EZRA 9 - Edisana ñwed Abasi Ibom

Akam Ezra ye Ndɔ Emi Nditɔ Israel Ekedɔde Esen-idut

¹ EKEM ke mme ŋkpɔ emi ema ekebe, mbɔŋ edi ke etɔ mi, ete, Nditɔ Israel, ye mme oku, ye mme Levite, idianakede idem mmɔ ifep ke mbon idut, edi enim mbubiam ido mmɔ, kpa eke mme Canaanite, ye eke mme Hittite, ye mme Perizzite, ye mme Jebusite, ye mme Ammonite, ye mme Moabite, ye mme Egyptian, ye mme Amorite.

² Koro mmɔ edade nditɔ-iban mmɔ enɔ idem mmɔ ye nditɔ-iren mmɔ edɔ: ema enyuŋ ebuak edisana mbon ye mbon mme idut: ndien ubɔk mbɔŋ ye eke mme ebierikpe edi etubom ke idiɔk ido emi.

³ Ndien ke ini ŋkopde ikɔ emi, ŋwai edisine-ŋkpɔ mi, ye ekura mi nnyuŋ ndibere idet ibuot mi, ye eke ntaŋebek mi, ndien nsuhɔre ntie ke mkpa-idem.

⁴ Ndien kpukpru owo eke enyekde idem ebaŋa ikɔ Abasi Israel, ebaŋa idiɔk ido mbon ntaŋ-mfep, esop idem ke ɔtɔ mi; ndien ami ntie do ke mkpa-idem tutu osim ke ini uwa mbubreyo.

⁵ Ekem ke ini uwa mbubreyo, ndaha ke itie mfuhɔ mi; ndien adaŋa emi ŋwaide edisine-ŋkpɔ mi ye ekura mi, ami ntɔŋɔ edɔŋ, nnyuŋ mmenere ubɔk nse Jehovah Abasi mi, nnyuŋ ndɔhɔ nte,

⁶ O Abasi mi, but anam mi ke iso eti-eti ndimenere iso mi nse fi, O Abasi mi: koro mme ukwaŋ-ŋkpɔ nnyin ekoŋde ekan ibuot nnyin, isop nnyin onyuŋ okpon tutu osim ke ikpa-enyɔŋ.

⁷ Nnyin imakama akamba isop toto ke eyo mme ete nnyin, tutu osim mfin emi ndien mme ukwaŋ-ŋkpɔ nnyin esin ekeda nnyin, ye ndidem nnyin, ye mme oku nnyin esin ndidem mme idut ke ubɔk, enɔ ofut, ye ntaŋ-mfep, ye mbume, ye iso but, kpa nte edide mfin emi.

⁸ Ndien ke emi Jehovah Abasi nnyin ɔfɔn ini esisit, ke erisuhɔ usuk nnyin emi ibɔhɔde, nnyuŋ nnɔ nnyin ntok ke edisana ebiet esie, man Abasi nnyin aŋwaŋa nnyin enyin, onyuŋ edemere nnyin ke itie ufin nnyin.

⁹ Koro nnyin idide ifin; edi Abasi nnyin ikɔkpɔŋke nnyin ke itie ufin nnyin, edi ama anyan ubɔk ɔnɔ nnyin ke iso ndidem Persia, onyuŋ edemere nnyin, man ineŋere ufɔk Abasi nnyin, inyuŋ idiɔŋ ŋwure esie, man enye onyuŋ ɔnɔ nnyin ibibene ke Judah, ye ke Jerusalem.

¹⁰ Ndien ke emi, O Abasi nnyin, nnyin ididɔhɔ didie ke ŋkpɔ emi ama ebe? koro nnyin ima ikpɔŋ mme ewuhɔ fo:

¹¹ emi afo akadade ubɔk ikɔt fo mme prophet owuk, ete, Isɔŋ emi mbufo ekade ndida enye nnyene edi isɔŋ ndek, abaŋa ndek mbio mme idut, abaŋa mbubiam mmɔ emi mmɔ ekedade eyɔhɔ ke esit, ɔtɔŋɔde ke mben emi tutu osim ke mben oko, koro mmɔ edehede:

¹² mbufo ekuda ndien nditɔ-iban mbufo enɔ nditɔ-iren mmɔ, ekunyuŋ eda nditɔ-iban mmɔ esɔk nditɔ-iren mbufo, ekunyuŋ eyom emem ye mfɔn enɔ mmɔ tutu amama: man mbufo esɔŋ, enyuŋ edia mfɔn isɔŋ oro, enyuŋ eda enye enɔ nditɔ mbufo enyene ke nsinsi.

¹³ Ndien emi kpukpru ŋkpɔ emi ema enam nnyin, ebaŋa mme idiɔk ido nnyin, ye akwa isop nnyin: koro afo, O Abasi nnyin, ama osuk ubɔk akan mme ukwaŋ-ŋkpɔ nnyin, ama onyuŋ ɔnɔ nnyin oruk ubɔhɔ emi;

¹⁴ nte nnyin iditɔŋɔ ntak ibiat mbet fo, inyuŋ ikoro ukot ye mbio mbubiam emi? Nte afo uduyatke esit ye nnyin, tutu osobo nnyin ama, tutu baba owo kiet eke ɔbɔhɔde isuhɔke?

¹⁵ O Jehovah Abasi Israel, afo emenen: koro nnyin emi ibɔhɔde imesuhɔ, nte edide mfin emi: sese, nnyin imedu ke iso fo ke isop nnyin: koro ŋkpɔ emi miyakke baba owo kiet ekeme ndida fi ke iso.