EXODUS 28 - Edisana ñwed Abasi Ibom

Edisine Ŋkpɔ Mme Oku

¹ NDIEN afo sio Aaron eyen-uka, ye nditɔ-iren esie ŋko, ke otu nditɔ Israel, dian idem, man mmɔ eda oku mi, kpa Aaron, ye Nadab, ye Abihu, ye Eleazar, ye Ithamar nditɔ Aaron

² Nyuŋ nam edisana edisine-ŋkpɔ ubɔŋ ye uyai nɔ Aaron eyen-uka.

³ Afo nyuŋ dɔhɔ kpukpru mbon eti ibuot, emi nsinde mmɔ spirit mi ke esit nyɔhɔ, ete, enam edisine-ŋkpɔ Aaron, man enam enye asana, man enye ada oku mi.

⁴ Ndien edisine-ŋkpɔ emi ke mmɔ edinam: mbana-ikpanesit, ye ephod, ye ekura, ye ŋwet-ŋwet frock, ye mitre, ye ubɔp-isin; yak mmɔ enyuŋ enam edisana edisine-ŋkpɔ enɔ Aaron eyen-uka, ye nditɔ esie, man enye ada oku mi.

⁵ Ndien yak mɔ ebɔ gold, ye awawa, ye purple, ye ididuot, ye eti linen.

⁶ Ndien yak mmɔ eda gold, ye awawa, ye purple, ye ididuot, ye eti edifiak linen oro, enam ephod ke ubɔk-usɔ ɔdɔk-ɔfɔŋ.

⁷ Enye edinyene afara iba eke ekɔtde ɔtɔ kiet, ke utit esie mbiba; ntem ke edikɔt enye.

⁸ Ndien ŋko ubɔp-ephod emi odude enye ke esit, edidi ubɔk-usɔ kiet, ye idem kiet ye enye; ke gold ye awawa, ye purple, ye ididuot, ye eti edifiak linen.

⁹ Ndien bɔ itiat onyx iba, nyuŋ kap enyiŋ nditɔ Israel sin mmɔ ke esit:

¹⁰ enyiŋ mmɔ itiokiet ke itiat kiet, ye enyiŋ itiokiet emi esukde, ke itiat eken, nte mmɔ ekemanade.

¹¹ Da ubɔk-usɔ akap-itiat, nte ekapde seal, kap itiat mbiba oro, nte enyiŋ nditɔ Israel edide; nam mmɔ sin ke socket o-gold.

¹² Ndien da itiat iba oro dian ke afara ephod, (man edi) itiat eriti nditɔ Israel; ndien Aaron eyebiom enyiŋ mmɔ ke iso Jehovah, ke afara esie mbiba, ke ŋkpɔ eriti.

¹³ Ndien nam socket o-gold;

¹⁴ ye ŋkpɔkɔbi ata eti gold iba, nam mmɔ mfiaha-mfiaha, ubɔk-usɔ uruk, ndien da mfiaha-mfiaha ŋkpɔkɔbi oro tebe ke mme socket.

¹⁵ Ndien nam mbana ikpanesit-ikpe, ubɔk-usɔ ɔdɔk-ɔfɔŋ; nam enye nte enamde ephod, da gold ye awawa, ye purple, ye ididuot, ye eti edifiak linen, nam enye.

¹⁶ Enye edidi ukem-ukem, fut iba; uniɔŋ esie edidi ubɔk kiet, ye ubara esie ubɔk kiet.

¹⁷ Nyuŋ sin itiat ke esit nte ekam esinde, ke udim itiat inaŋ: udim sardius, ye topaz, ye carbuncle, edidi akpa udim.

¹⁸ Ndien udiana akpa udim edidi emerald, ye sapphire, ye diamond.

¹⁹ Ɔyɔhɔ udim ita, jacinth, ye agate, ye amethyst.

²⁰ Ye ɔyɔhɔ udim inaŋ, beryl, ye onyx, ye jasper: esine ke socket o-gold ke ɔtɔ eke esinde mmɔ.

²¹ Ndien itiat oro esaŋa ye enyiŋ nditɔ Israel, duopeba: ekem ye enyiŋ mmɔ, nte emi ekapde seal; kpukpru nte enyiŋ mmɔ esaŋade edidu ke esit, ekem ye mme esien duopeba.

²² Ndien da ata eti gold nam mfiaha-mfiaha ŋkpɔkɔbi, ubɔk-usɔ uruk, tebe ke mbana-ikpanesit.

²³ Nyuŋ nam mkpanuen o-gold iba dian ke mbana-ikpanesit nyuŋ, sin mkpanuen o-gold iba oro ke mbuot mbana-ikpanesit mbiba.

