EXODUS 30 - Edisana ñwed Abasi Ibom

Itie Uwa Incense

¹ NDIEN nam itie-ufɔp incense; nam enye ke eto shittim.

² Uniɔn esie edidi ibio idomo-okuk kiet, ye ubom esie, ibio idomo-okuk kiet, ukukem; idaha esie edinyuŋ edi ibio idomo-okuk iba; nduk esie esaŋa idem kiet ye enye.

³ Nyuŋ da ata eti gold fuk enye, enyɔŋ esie ye ŋkaŋ esie kanade kuk, ye nduk esie; nyuŋ nam mkpuk-mkpuk mben o-gold ke esit kanade kuk.

⁴ Nyuŋ nam mkpanuen gold iba, sin ke esit ke idak mkpuk-mkpuk esie, ke inuk esie iba: ye ke ŋkaŋ esie iba ke afo edinam mmɔ; ndien mmɔ edidi itie esaŋ eke edidade ebiom enye.

⁵ Nyuŋ da eto shittim nam esaŋ oro, nyuŋ da gold fuk mmɔ.

⁶ Ndien diɔk enye ke iso ukara emi ekperede ekebe ntiense, ke iso itie usio-isop, emi ɔkubɔde ŋkpɔ-ntiense, emi ndisobode ye afo do.

⁷ Ndien Aaron edifɔp edifuɔŋ incense ke esit; yak enye ɔfɔp incense ke esit kpukpru usenubɔk, ke ini enye ɔdiɔŋde utuen-ikaŋ.

⁸ Ndien ŋko ke ini Aaron onyuŋ odomode utuenikaŋ ke mbubreyo, yak enye ɔfɔp incense ke esit; nte nsinsi incense ke iso Jehovah, ke ofuri emana mbufo.

⁹ Mbufo ekufɔp esen incense ke esit, ye edifɔp uwa, ye enɔ; ekunyuŋ etɔhɔ ediŋwɔŋ uwa ke esit.

¹⁰ Ndien yak Aaron ada iyip uwa idiɔk ido usio-isop, osio isop ke nduk esie ini kiet ke isua; ini kiet ke isua ke enye edinam usio-isop ke esit, ke ofuri emana mbufo: enye edi ata edisana ŋkpɔ Jehovah.

¹¹ Ndien Jehovah ɔdɔhɔ Moses, ete,

¹² Ke ini afo edibatde nditɔ Israel, kpa mmɔ emi ekam ebatde, yak kpukpru owo eda ndien usio isop uwem mmɔ esɔk Jehovah, ke ini ebatde mmɔ; man ufen okuduk ke otu mmɔ, ke ini ebatde mmɔ.

¹³ Emi ke kpukpru owo emi ebede eduk ke otu mmɔ emi ebatde mmɔ, edinɔ, kpa ibio shekel, nte asaŋade ye edisana shekel; (shekel oro oduk gerah edip;) ibio shekel oro edidi enɔ Jehovah.

¹⁴ Yak kpukpru owo eke ebede ediana ye mmɔ eke ebatde ɔtɔŋɔde ke owo isua edip, ye mmɔ eke ebede oro, enɔ enɔ Jehovah.

¹⁵ Owo inyene okudian, ubuene okunyuŋ osio ke ibio shekel oro, ke erinɔ Jehovah enɔ, man esio isop ukpɔŋ mbufo.

¹⁶ Ntem ke afo edibɔ nditɔ Israel silver usio-isop, onyuŋ ada enye ɔnɔ ke utom tent esop; man nditɔ Israel enyene enye ke ŋkpɔ eriti ke iso Jehovah, ke erisio isop ukpɔŋ mbufo.

¹⁷ Ndien Jehovah ɔdɔhɔ Moses, ete,

¹⁸ Nyuŋ da okpoho nam akpaŋ-ŋkpaŋ uyere mmɔŋ, ye ukot esie; ndien diɔk enye ke ufɔt tent esop ye itie-uwa, nyuŋ sin mmɔŋ ke esit.

¹⁹ Ndien Aaron ye nditɔ esie ediyet ubɔk mmɔ, ye ukot mmɔ ke esit:

²⁰ ke ini mmɔ edukde ke tent esop, yak mmɔ eyere mmɔŋ, man ekukpa; ye ke ini mmɔ esaŋande ekpere itie-uwa ndinam ŋkpɔ, ndifɔp uwa ikaŋ nnɔ Jehovah.

²¹ Ntre ke mmɔ ediyet ubɔk mmɔ ye ukot mmɔ, man ekukpa; ndien edidi nsinsi ewuhɔ mmɔ, kpa esie ye eke ubon esie ke ofuri emana mmɔ.

²² Ndien Jehovah ɔdɔhɔ Moses, ete,

²³ Ndien ŋko da ata akpan ufuɔŋ-ŋkpɔ ke idem fo, ata eti myrrh shekel ikie ition, ye cinnamon eti utebe ekem ye ubak myrrh, shekel ikie iba ye aba ye duop, ye calamus eti utebe shekel

²⁴ ikie iba ye duop, ye cassia shekel ikie ition, (asaŋa ye edisana shekel,) ye aran olive ke quart iba ye ubak.

²⁵ Ndien da enye nam edisana aran-nyere, mbuaha eke ebuakde ke ubɔk-usɔ abuak-ufuɔŋ-ŋkpɔ: edidi edisana aran-nyere.

²⁶ Ndien da enye yet ke tent esop, ye ke ekebe ntiense,

²⁷ ye ke okpokoro, ye itie, ufɔp incense;

²⁸ ye ke itie-ufɔp uwa ye kpukpru ŋkpɔ esie, ye ke akpaŋkpaŋ ye ukot esie.

²⁹ Nyuŋ nim mmɔ ke edisana ŋkpɔ, man esana eti-eti; yak kpukpru owo eke etukde mmɔ edi edisana.

³⁰ Nyuŋ da enye yet Aaron ye nditɔ esie ke idem, nyuŋ nam mmɔ esana,

³¹ man eda oku mi. Nyuŋ dɔhɔ nditɔ Israel, ete, Emi edidi edisana aran-nyere mi ke ofuri emana mbufo.

³² Ekuda enye eduɔk owo ke idem, ekunyuŋ enam se ibietde enye, oruk mbuaha esie; enye edi edisana; mbufo enim enye ke edisana.

³³ Ama edi owo eke edibuakde se ibietde enye, ye owo ŋko eke adade enye eyet esen owo ke idem, yak esibe enye efep ke otu mbio-obio mmɔ.

³⁴ Ndien Jehovah ɔdɔhɔ Moses, ete, Da ufuɔŋ-ŋkpɔ ke idem fo, stacte, ye onycha, ye galbanum; ufuɔŋ-ŋkpɔ emi, ye ata frankincense; kpukpru edide ukem-ukem:

³⁵ nyuŋ da enye nam incense, mbuaha ke ubɔk-usɔ abuak-ufuɔŋ-ŋkpɔ, sin inuŋ, nam enye ata eti ye edisana.

³⁶ Ndien wobi esisit kɔk emem, nyuŋ diɔk enye ke iso ŋkpɔ ntiense, ke tent esop, emi ndisobode ye afo do; mbufo ese enye ke ata edisana ŋkpɔ.

³⁷ Ndien ama edi incense emi afo edinamde, mbufo ekuman oruk mbuaha oro enɔ idem mbufo; bat enye ke edisana ŋkpɔ Jehovah.

³⁸ Owo anam se ibietde enye ete iŋwune enye, yak esibe enye efep ke otu mbio-obio mmɔ.