EXODUS 5 - Edisana ñwed Abasi Ibom

Moses ye Aaron Eka ke iso Pharaoh

¹ EKEM Moses ye Aaron edi edidɔhɔ Pharaoh, ete, Ntem ke Jehovah Abasi Israel ɔdɔhɔ, ete, Yak ikɔt mi eka, man mmɔ ekenam usɔrɔ enɔ mi ke wilderness.

² Ndien Pharaoh ɔdɔhɔ ete, Jehovah edi anie, eke ŋkopde uyo esie, nnyuŋ nyak Israel eka?

³ Mfiɔkke Jehovah, ndinyuŋ nyakke Israel eka. Ndien mmɔ edɔhɔ ete, Abasi mme Hebrew okosobo ye nnyin: mbɔk, yak nnyin ida isaŋ usen ita ika ke wilderness, ikawa uwa inɔ Jehovah Abasi nnyin, mbak enye edida idiɔk udɔŋɔ, mme ofut etiene nnyin.

⁴ Ndien edidem Egypt, ɔdɔhɔ mmɔ ete, Nsinam mbufo Moses ye Aaron esinde mbon emi ekpɔŋ utom mmɔ? mbufo eka mbiomo mbufo.

⁵ Ndien Pharaoh ɔdɔhɔ, ete, Sese, mbon iŋwaŋ emi ke ewewak ke emi, ndien mbufo etre mmɔ mbiomo mmɔ.

⁶ Ndien kpa usen oro Pharaoh owuk mme otuk mbio oro, ye mme etubom mmɔ, ete,

⁷ Mbufo ekunɔ aba mbio oro nnyanyaŋa eke edade enam brick, nte akpa; eyak mmɔ eka ekeda nnyanyaŋa ke idem mmɔ

⁸ Ndien ama edi ibat brick emi mmɔ ekam esinamde akpa, mbufo enim suk oro enɔ mmɔ; ekusio baba kiet: koro mmɔ efu ifu: oro esin mmɔ efiori ete, Yak nnyin ika ikawa uwa inɔ Abasi nnyin.

⁹ Yak utom oro odobi mmɔ, man mmɔ enam ke esit; ekunyuŋ ekop ikɔ abiaŋa.

¹⁰ Ndien mme otuk mbon oro, ye mme etubom mmɔ ewɔŋɔ eka ekedɔhɔ kpukpru owo, ete, Ntem ke Pharaoh ɔdɔhɔ, ete, Ndinɔŋɔ aba mbufo nnyanyaŋa.

¹¹ Mbufo eka ekeda nnyanyaŋa ke idem mbufo ke ebiet eke mbufo edikutde: edi idisioho baba esisit ke se mbufo enamde.

¹² Ndien kpukpru owo esuana ke ofuri isɔŋ Egypt, etetaŋ mbio ibokpot ke ibuot nnyanyaŋa.

¹³ Ndien mme otuk mmɔ ekɔbɔ mmɔ, ete, Mbufo enam utom mbufo ema, kpa utom usen ke usen esie, kpa nte emi nnyanyaŋa okodude.

¹⁴ Ndien ɔbɔŋ ndidaha nditɔ Israel, emi ikɔt Pharaoh emi etukde mmɔ ekedoride ete ese mmɔ eken, ete, enam didie mbufo mikamaha utom mbufo, mkpɔŋ, ye mfin, ke erinam brick nte akpa?

¹⁵ Ndien ndidaha nditɔ Israel, edi ndiseme nnɔ enɔ Pharaoh, ete, Nsinam afo anamde ntem ye nnyin ifin fo?

¹⁶ Ke inɔŋɔ nnyin ifin fo nnyanyaŋa, ndien mmɔ edɔhɔ nnyin, ete, Mbufo enam brick: ndien, sese, ke ebebɔŋ nnyin ifin fo; edi ikɔ enyene ikɔt fo.

¹⁷ Ndien enye ɔdɔhɔ ete, mbufo edi ifu, ifu, ifu: oro esin mbufo edɔhɔ ete, Yak nnyin ika ikawa uwa inɔ Jehovah.

¹⁸ Mbufo eka ndien, ekenam utom: koro midinɔŋɔ mbufo nnyanyaŋa, edi mbufo enɔ suk ibat brick.

¹⁹ Ndien ndidaha nditɔ Israel ekut ete ke mmimɔ itie ke idiɔk itie, koro edɔhɔde ete, Mbufo ekusio baba kiet ke ibat brick mbufo eke kpukpru usen.

²⁰ Ndien mmɔ edisobo ye Moses ye Aaron emi edade ebet mmɔ ke ini mmɔ etode ke ebiet Pharaoh:

²¹ enyuŋ edɔhɔ mmɔ ete, Jehovah osuk ese mbufo, onyuŋ ekpe ikpe: koro mbufo enamde nnyin itebe ke iso Pharaoh, ye ke iso ikɔt esie, enyuŋ esinde mmɔ ofut ke ubɔk ete ewot nnyin.

²² Ndien Moses afiak etiene Jehovah, ete, Ɔbɔŋ, nsinam afo ɔdiɔkde ye mbon emi?

²³ Nsinam afo ɔdɔŋde mi utom? Koro toto nte ŋkaka ke ɔtɔ Pharaoh, nnyuŋ ndɔhɔ ke enyiŋ fo, enye ɔdɔdiɔk ye mbio emi; afo unyuŋ unyaŋake ikɔt fo baba.