²⁴ Nyuŋ tebe uruk gold iba oro ke mkpanuen iba, ke mbuot mbana-ikpan esit.

²⁵ Nyuŋ da mbuot iba uruk iba tebe ke socket iba oro, dian ke mme afara ephod ke iso.

²⁶ Ndien nam mkpanuen gold iba, sin mmɔ ke mbuot mbana-ikpan-esit mbiba, ke mben esie, emi odude ke ŋkaŋ ephod, ke edem.

²⁷ Nyuŋ nam mkpanuen gold iba, dian ke afara ephod mbiba ke isɔŋ, ke iso esie, ekpere isobo esie, ke enyɔŋ ubɔp-ephod.

²⁸ Ndien yak eda awawa erebin etebe mkpanuen mbana-ikpanesit ke mkpanuen ephod, man ana ke enyɔŋ ubɔŋ-ephod, ndien owo okutat mbana-ikpanesit efep ke ephod.

²⁹ Ndien Aaron eyebiom enyiŋ nditɔ Israel ke mbana-ikpanesit-ikpe ke esit esie, ke ini enye odukde ke edisana ebiet, man edi ŋkpɔ eriti ke iso Jehovah kpukpru ini.

³⁰ Ndien da Urim ye Thummim sin ke mbana-ikpanesit-ikpe; ndien mmɔ eyedoro Aaron ke esit, ke ini enye odukde ke iso Jehovah, ndien Aaron edibiom ikpe nditɔ Israel ke esit esie ke iso Jehovah kpukpru ini.

³¹ Nyuŋ nam ofuri ekura ephod ke awawa.

³² Ndien itɔŋ esie odu enye ke ufɔt; itɔŋ oro enyene ibuŋ ubɔk-usɔ ɔdɔk-ɔfɔŋ, akan okuk, ebiet itɔŋ ufuhɔ-ikpanesit ekɔŋ, man okuwaha.

³³ Nyuŋ nam pomegranate awawa ye purple ye ididuot ke ibuŋ esie, sin ke ibuŋ esie kanade kuk, nyuŋ sin ŋkanika gold ke ufɔt mmɔ kanade kuk.

³⁴ Ŋkanika gold kiet, ye pomegranate kiet, ŋkanika gold kiet, ye pomegranate kiet, ke ibuŋ ekura kanade kuk.

³⁵ Ndien Aaron edisine enye ke idem ke ini enye anamde ŋkpɔ; ndien eyekop uyo esie ke ini enye odukde ke edisana ubet ke iso Jehovah, ye ke ini enye ɔwɔrɔde ŋko, man enye okukpa.

³⁶ Nyuŋ nam ubak ata eti gold, nyuŋ kap enye nte ekapde seal: EDISANA ŊKPƆ JEHOVAH.

³⁷ Nyuŋ da awawa erebin tebe enye, man enye ana ke mitre; yak edian enye mitre ke iso.

³⁸ Yak enye onyuŋ ana Aaron ke ɔkpɔ-iso, man Aaron obiom isop edisana ŋkpɔ, emi nditɔ Israel edinimde ke edisana, ye eke kpukpru edisana enɔ mmɔ; ntem ke ana enye ke ɔkpɔ-iso kpukpru ini, man mmɔ enem Jehovah esit.

³⁹ Ndien da eti linen dɔk ŋwet-ŋwet frock; nyuŋ nam mitre ke eti linen; nyuŋ nam ubɔp-isin ubɔk-usɔ ɔdɔk-ɔfɔŋ.

⁴⁰ Nyuŋ nam frock ubɔŋ ye uyai nɔ nditɔ Aaron, nyuŋ nam ubɔp-isin nɔ mmɔ,

⁴¹ Nyuŋ da mmɔ sine Aaron eyen-uka, ye nditɔ esie ŋko ke idem; ndien yet mmɔ aran ke idem, nyuŋ yɔhɔ mmɔ ubɔk, nyuŋ nam mmɔ esana man eda oku mi.

⁴² Nyuŋ nam ɔfɔŋ-ukot linen nɔ mmɔ, man efuk iferi obukidem mmɔ, etɔŋɔ ke isin esim ifuhi.

⁴³ Ndien yak Aaron ye nditɔ esie esine mmɔ ke idem, ke ini mmɔ edukde ke tent esop, ye ke ini mmɔ edide ke itie-uwa ndinam ŋkpɔ ke edisana ubet, man ekudue isop, ekunyuŋ ekpa: eyedi nsinsi ewuhɔ ɔnɔ enye, ye nditɔ esie eke editienede enye ke edem.