GENESIS 1 - Edisana ñwed Abasi Ibom

Mbuk Emi Abaŋade Eritɔŋɔ Ererimbot

¹ KE eritɔŋɔ Abasi okobot enyɔŋ ye isɔŋ.

² Ndien isɔŋ edi ikpikpu, ye ukpɔk; ekim onyuŋ odu ke enyɔŋ inyaŋ. Spirit Abasi onyuŋ ɔkubɔ ke enyɔŋ mmɔŋ.

³ Ekem Abasi ɔdɔhɔ ete, Yak uŋwana odu: ndien uŋwana odu.

⁴ Ndien Abasi okut uŋwana, ete ɔfɔn:

⁵ Abasi onyuŋ adianare uŋwana ye ekim. Ndien Abasi okot uŋwana ete, Uwemeyo, onyuŋ okot ekim ete, Okoneyo. Ndien mbubreyo ye usenubɔk edi akpa usen.

⁶ Ndien Abasi ɔdɔhɔ ete, Yak ikpa-enyɔŋ odu ke ufɔt mmɔŋ, yak onyuŋ adiaŋare mmɔŋ ye mmɔŋ.

⁷ Ndien Abasi anam ikpa-enyɔŋ, onyuŋ adianare mmɔŋ emi odude ke idak ikpa-enyɔŋ ye mmɔŋ emi odorode ke ikpa-enyɔŋ: ndien edi ntre. Ndien Abasi okot ikpa enyɔŋ. Ete, Heaven.

⁸ Ndien mbubreyo ye usenubok edi udiana akpa usen.

⁹ Ndien Abasi ete, Yak mmɔŋ ke idak enyɔŋ oboho ke ebiet kiet, yak edisat isɔŋ onyuŋ ɔwɔrɔ: ndien edi ntre.

¹⁰ Ndien Abasi okot edisat isɔŋ ete, Obot; onyun okot mmɔŋ emi obohode, ete Inyaŋ: ndien Abasi okut ete efɔn.

¹¹ Ndien Abasi ete, Yak isɔŋ otibe mbiet, ikɔŋ eke asiahade mkpasip, eto mfri eke oŋwumde mfri ke oruk esiemɔ, eke mkpasip esiemɔ odude enye ke esit, ke isɔŋ: ndien edi ntre.

¹² Ndien isɔŋ otibe mbiet, ikɔŋ eke asiahade mkpasip ke oruk esiemɔ, ye eto eke oŋwumde mfri, eke mkpasip esiemɔ odude enye ke esit, ke oruk esiemɔ: ndien Abasi okut ete efɔn.

¹³ Ndien mbubreyo ye usenubɔk edi ɔyɔhɔ usen ita.

¹⁴ Ndien Abasi ɔdɔhɔ ete, Yak mme uŋwana edu ke ikpa-enyɔŋ heaven man edianare uwemeyo ye okoneyo; yak enyuŋ edi nte mme idiɔŋɔ, ye nte ini, ye nte usen, ye nte isua.

¹⁵ Yak mmɔ enyuŋ edi nte mme uŋwana ke ikpa-enyɔŋ, ndiyama nnɔ isɔŋ: ndien edi ntre.

¹⁶ Ndien Abasi anam ikpɔ mme uŋwana mbiba oro; akamba uŋwana ete akara uwemeyo, ye ekpri uŋwana ete akara okoneyo: ye mme ntantafiɔŋ.

¹⁷ Abasi onyuŋ esin mmɔ ke ikpa-enyɔŋ heaven, ete eyama enɔ isɔŋ,

¹⁸ enyuŋ ekara uwemeyo ye okoneyo, enyuŋ edianare uŋwana ye ekim: ndien Abasi okut ete efɔn.

¹⁹ Ndien mbubreyo ye usenubɔk edi ɔyɔhɔ usen inaŋ.

²⁰ Ndien Abasi ɔdɔhɔ, ete, Yak mmɔŋ ɔyɔhɔ udim-udim unam eke edude uwem, yak inuen enyuŋ efefe ekpɔŋ isɔŋ ke iso ikpa-enyɔŋ.

²¹ Ndien Abasi obot ikpɔ unam mmɔŋ, ye kpukpru unam eke edude uwem eke esaŋade, eke eyɔhɔde ke mmɔŋ, ke oruk mmɔ, ye kpukpru inuen mba ke oruk mmɔ: ndien Abasi okut ete efɔn.

²² Ndien Abasi ɔdiɔŋ mmɔ, ete, Mbufo etɔt, enyuŋ ewak, enyun eyɔhɔ ke mmɔŋ ke akamba inyaŋ; yak inuen enyuŋ ewak ke isɔŋ.

²³ Ndien mbubreyo ye usenubɔk edi ɔyɔhɔ usen ition.

²⁴ Ndien Abasi ete, Yak isɔŋ osioŋo unam eke edude uwem ke oruk mmɔ, ufene, ye andinyɔni, ye unam obot ke oruk mmɔ: ndien edi ntre.

²⁵ Ndien Abasi anam unam obot ke oruk mmɔ, ye ufene ke oruk mmɔ, ye kpukpru andinyɔni ke isɔŋ ke oruk mmɔ; ndien Abasi okut ete efɔn.

²⁶ Ekem Abasi ɔdɔhɔ, ete, eyak nnyin inam owo isin ke mbiet nnyin, etie nte nnyin: yak mmɔ enyuŋ ekara iyak ke akamba mmɔŋ, ye inuen ke enyɔŋ, ye ufene, ye ofuri isɔŋ, ye kpukpru mme andinyɔni eke enyɔnide ke isɔŋ.

²⁷ Ntem ke Abasi obot owo esin ke mbiet esiemɔ, ke mbiet Abasi ke obot enye; eren ye ŋwan ke obot mmɔ.

²⁸ Ndien Abasi ɔdiɔŋ mmɔ, Abasi onyuŋ ɔdɔhɔ mmɔ ete, Mbufo etɔt, enyuŋ ewak, enyuŋ eyɔhɔ ke isɔŋ, enyuŋ ekan enye: enyuŋ ekara iyak ke akamba mmɔŋ, ye inuen ke enyɔŋ, ye kpukpru nkpɔ uwem eke enyɔnide ke isɔŋ.

²⁹ Ndien Abasi ɔdɔhɔ ete, Sese mmɔnɔ mbufo kpukpru ikɔŋ eke esiahade mkpasip, emi edude ke iso ofuri isɔŋ ye kpukpru eto, eke mfri eto esiahade mkpasip odude mmɔ ke esit; eyedi udia mbufo.

³⁰ Mmonyuŋ nda kpukpru awawa ikɔŋ nnɔ kpukpru unam obot, ye kpukpru inuen enyɔŋ, ye kpukpru se inyɔnide ke isɔŋ, eke uwem odude mmɔ ke esit, ke udia: ndien edi ntre.

³¹ Ndien Abasi okut kpukpru se enye akanamde, ndien, sese efɔn eti eti. Ndien mbubreyo ye usenubɔk edi ɔyɔhɔ usen itiokiet.