EXODUS 33 - Edisana ñwed Abasi Ibom

Abasi Ɔdɔhɔ Nditɔ Israel Ete Mmɔ Ekpɔŋ Obot Sinai

¹ EKEM Jehovah ɔdɔhɔ Moses, ete, Afo ye mbio emi afo akadade ke isɔŋ Egypt ɔwɔrɔ, daha ke ɔtɔ emi, dɔk ke isɔŋ oro ŋkɔŋwɔŋɔde nnɔ Abraham, ye Isaac, ye Jacob, nte ke nyeda enye nnɔ ubon fo:

² nyenyuŋ ndɔŋ angel ebem fi iso; nnyuŋ mbin mme Canaanite, ye mme Amorite, ye mme Hittite, ye mme Perizzite, ye mme Hivite, ye mme Jebusite mfep:

³ Dɔk ke isɔŋ emi ɔfiɔrɔde mmɔŋ-eba ye aran-ɔkwɔk: koro mmendisaŋake ke otu mbufo ndɔk; koro mbufo edide mbon nsɔŋ-ibuot: mbak ndibiat mbufo ke usuŋ.

⁴ Ndien adaŋemi kpukpru owo ekopde idiɔk ikɔ emi, mmɔ etuaŋa: baba owo kiet inyuŋ isineke ŋkpɔ mbana esie ke idem.

⁵ Koro Jehovah ɔkɔdɔhɔde Moses, ete, Dɔhɔ nditɔ Israel, ete, Mbufo edi mbon nsɔŋibuot; ŋkpasaŋa ke otu mbufo ini esisit, ŋkposobo mbufo; esioŋo ndien ŋkpɔ mbana mbufo ke idem efep, man mfiɔk se ndinamde mbufo.

⁶ Ndien nditɔ Israel esioŋo ŋkpɔ mbana mmɔ ɔtɔŋɔde ke obot Horeb.

⁷ Ndien Moses emen tent okowuk ke idem esie ke edem nna, ɔkpɔŋ nna anyan ebiet, onyuŋ osio enye enyiŋ Tent esop. Ndien, edikem, kpukpru owo eke eyomde Jehovah, ewɔŋɔ eka tent esop emi odude ke edem nna.

⁸ Ndien edikem, ke ini Moses ɔwɔrɔde aka tent oro, kpukpru owo edahada ke usuŋ tent mmɔ, ese Moses ibut edem, tutu enye oduk ke tent.

⁹ Ndien edikem ke ini Moses odukde ke tent oro, obubit enyɔŋ ebiet adaha ɔsuhɔre, akada ke enyin-usuŋ. Ndien enye osioŋo nneme ye Moses.

¹⁰ Ndien kpukpru owo ekut obubit enyɔŋ oro, ebiet adaha, adade tent ke enyin-usuŋ, ndien kpukpru owo edaha ke enyɔŋ, enyuŋ eda ke enyin-usuŋ tent mmɔ, enuhɔ.

¹¹ Ntem ke Jehovah osioŋo nneme ye Moses iso ye iso, nte emi owo osioŋode nneme ye ufan esie. Ndien enye afiak oduk ke nna; edi Joshua, eyen Nun, asaŋutom esie, akparawa, idahake ke tent.

¹² Ekem Moses ɔdɔhɔ Jehovah, ete, Sese afo ɔmɔdɔhɔ mi, ete, Da mbio emi usuŋ; edi afo ukausianke mi enye emi afo edidɔŋde asaŋa ye ami: nte afo omonyuŋ ɔdɔhɔ ete ke ɔmɔfiɔk enyiŋ mi, omonyuŋ enen iso ye ami.

¹³ Edieke afo enende iso ye ami, ndien, mbɔk, wut mi usuŋ fo, man mfiɔk fi, man afo enen iso ye ami; nyuŋ bat mbio emi ke ikɔt fo.

¹⁴ Ndien Enye ete, Iso mi eyeka, nyenyuŋ nnɔ fi nduɔk-odudu.

¹⁵ Ndien enye ɔdɔhɔ Enye, ete, Iso fo mikaha, kunam nnyin idaha ke ebiet emi idɔk.

¹⁶ Edinam didie, ndien, efiɔk ete ke afo enen iso ye ami ye ikɔt fo? Nte idige ke erika emi afo akade ye nnyin? Ntre ke eyedianare mi ye ikɔt fo ke kpukpru owo emi edude ke isɔŋ?

¹⁷ Ndien Jehovah ete Moses, Nyenam idem ŋkpɔ emi afo ɔdɔhɔde: koro nnende iso ye afo, mmonyuŋ mfiɔk enyiŋ fo.

¹⁸ Ndien enye ɔdɔhɔ ete, Mbɔk wut mi ubɔŋ fo.

¹⁹ Ndien Enye ɔdɔhɔ, ete, Ami nyenam ofuri ufɔn mi ɔbiɔŋɔ fi ke iso, nyenyuŋ ntaŋa enyiŋ Jehovah ke iso fo: nnyuŋ mfɔn ye owo eke ndifɔnde, nnyuŋ nnyene mbɔm ye owo eke ndinyenede mbɔm.

²⁰ Ndien enye ɔdɔhɔ ete, Afo ukemeke ndikut mi iso: koro owo ndomo kiet mikwe mi iso idu uwem.

²¹ Ndien Jehovah ɔdɔhɔ ete, Sese, ebiet odu ekpere mi, afo nyuŋ da ke enyɔŋ itiat oro:

²² ndien ama ekem, ke ini ubɔŋ mi ɔbiɔŋɔde, nyesin fi ke odudu itiat oro, nnyuŋ nda ubɔk mi ŋkubi fi tutu ndibe:

²³ ndien nyemenere ubɔk mi mfep, ndien afo eyekut mi ibut edem; edi udukwe mi iso.