EZRA 8 - Edisana ñwed Abasi Ibom

Mme Ibuot Ekpuk Emi Ekenyɔŋde ke Ntaŋ Mfep Edi

¹ NDIEN mme mmɔ emi edi mme etubom mme ete, ye ŋwed emana mmɔ emi eketode ke Babylon etiene mi edɔk, ke eyo ɔbɔŋ Artaxerxes edidem.

² Ke nditɔ Phinehas; Gershom: ke nditɔ Ithamar; Daniel: ke nditɔ David; Hattush.

³ Ke nditɔ Shecaniah, ke nditɔ Parosh; Zechariah: ndien mmɔ ewet irenowo ikie ye aba ye duop, edian enye ke ŋwed emana.

⁴ Ke nditɔ Pahath-moab; Eliehoenai eyen Zerahiah, ye irenowo ikie iba ŋko.

⁵ Ke nditɔ Shecaniah; eyen Jahaziel, ye irenowo ikie ita ŋko.

⁶ Ye ke nditɔ Adin; Ebed eyen Jonathan, ye irenowo aba ye duop ŋko.

⁷ Ye ke nditɔ Elam, Jeshaiah eyen Athaliah, ye irenowo ata ye duop ŋko.

⁸ Ye ke nditɔ Shephatiah; Zebadiah eyen Michael, ye irenowo anaŋ ŋko.

⁹ Ye ke nditɔ Joab; Obadiah eyen Jehiel, ye irenowo ikie iba ye ata ŋko.

¹⁰ Ye ke nditɔ Shelomith; eyen Josiphiah, ye irenowo ikie ye ata ŋko.

¹¹ Ye ke nditɔ Bebai; Zechariah eyen Bebai, ye irenowo edip ye itiaita ŋko.

¹² Ye ke nditɔ Azgad; Johanan eyen Hakkatan, ye irenowo ikie ye duop ŋko.

¹³ Ndien ke ekperedem nditɔ Adonikam, emi enyiŋ mmɔ ekerede ntem, Eliphelet, ye Jeuel, ye Shemaiah, ye irenowo ata ŋko.

¹⁴ Nditɔ Bigvai; Uthai, ye Zabbud, ye irenowo ata ye duop ŋko.

¹⁵ Ekem nsop mmɔ ɔtɔ kiet ke mben akpa emi osukde aka Ahava; ndien nnyin itie do ke tent ke usen ita: ami nnyuŋ nse kpukpru owo, ye mme oku, edi ŋkwe baba eyen Levi kiet do.

¹⁶ Ndien ndɔŋ ekekot Eliezer, ye Ariel, ye Shemaiah, ye Elnathan, ye Jarib, ye Elnathan, ye Nathan, ye Zechariah, ye Meshullam, ikpɔ owo; ye Joiarib ŋko, ye Elnathan, mbon eti ibuot.

¹⁷ Ndien ntobo mmɔ etop ke ɔtɔ Iddo etubom, ke ebiet Casiphia, nnyuŋ nsin mmɔ ikɔ ke inua, eke editiŋde enɔ Iddo, ye nditɔ-ete esie mme Nethinim, ke ebiet Casiphia, man mmɔ eda mme anam-ŋkpɔ ufɔk Abasi nnyin edisɔk nnyin.

¹⁸ Ndien oto eti ubɔk Abasi nnyin emi odude ye nnyin, mmɔ eda ɔniɔŋ owo kiet ke otu nditɔ Mahli, eyen Levi, eyen Israel, edi; ye Sherebiah, ye nditɔ esie, ye nditɔ-ete esie, owo efureta;

¹⁹ ye Hashabiah, ye Jeshaiah ŋko emi otode ke nditɔ Merari, ye nditɔ-ete esie ye nditɔ mmɔ, owo edip:

²⁰ ye ndusuk mme Nethinim oro David ye ikpɔ owo ekenimde, ete enam utom enɔ mme Levite, Nethinim ikie iba ye edip: ekewet mmɔ kpukpru enyiŋ ke enyiŋ.

²¹ Ndien ŋkwɔrɔ utre-udia do ke mben akpa Ahava, man nnyin ituk idem nnyin ke iso Abasi nnyin, inyuŋ ibeŋe enye edinen usuŋ inɔ idem nnyin, ye nditɔ-wɔŋ nnyin, ye kpukpru inyene nnyin.

