EXODUS 24 - Edisana ñwed Abasi Ibom

Moses ye Mme Mbiowo Esɔŋɔ Ediomi Mmɔ ye Abasi ke Obot Sinai

¹ NDIEN enye ɔdɔhɔ Moses, ete, Dɔk tiene Jehovah, afo, ye Aaron, ye Nadab, ye Abihu, ye mbiowo Israel ata ye duop; mbufo enyuŋ eda nsan-nsan etuak ibuot.

² Ndien Moses ikpɔŋ-ikpɔŋ edisaŋa ekpere Jehovah, edi mmɔ eken ekusaŋa ekpere mbio oro ekunyuŋ etiene enye edɔk.

³ Ekem Moses emen kpukpru ikɔ Jehovah, ye kpukpru mme item emi, edi editiŋ ɔnɔ kpukpru owo: ndien kpukpru owo ebɔrɔ uyo kiet, ete, Nnyin iyenam kpukpru ikɔ emi Jehovah ɔkɔdɔhɔde.

⁴ Ndien Moses ewet kpukpru ikɔ Jehovah, onyuŋ abak edemere ke usenubɔk, anam itie-uwa ke ukot obot, ye ndaha duopeba, ekem ke mme esien Israel duopeba.

⁵ Ndien enye ɔdɔŋ mkparawa nditɔ Israel, ndien mmɔ efɔp edifɔp uwa, enyuŋ ewa uwa emem ke enaŋ enɔ Jehovah.

⁶ Ndien Moses ada ubak iyip kiet esin ke bason; onyuŋ ada ubak iyip eken esime ke itie-uwa.

⁷ Ndien enye emen ŋwed ediomi eketiŋ ke utɔŋ kpukpru owo: ndien mmɔ edɔhɔ ete, Nnyin iyenam, inyuŋ ikop kpukpru se Jehovah ɔdɔhɔde.

⁸ Ndien Moses ada iyip oro esime kpukpru owo ke idem, ete, Se iyip ediomi, emi Jehovah odiomide ye mbufo, nte kpukpru ikɔ emi edide.

⁹ Edikem Moses ɔdɔk ye Aaron, ye Nadab, ye Abihu, ye mbiowo Israel ata ye duop;

¹⁰ ndien mmɔ ekut Abasi Israel: ndien ŋkpɔ odu enye ke idak ukot, esem nte ŋkpɔ eke enamde ke sapphire, onyuŋ asana nte idem enyɔŋ.

¹¹ Ndien Enye imenke ubɔk esie ituk ikpɔ owo ufɔk Israel: mmɔ enyuŋ ekut Abasi, enyuŋ edia ŋkpɔ enyuŋ eŋwɔŋ.

¹² Ndien Jehovah ɔdɔhɔ Moses, ete, Dɔk tiene mi ke obot, nyuŋ du do: ndien nyenɔ fi itiat ŋwed, ye mbet, ye ewuhɔ emi ŋwetde, nditeme mmɔ.

¹³ Ndien Moses adaha ke enyɔn, ye Joshua asaŋa-utom esie; ndien Moses ɔdɔk ke obot Abasi.

¹⁴ Enye onyuŋ ɔdɔhɔ mbiowo, ete, Mbufo etie mi ebet nnyin, tutu nnyin ifiak itiene mbufo: ndien sese, Aaron ye Hur edu ye mbufo: owo ama enyene ikɔ, yak enye etiene mmɔ.

¹⁵ Ntre ke Moses ɔdɔk obot, obubit enyɔŋ onyuŋ ofuk obot.

¹⁶ Ndien ubɔŋ Jehovah oduŋ ke obot Sinai, obubit enyɔŋ onyuŋ ofuk enye ke ofuri usen itiokiet: ndien ekem ke ɔyɔhɔ usen itiaba, Enye etie ke ufɔt obubit enyɔŋ okot Moses.

¹⁷ Ndien iso ubɔŋ Jehovah ebiet ikaŋ asakde ke enyɔŋ obot ke enyin nditɔ Israel.

¹⁸ Ndien Moses okoduk ke ufɔt obubit enyɔŋ, ɔdɔk obot; Moses onyuŋ odu ke obot oro ke uwemeyo aba ye okoneyo aba.