EXODUS 31 - Edisana ñwed Abasi Ibom

Mbon Utom Emi Ekenamde Tent Iso Abasi

¹ NDIEN Jehovah ɔdɔhɔ Moses, ete, Sese mmokot

² Bezalel eyen Uri, eyen Hur, owo esien Judah kiet,ke enyiŋ:

³ mmonyuŋ nsin enye spirit Abasi ke idem nyɔhɔ, ke eti ibuot, ye ke asian, ye ifiɔk, ye kpukpru oruk usɔ,

⁴ man enye otibi ubɔk ŋkari usɔ, ndinam utom gold, ye silver, ye okpoho,

⁵ ye eke erisɔi itiat, man esin mmɔ, ye erikap eto, ndinam kpukpru ubɔk-utom.

⁶ Ndien ŋko, sese, ami mmada Oholiab, eyen Ahisamach, owo esien Dan, ndian ye enye; mmonyuŋ nsin ifiɔk ke esit kpukpru mbon ifiɔk, man mmɔ enam kpukpru se ŋkɔdɔhɔde fi;

⁷ kpa tent esop, ye ekebe ke eke ŋkpɔ-ntiense, ye itie usio-isop emi odorode ke esit, ye kpukpru

⁸ ŋkpoduoho tent oro, ye okpokoro ye ŋkpɔ esie, ye edisana utuen-ikaŋ ye kpukpru ŋkpɔ esie,

⁹ ye itie-ufɔp incense, ye itie-ufɔp uwa, ye kpukpru ŋkpɔ esie, ye akpaŋkpaŋ

¹⁰ ye ukot esie, ye edisine-ŋkpɔ utom: kpa edisana edisine-ŋkpɔ Aaron oku, ye edisana ŋkpɔ nditɔ esie,

¹¹ man eda oku, ye aran-nyere ye edifuɔŋ incense ke eke edisana ubet; yak mmɔ enam kpukpru kpa nte ŋketemede fi.

¹² Ndien Jehovah ɔdɔhɔ Moses, ete,

¹³ Afo nyuŋ dɔhɔ nditɔ Israel ete, Mbufo etim enim sabath mi: koro enye edidi idiɔŋɔ ke ufɔt mi ye mbufo ke ofuri emana mbufo; man mbufo efiɔk ete ke edi ami Jehovah nnim mbufo ke edisana.

¹⁴ Mbufo enim sabbath, ndien: koro enye edide edisana ŋkpɔ mbufo: owo eke asabarede enye, enyene ndikpa: koro edieke owo ekededi anamde utom ke esit, yak esibe ukpɔŋ oro efep ke mbio-obio mmɔ.

¹⁵ Yak enam utom ke usen itiokiet; edi ɔyɔhɔ usen itiaba edi akakan sabbath, edisana usen Jehovah kpukpru owo eke enamde ubɔk-utom ke usen sabath, iditreke ndikpa mkpa.

¹⁶ Yak nditɔ Israel, ndien ekpeme sabbath, enyuŋ enim sabbath ke emana mmɔ, ke nsinsi ediomi.

¹⁷ Enye edi idiɔŋɔ ke ufɔt mi ye nditɔ Israel ke nsinsi: koro Jehovah akadade usen itiokiet anam enyɔŋ ye isɔŋ, ndien odop, onyuŋ ɔduɔk odudu ke ɔyɔhɔ usen itiaba.

¹⁸ Ekem, adaŋemi Enye ama ɔkɔdɔhɔ ye Moses ama, ke obot Sinai, Enye ada ŋwed-ntiense iba, itiat-ŋwed, emi nnuenubɔk Abasi ekewetde ɔnɔ enye.