²² Koro but akanamde mi ndika ŋkebeŋe edidem mbon-ekɔŋ ye mbio horse eke edinyaŋade nnyin, mbak mme asua ke usuŋ: koro nnyin ikɔdɔhɔde edidem, ite, Ubɔk Abasi nnyin ada ke ufɔn ɔnɔ kpukpru mme andiyom enye; edi odudu esie ye iyaresit esie eŋwana ye kpukpru mme andikpɔŋ enye.

²³ Ntem ke nnyin iketre udia, inyuŋ ikpe Abasi nnyin ubɔk ibaŋa ŋkpɔ emi; ndien enye okop ɔnɔ nnyin.

²⁴ Ndien ndianare owo duopeba ke mbɔŋ oku, Sherebiah, ye Hashabiah, ye nditɔ-ete mmɔ duop ŋko.

²⁵ Ndien ndomo silver, ye gold, ye mkpoduoho nnɔ mmɔ, kpa enɔ ufɔk Abasi nnyin oro edidem, ye mme ɔnɔ-item esie, ye mbɔŋ esie, ye ofuri Israel eke edude do, ekenɔde:

²⁶ ntre ke ndomo silver ke talent ikie itiokiet ye aba ye duop, nsin mmɔ ke ubɔk, ye mkpoduoho silver ke talent ikie, ye eke gold talent ikie:

²⁷ ye ikpɔ bowl o-gold edip emi ekemde tɔsin dram; ye edisem ŋkpɔ okpoho iba emi esɔŋde urua nte gold.

²⁸ Ndien ndɔhɔ mmɔ, nte, Mbufo edi edisana ikɔt Jehovah; mkpoduoho emi enyuŋ edi edisana: silver ye gold enyuŋ edi se enɔde Jehovah Abasi mme ete mbufo ke ima esit.

²⁹ Mbufo ekpeme, ndien enyuŋ enim mmɔ, tutu mbufo edomo mmɔ ke iso mbɔŋ mme oku, ye eke mme Levite, ye mbɔŋ mme ete Israel, ke Jerusalem, ke ubet ufɔk Jehovah.

³⁰ Ndien mme oku ye mme Levite eda udop silver, ye eke gold, ye eke mkpoduoho, man eda mmɔ edi ke Jerusalem ke ufɔk Abasi nnyin.

³¹ Ekem nnyin idaŋa ke akpa Ahava ke ɔyɔhɔ usen duopeba, ke akpa ɔfiɔŋ, ite ika ke Jerusalem: ndien ubɔk Abasi nnyin ada ye nnyin, onyuŋ anyaŋa nnyin osio ke ubɔk mme asua, ye eke mmɔ eke enade ke usuŋ ebet.

³² Ekem nnyin isim Jerusalem, inyuŋ itie do ke usen ita.

³³ Ndien ke ɔyɔhɔ usen inaŋ mmɔ edomo silver, ye gold, ye mkpoduoho oro ke ufɔk Abasi nnyin, esin ke ubɔk Meremoth eyen Uriah oku; Eleazar eyen Phinehas onyuŋ ada ye enye; Jozabad eyen Jeshua, ye Noadiah eyen Binnui, Levite, enyuŋ edu ye mmɔ;

³⁴ nte ibat ye udop kpukpru ŋkpɔ esaŋade: ndien mmɔ ewet ofuri udop ke ini oro.

³⁵ Ndien mmɔ eke etode ke itie ntaŋ-mfep edi, kpa nditɔ mbon ntaŋ-mfep, eda edifɔp uwa esɔk Abasi Israel, enaŋ duopeba, ebaŋa ofuri Israel, ye okukim erɔŋ anaŋ ye efurekiet, ye nditɔ-erɔŋ ata ye efureba, ye okpo ebot duopeba ke uwa idiɔk ido: kpukpru mmɔ emi edi edifɔp uwa Jehovah.

³⁶ Mmɔ enyuŋ eda ewuhɔ edidem enɔ mme satrap edidem, ye mme andikara ke edem akpa oko: ndien mmɔ eŋwam mbon oro ye ufɔk Abasi.