EZRA 3 - Edisana ñwed Abasi Ibom

Nditɔ Israel Etɔŋɔ Ntak Etɔŋɔ Ntuak Ibuot ke Jerusalem

¹ EKEM adaŋemi ekemde ke ɔyɔhɔ ɔfiɔŋ itiaba, nditɔ Israel enyuŋ edude ke mme obio mmɔ, kpukpru owo esop idem ke Jerusalem, nte owo kiet.

² Ndien Jeshua eyen Jozadak ye nditɔ-ete esie mme oku edaha ke enyɔŋ, ye Zerubbabel eyen Shealtiel, ye nditɔ-ete esie, ebɔp itie-uwa Abasi Israel man ewa edifɔp uwa ke esit, kpa nte ewetde ke ŋwed ewuhɔ Moses owo Abasi.

³ Ndien mmɔ ediɔk itie-uwa ke ɔtɔ esie: koro ndik mbio mme idut oro anamde mmɔ: ndien mmɔ ewa edifɔp uwa ke esit enɔ Jehovah, kpa edifɔp uwa usenubɔk ye eke mbubreyo.

⁴ Mmɔ enyuŋ enim usɔrɔ mme ataya, kpa nte ekewetde, enyuŋ ewa, edifɔp uwa kpukpru usen ke ibat, nte ekam esinamde, nte ekemde kpukpru usen;

⁵ ndien ke ini oro ama ekebe, mmɔ ewa edifɔp uwa kpukpru usen, ye eke mbufa ɔfiɔŋ, ye eke kpukpru mme usɔrɔ Jehovah oro ekenimde ke edisana, ye se kpukpru owo ewade enɔ Jehovah ke ima esit.

⁶ Toto ke akpa usen ɔyɔhɔ ɔfiɔŋ itiaba mmɔ etɔŋɔ ndiwa edifɔp uwa nnɔ Jehovah. Edi ika-itɔŋɔke ndibɔp temple Jehovah.

⁷ Ndien mmɔ eda silver enɔ mme ɔsɔi-itiat ye mme ekpeŋe-eto; enyuŋ enɔ mbio Zidon ye eke Tyre udia, ye wine, ye aran, ete eda eto cedar ke Lebanon enam efiɔrɔ ke inyaŋ edi ke Joppa, kpa nte Cyrus edidem Persia okonyimede ɔnɔ mmɔ.

⁸ Ekem ke udiana-akpa isua nte mmɔ ekedi ke ufɔk Abasi ke Jerusalem, ke udiana-akpa ɔfiɔŋ, Zerubbabel eyen Shealtiel, ye Jeshua eyen Jozadak, ye nditɔ-ete mmɔ mme oku, ye mme Levite eke esuhɔde, ye kpukpru mbon ntaŋ-mfep oro eketode edi ke Jerusalem, etɔŋɔ; ndien mmɔ eda mme Levite, ɔtɔŋɔde ke owo isua edip, ye mmɔ eke ebede oro, edori mmɔ, ete edi mme etubom utom ufɔk Jehovah.

⁹ Ndien Jeshua ada ye nditɔ esie, ye nditɔ-ete esie, ye Kadmiel ye nditɔ esie, nditɔ Judah, ɔtɔ kiet, ndien mmɔ edi mme etubom mme anam-utom ke ufɔk Abasi: (kpasuk ntre) nditɔ Henadad, ye nditɔ mmɔ, ye nditɔ-ete mmɔ mme Levite.

¹⁰ Ndien adaŋemi mme andibɔp etɔŋɔde ndibɔp mme temple Jehovah, mmɔ enim mme oku, esine edisine-ŋkpɔ mmɔ, ekama ukorowo, enyuŋ enim mme Levite, nditɔ Asaph, ekama cymbal, ete etoro Jehovah, nte David edidem Israel eketemede.

¹¹ Ndien mmɔ ekwɔ, ke etoro, enyuŋ ekɔm Jehovah, koro enye ɔfɔnde, koro ima esie (emi enye amade) Israel odude ke nsinsi. Ndien kpukpru owo efiori akamba mfiori, ke etoro Jehovah, koro etɔŋɔde ndibɔp ufɔk Jehovah.

¹² Ndien ediwak oku ye Levite ye mme etubom mme ete, mbiowo, emi ekekutde akpa ufɔk, ke ini etɔŋɔde ndibɔp ufɔk emi ke iso mmɔ, etua eyet ke ɔkpɔsɔŋ uyo; ndien ediwak owo emenere uyo esio mkpo idara:

¹³ ndien uyom mme anditua eyet iyakke mmɔ ediɔŋɔ uyo mkpo idara: koro kpukpru owo efioride akwa mfiori, ndien ekop uyom anyan ebiet.