uwem isua edip ye duop, ndien obon Reu:

¹⁹ ndien Peleg odu uwem, ke ama okobon Reu, ke isua ikie iba ye usukkiet, onyuŋ obon nditɔ-iren ye nditɔ-iban.

²⁰ Reu onyuŋ odu uwem isua edip ye duopeba, ndien obon

²¹ Serug: ndien Reu odu uwem, ke ama okobon Serug, ke isua ikie iba ye itiaba, onyuŋ obon nditɔ-iren ye nditɔ-iban.

²² Serug ŋko odu uwem ke isua edip ye duop, ndien obon Nahor:

²³ ndien Serug odu uwem, ke ama okobon Nahor, ke isua ikie iba, onyuŋ obon nditɔ-iren ye nditɔ-iban.

²⁴ Ndien Nahor odu uwem isua edip ye usukkiet, ndien obon

²⁵ Terah: ndien Nahor odu uwem ke ama okobon Terah, ke isua ikie ye efurenaŋ, onyuŋ obon nditɔ-iren ye nditɔ-iban.

²⁶ Ndien Terah odu uwem ke isua ata ye duop, ndien obon Abram ye Nahor ye Haran.

²⁷ Mme mmɔ emi enyuŋ edi emana Terah: Terah obon Abram, ye Nahor, ye Haran; Haran onyuŋ obon Lot.

²⁸ Ndien Haran ebem Terah ete esie iso akpa ke isɔŋ emana esie, ke Ur mme Chaldee.

²⁹ Ekem Abram ye Nahor edɔ iban: enyiŋ aŋwan Abram edi Sarai; enyiŋ aŋwan Hahor ŋko edi Milcah, eyen Harran aŋwan, ete Milcah, ye ete Iscah.

³⁰ Ndien Sarai edi ada; imanke eyen.

³¹ Ndien Terah ada Abram eyen esie, ye Lot eyen Haran, eyen eyen esiemɔ, ye Sarai ukot esie, ŋwan Abram eyen esie; ndien mmɔ etiene mmɔ edaha ke Ur mme Chaldee, ete ika isɔŋ Canaan ndien mmɔ edisim Haran, enyuŋ eduŋ do.

³² Ndien usen Terah edi isua ikie iba ye ition: ndien Terah akpa ke Haran.