EXODUS 26 - Edisana ñwed Abasi Ibom

Ebiet Iduŋ Abasi

¹ NDIEN ŋko nam ebiet-iduŋ ke ikpehe duop eti edifiak linen, ye ke awawa, ye ke purple, ye ke ididuot, nam mmɔ sin cherubim ubɔk-usɔ.

² Uniɔŋ ikpehe kiet edidi ibio idomo-okuk edip ye itiaita, ufot ikpehe kiet edinyuŋ edi ibio idomo-okuk inaŋ: kpukpru ikpehe esaŋa idomo kiet.

³ Eda ikpehe ition ekɔt ɔtɔ kiet; enyuŋ eda ikpehe ition (eken) ekɔt ɔtɔ kiet.

⁴ Nyuŋ da awawa nam ekpɔ, sin ke ibuŋ ikpehe kiet emi edide akpatre ke ɔtɔ emi ekɔtde mmɔ; nnyuŋ nam kpasuk ntre ke ibuŋ ikpehe emi edide akpatre ke udiana-akpa ɔtɔ emi ekɔtde mmɔ.

⁵ Nam ekpɔ aba ye duop sin ke mben ikpehe kiet; nyuŋ nam ekpɔ aba ye duop sin ke mben ikpehe emi odude ke udiana-akpa ɔtɔ emi ekɔtde; man ekem ekpɔ kiet ye kiet.

⁶ Ndien da gold nam ŋkɔp aba ye duop, kɔt ikpehe kiet ye eken ke ŋkɔp oro: ndien ebietiduŋ eyedi kiet.

⁷ Ndien da idet ebot nam ikpehe, ete etie nte tent ke enyɔŋ ebiet-iduŋ oro: nam ikpehe duopekiet.

⁸ Unioŋ ikpehe kiet edidi ibio idomo-okuk edip ye duop, ubom ikpehe kiet edinyuŋ edi ibio idomo-okuk inaŋ: ikpehe mboduopekiet esaŋa idomo kiet.

⁹ Ndien kɔt ikpehe ition ke ɔtɔ kiet, ye ikpehe itiokiet ke ɔtɔ kiet, nyuŋ fut ɔyɔhɔ ikpehe itiokiet oro ke iso tent.

¹⁰ Nyuŋ nam ekpɔ aba ye duop sin ke ibuŋ ikpehe kiet emi edide akpatre ke ɔtɔ ikɔt, ye ekpɔ aba ye duop ke ibuŋ ikpehe ke ɔtɔ udiana ikɔt.

¹¹ Ndien nam ŋkɔp okpoho aba ye duop, nyuŋ kpaha ŋkɔp ke ekpɔ oro, ndien yi tent ke ɔtɔ kiet, man edi kiet.

¹² Ndien yak ubak ikpehe emi osukde, kpa ibio ikpehe emi osukde, ɔkɔŋɔ ke edem ebiet-iduŋ.

¹³ Ndien yak ibio idomo-okuk kiet ŋkaŋ emi, ye ibio idomo-okuk kiet ŋkaŋ eken, eke osukde, ke uniɔŋ ikpehe tent, ɔduɔ ke ŋkaŋ ebiet-iduŋ, ke ŋkaŋ emi ye ŋkaŋ eken, man efuk enye.

¹⁴ Ndien da ikpa okukim eke etemde oyibe, nam ufuhɔ-ŋkpɔ kiet nɔ tent, nyuŋ da ikpa badger nam ufuhɔ-ŋkpɔ eke edoride ke enyɔŋ.

¹⁵ Ndien da eto shittim nam obukpɔk ebiet-iduŋ eneŋere eda.

¹⁶ Uniɔŋ obukpɔk edidi ibio idomo-okuk duop, ye ubara obukpɔk ibio idomo-okuk kiet ye ubak.

¹⁷ Nam edet iba sin ke obukpɔk kiet, kiet ekem ye eken: ntem ke edinam ke kpukpru obukpɔk ebiet-iduŋ.

