EXODUS 35 - Edisana ñwed Abasi Ibom

Abasi Ɔnɔ Mme Ewuhɔ Kabaŋa Usen Sabbath

¹ EKEM Moses osop kpukpru nditɔ Israel ɔtɔ kiet, ndien ɔdɔhɔ mmɔ ete, Mme ikɔ emi ke Jehovah okowuk, ete mbufo enam.

² Yak enam utom ke ofuri usen itiokiet, edi mbufo enim ɔyɔhɔ usen itiaba ke edisana sabbath nduɔk-odudu Jehovah: kpukpru owo eke enamde utom ke esit, enyene ndikpa mkpa.

³ Mbufo ekubara ikaŋ ke baba ebiet iduŋ mbufo kiet ke usen sabbath.

⁴ Ndien Moses ɔdɔhɔ ofuri esop nditɔ Israel, ete, Ŋkpɔ emi ke Jehovah okowuk,

⁵ ete, Mbufo eda enɔ mbufo esɔk Jehovah: yak kpukpru owo eke esit mmɔ enyimede, eda enye edi nte enɔ Jehovah; gold, ye silver, ye okpoho,

⁶ ye awawa, ye purple, ye ididuot,

⁷ ye eti linen, ye idet, ebot, ye ikpa okukim eke etemde oyibe, ye ikpa badger,

⁸ ye eto shittim, ye aran ke eke unwana, ye ufuɔŋ-ŋkpɔ ke eke aran-nyere, ye eke incense eti utebe, ye itiat onyx,

⁹ ye itiat eke esinde ke ephod, ye ke mbana-ikpanesit.

¹⁰ Ndien yak kpukpru mbon ifiɔk ke otu mbufo edi, enam kpukpru se Jehovah okowukde; ebiet-iduŋ,

¹¹ ye tent esie, ye ufuhɔ-ŋkpɔ esie, ye ŋkɔp esie, ye mme obukpɔk esie, ye mme bar esie, ye mme obubɔk esie, ye mme socket esie;

¹² ekebe, ye esaŋ esie, ye itie usio-isop, ye ukara eke okuide;

¹³ ye okpokoro, ye esaŋ esie, ye kpukpru ŋkpɔ esie,

¹⁴ ye uyo iso; ye uwuk utuen-ikaŋ eke asakde, ye ŋkpɔ esie, ye mme utuen-ikaŋ esie, ye aran ke eke uŋwana, ye itie-ufɔp incense,

¹⁵ ye esaŋ esie, ye aran-nyere, ye edifuɔŋ incense, ye ikpehe enyin-usuŋ, ke eke enyin-usuŋ ebiet-iduŋ;

¹⁶ ye itie-ufɔp uwa, ye grating okpoho esie, ye mme esaŋ esie, ye kpukpru ŋkpɔ esie, ye akpaŋkpaŋ,

¹⁷ ye ukot esie; ye ikpehe okure, ye mme obubɔk esie, ye mme socket esie, ye ikpehe enyin-usuŋ okure;

¹⁸ ye mme ɔkpɔhɔ ebiet-iduŋ, ye mme ɔkpɔhɔ okure,

¹⁹ ye uruk mmɔ; ye edisine-ŋkpɔ utom, eke edade enam utom ke edisana ubet; edisana edisine-ŋkpɔ Aaron oku, ye edisine-ŋkpɔ nditɔ esie, ke eke itie oku.

²⁰ Ndien ofuri esop nditɔ Israel edaŋa ke iso Moses, ewɔŋɔ

²¹ Ndien kpukpru owo eke esit mmɔ edemerede mmɔ, ye kpukpru owo eke spirit mmɔ anamde mmɔ enyime, edi, eda enɔ Jehovah edisɔk ke erinam tent esop, ye ke ofuri utom esie, ye ke edisana edisine-ŋkpɔ.

²² Ntem ke mmɔ edi, iren ye iban, kpukpru owo eke esit mmɔ enyimede, eda mkpanuen ibuo, ye mkpanuen utɔŋ, ye mkpanuen, ye mbana itɔŋ, kpukpru edi ŋkpɔ gold; ndien kpukpru owo eke enɔde enɔ, eda gold enɔ Jehovah.

²³ Ndien kpukpru owo eke ekutde enye awawa ke ubɔk, ye purple, ye ididuot, ye eti linen, ye idet ebot, ye ikpa okukim eke etemde oyibe, ye ikpa badger, eda mmɔ edi.

²⁴ Kpukpru owo eke enɔde enɔ silver ye okpoho, eda enɔ Jehovah edi: ndien kpukpru owo eke ekutde enye eto shittim ke ubɔk, eke edade enam kpukpru oruk utom, eda edi.

²⁵ Ndien ŋko kpukpru iban eti ibuot efiak ndidi ke ubɔk mmɔ, enyuŋ eda se efiakde edi, awawa, ye purple, ye ididuot, ye eti linen.

²⁶ Ndien kpukpru iban eke esit edemerede mmɔ ke eti ibuot, efiak idet ebot.

²⁷ Mbɔŋ enyuŋ eda itiat onyx edi, ye itiat eke esinde ke ephod, ye ke mbana-ikpanesit;

²⁸ ye ufuɔŋ-ŋkpɔ, ye aran ke eke uŋwana, ye ke eke aran-nyere, ye ke eke incense eti utebe.

²⁹ Kpukpru iren ye iban eke esit mmɔ enyimede ndida ŋkpɔ nsɔk, ke kpukpru utom emi Jehovah okowukde ke ubɔk Moses ete enam: kpa nditɔ Israel eda ŋkpɔ ima esit esɔk Jehovah.

³⁰ Ndien Moses ɔdɔhɔ nditɔ Israel ete, Mbufo ekut nte Jehovah amasiak enyiŋ Bezalel, eyen Uri, eyen Hur,

³¹ ke esien Judah: omonyuŋ esin enye spirit Abasi ke esit ɔyɔhɔ, ke eti ibuot, ye ke ɔniɔŋ, ye ke ifiɔk, ye kpukpru oruk ubɔk usɔ:

³² ye nditibi ŋkari usɔ, ndinam utom ke gold, ye silver, ye okpoho,

³³ ye ke erisɔi itiat, man esin mmɔ, ye ke erikap eto, ke erinam kpukpru oruk ŋkari usɔ.

³⁴ Omonyuŋ esin enye ye Oholiab, eyen Ahisamach, owo esien Dan,

³⁵ ke esit, nditeme (owo efen). Enye emesin mmɔ mbufiɔk ke esit ɔyɔhɔ, man enam kpukpru oruk utom, eke odom-utim, ye eke owo usɔ, ye eke atuak awawa, ye purple, ye ididuot, ye eti linen, ye eke ɔdɔk-ɔfɔŋ, ye eke mmɔ eke enamde kpukpru ubɔk-utom, ye eke mmɔ eke etibide ŋkari usɔ.