EXODUS 25 - Edisana ñwed Abasi Ibom

Mme Enɔ Emi Nditɔ Israel Enyenede Ndinɔ Abasi

¹ EKEM Jehovah ɔdɔhɔ Moses,

² ete, Dɔhɔ nditɔ Israel, ete, Yak mmɔ eda enɔ esɔk mi: kpukpru owo eke esit mmɔ onyimede ke mbufo edibɔ enɔ mi.

³ Ndien emi edi enɔ eke mbufo edibɔde mmɔ, gold, ye silver,

⁴ ye okpoho, ye awawa, ye purple, ye ididuot, ye eti linen, ye idet ebot,

⁵ ye ikpa okukim eke etemde oyibe, ye ikpa badger, ye eto shittim,

⁶ aran ke eke uŋwana, ye ufuɔ-ŋkpɔ ke eke aran-nyere,

⁷ ye edifuɔŋ incense, ye itiat onyx, ye itiat eke esinde ke ephod, ye ke mbana ikpanesit.

⁸ Ndien yak mmɔ enam edisana ebiet enɔ mi, man nduŋ ke otu mmɔ.

⁹ Kpa nte emi ami ŋwutde fi kpukpru ŋkpɔ, kpa mbiet ebiet-iduŋ, ye mbiet kpukpru ŋkpɔ utom esie, kpasuk ntre ke mbufo edinam enye.

¹⁰ Ndien yak mmɔ eda eto shittim enam ekebe: uniɔŋ esie ibio idomo-okuk ita ye ubak, ubom esie ibio idomo-okuk kiet ye ubak, ye idaha esie ibio idomo-okuk kiet ye ubak.

¹¹ Nyuŋ da ata eti gold fuk enye; ke esit ye ke edem ke afo edifuk enye, nnyuŋ nam mkpuk-mkpuk mben o-gold ke esit kanare kuk.

¹² Ndien tara gold nam mkpanuen inaŋ nɔ enye, sin ke ukot esie mbinaŋ; ndien mkpanuen iba edidu ke ŋkaŋ esie kiet, ye mkpanuen iba ke ŋkaŋ esie eken.

¹³ Nyuŋ da eto shittim nam esaŋ, nyuŋ fuk mmɔ ke gold.

¹⁴ Ndien sin mme esaŋ oro ke mkpanuen ke ŋkaŋ ekebe, man ebiom ekebe ke esit.

¹⁵ Yak esaŋ oro esine ke mkpanuen ekebe; ekusio mmɔ efep ke esit.

¹⁶ Ndien da ŋkpɔ-ntiense emi ndinɔde fi sin ke ekebe.

¹⁷ Nyuŋ nam itie usio-isop ke ata eti gold: uniɔŋ esie ibio idomo-okuk ita ye ubak, ye ubom esie ibio idomo-okuk kiet ye ubak.

¹⁸ Nyuŋ nam cherubim iba ke gold; dodom mmɔ nam ke mbuot itie usio-isop mbiba.

¹⁹ Nyuŋ nam cherub kiet sin ke ibuot kiet ye cherub kiet ke ibuot eken: nam mme cherubim oro sin ke itie usio-isop ke mbuot esie mbiba.

²⁰ Ndien cherubim oro etiga mba mmɔ ke enyɔŋ, efuk itie usio-isop ke mba mmɔ; ndien kiet onyuŋ asak iso ese kiet; iso mme cherubim enyuŋ ese itie usio-isop.

²¹ Ndien afo nyuŋ da itie usio-isop dori ke enyɔŋ ekebe; nyuŋ men ŋkpɔ-ntiense emi ndinɔde fi, sin ke ekebe.

²² Ndien nyesobo ye afo do, nnyuŋ ntie ke enyɔŋ itie usio-isop, ke ufɔt mme cherubim iba emi (edorede) ke enyɔŋ ekebe ŋkpɔ-ntiense, nneme ye afo mbaŋa kpukpru se nditemede fi nnɔ nditɔ Israel.

²³ Nyuŋ da eto shittim nam okpokoro: uniɔŋ esie ibio idomo-okuk iba, ye ubom esie ibio idomo-okuk kiet, ye idaha esie ibio idomo-okuk kiet ye ubak.

²⁴ Nyuŋ da ata eti gold fuk enye, nyuŋ nam mkpuk-mkpuk mben o-gold ke esit kanade kuk.

²⁵ Ndien nam mben esie nte eka-ubɔk kanare kuk, nyuŋ nam mkpuk-mkpuk mben o-gold ke mben esie kanare kuk.

²⁶ Nyuŋ nam mkpanuen gold inaŋ nɔ enye, nyuŋ sin mkpanuen oro ke utɔŋ mbinaŋ emi edude ke ukot esie mbinaŋ.

²⁷ Mkpanuen oro ekpere mben, ke itie esaŋ eke edibiomde okpokoro ke esit.

²⁸ Ndien da eto shittim nam esaŋ, nyuŋ fuk mmɔ ke gold man eda mmɔ ebiom okpokoro.

²⁹ Ndien nam mme usan esie, ye mme ikpaŋ esie, ye mme cup esie, ye mme bowl esie, eke edade etɔhɔ (ediŋwɔŋ uwa): nam mmɔ ke ata eti gold.

³⁰ Ndien da uyo iso dori ke okpokoro ke iso mi kpukpru ini.

³¹ Ndien da ata eti gold nam uwuk-utuenikaŋ; dodom utuenikaŋ nam; ukot esie, ye ekpat esie, ye mme cup esie, ye ekop esie, ye flower esie, esaŋa idem kiet.

³² Ndien ŋkɔk itiokiet esiaha ke ŋkaŋ esie; ŋkɔk uwuk-utuenikaŋ ita ke ŋkaŋ esie kiet, ye nkɔk uwuk-utuenikaŋ ita ke ŋkaŋ esie eken;

³³ cup ita ebiet almond, ekop ye flower esaŋa ke ŋkɔk kiet; cup ita ebiet almond, ekop, ye flower, enyuŋ esaŋa ke ŋkɔk efen; ntem ke ŋkɔk mbitiokiet emi uwuk-utuenikaŋ asiahade, edisaŋa.

³⁴ Ndien cup inaŋ ebiet almond, ye ekop mmɔ, ye flower mmɔ, edu ke uwuk-utuenikaŋ.

³⁵ Yak esin ekop kiet ke idak ŋkɔk iba eke enye asiahade, ye ekop kiet ke idak ŋkɔk iba eke enye asiahade, ye ekop kiet ke idak ŋkɔk iba eke enye asiahade, ekem ke ŋkɔk mbitiokiet eke uwuk-utuenikaŋ asiahade.

³⁶ Ekop mmɔ ye ŋkɔk mmɔ esaŋa idem kiet ye enye: ofuri utuenikaŋ edidi se edomde ata eti gold enam.

³⁷ Nyuŋ nam utuenikaŋ esie itiaba; ndien domo mme utuenikaŋ esie, man eŋwaŋa edem emi asakde iso ese enye.

³⁸ (Nyuŋ nam) mme udiɔŋ utuenikaŋ esie, ye usin udiɔŋ utuenikaŋ esie, ke ata eti gold.

³⁹ Yak enam enye ye kpukpru ŋkpɔ emi ke talent ata eti gold kiet.

⁴⁰ Ndien tiŋ enyin nam mmɔ sin ke mbiet mmɔ emi ewutde fi ke enyɔŋ obot.