¹⁸ Ntem ke afo edinam mme obukpɔk ebiet-iduŋ, obukpɔk edip esaŋa ke ŋkaŋ edem usuk-usuk.

¹⁹ Nyuŋ da silver nam socket aba, sin ke idak obukpɔk edip oro: socket iba ke idak obukpɔk kiet, ke eke edet esie mbiba.

²⁰ Obukpɔk edip enyuŋ esaŋa ke ŋkaŋ ebiet-iduŋ eken, ese edem edere:

²¹ ye socket silver mmɔ aba, socket aba ke idak obukpɔk kiet, ye socket aba ke idak obukpɔk efen.

²² Nyuŋ nam obukpɔk itiokiet sin ke etak ebiet-iduŋ ke edem usop utin.

²³ Nyuŋ nam obukpɔk iba sin ke mme inuk ebiet-iduŋ ke etak edem mbiba.

²⁴ Mmɔ edidi ukem-ukem ke idak; ndien kpasuk ntre edidi ukem-ukem ke ibuot esie, esim akpa mkpanuen: mmɔ mbiba etie ntem; mmɔ edidi ke eke inuk mbiba.

²⁵ Ndien mmɔ edidi obukpɔk itiaita, ye socket silver mmɔ, kpa socket efurekiet, socket iba ke idak obukpɔk kiet, ye socket iba ke idak obukpɔk efen.

²⁶ Ndien nam bar eto shittim: nam ition nɔ mme obukpɔk ŋkaŋ ebiet-iduŋ kiet,

²⁷ nyuŋ nam bar ition nɔ mme obukpɔk ŋkaŋ ebiet-iduŋ eken, ye bar ition ke eke obukpɔk etak ebiet-iduŋ ke edem usop utin.

²⁸ Ndien ŋko ufɔt-ufɔt bar emi esinede ke ufɔt mme obukpɔk, edituak ibuot emi ye ibuot oko.

²⁹ Nyuŋ da gold fuk mme obukpɔk, nyuŋ nam mkpanuen mmɔ ke gold, ke eke itie mme bar: nyuŋ fuk mme bar ke gold.

³⁰ Ndien neŋere ebiet-iduŋ, kpa ke ido esie emi ewutde fi ke akamba obot oro.

³¹ Ndien da awawa, ye purple, ye ididuot, ye eti edifiak linen, nam ukara: nam enye sin cherubim, ubɔk-usɔ ɔdɔk-ɔfɔŋ.

³² Nyuŋ kɔŋ enye ke obubɔk shittim inaŋ eke ofukde gold, (ntok mmɔ edidi gold) eke enyuŋ ewukde ke socket silver inaŋ.

³³ Ndien kɔŋ ukara oro ke idak ŋkɔp; nyuŋ men ekebe ŋkpɔ-ntiense duk do ke edem ukara oro: ndien ukara oro onyuŋ abahare edisana ubet ke ata edisana ɔnɔ mbufo.

³⁴ Ndien kubi itie usio-isop ke ekebe ŋkpɔ-ntiense ke ata edisana ebiet.

³⁵ Nyuŋ diɔk okpokoro ke iso ukara, uwuk utuenikaŋ onyuŋ ekem ye okpokoro, ke ŋkaŋ ebiet-iduŋ edem usuk: nyuŋ diɔk okpokoro ke ŋkaŋ edem edere.

³⁶ Ndien da awawa, ye purple, ye ididuot, ye eti edifiak linen, nam ikpehe enyin-usuŋ ebiet-iduŋ, ke ubɔk-usɔ ɔdɔk-ɔfɔŋ.

³⁷ Nyuŋ nam obukpɔk eto shittim ition nɔ ikpehe emi, nyuŋ fuk mmɔ ke gold; ntok mmɔ edidi gold: nyuŋ tara okpoho nam socket ition nɔ mmɔ.