EXODUS 20 - Edisana ñwed Abasi Ibom

Abasi Ɔnɔ Nditɔ Israel Mbet Duop ke Obot sinai

¹ NDIEN Abasi ɔdɔhɔ kpukpru ikɔ emi, ete, Ami ndi

² Jehovah Abasi fo, emi ŋkosiode fi ke isɔŋ Egypt, ke ufɔk ufin mfep.

³ Kunyene abasi efen ukɔrɔ ye ami.

⁴ Kunam edisɔi ŋkpɔ unɔ idem fo, kunyuŋ unam mbiet baba ŋkpɔ kiet eke odude ke heaven ke enyɔŋ, ye eke odude ke isɔŋ ke idak, ye eke odude ke mmɔŋ ke idak isɔŋ;

⁵ kunuhɔ unɔ mmɔ, kunyuŋ unam ŋkpɔ mmɔ: koro ami Jehovah Abasi fo ndi Abasi ufup, nda ukwaŋkpɔ mme ete ndori nditɔ ke idem, ndori ɔyɔhɔ emana mmɔ eke esuade mi ita ye inaŋ;

⁶ nnyuŋ mfɔn ido ye tɔsin emana mmɔ eke emade mi, enyuŋ enimde mbet mi.

⁷ Kumen enyiŋ Jehovah Abasi fo utomo ke se midige akpanikɔ: koro Jehovah midiyakke otomo enyiŋ esie ke se midige akpanikɔ, ɔbɔhɔ.

⁸ Ti usen sabbath nyuŋ nim enye ke edisana.

⁹ Nam ŋkpɔ ke usen itiokiet, nyuŋ nam ofuri utom fo:

¹⁰ edi ɔyɔhɔ usen itiaba edi sabbath Jehovah Abasi fo: kunam baba utom ke esit, afo, ye eyen-eren fo, ye eyen fo aŋwan, ye ofin eren fo, ye ofin aŋwan fo, ye ufene fo, ye esen owo fo eke odude ke obio mbufo:

¹¹ koro Jehovah akadade usen itiokiet anam enyɔŋ, ye isɔŋ, ye inyaŋ, ye kpukpru se idude mmɔ ke esit, ndien odop ke ɔyɔhɔ usen itiaba: mmɔdo Jehovah ɔdiɔŋde usen sabbath, onyuŋ onim enye ke edisana.

¹² Kpono usɔ ye uka; kpaŋ usen fo ekpebige ke isɔŋ emi Jehovah Abasi fo ɔnɔde fi.

¹³ Kuwot owo.

¹⁴ Kusin efibe.

¹⁵ Kuyip inɔ.

¹⁶ Kutiŋ ubaŋa mbɔhiduŋ fo nte ntiense nsu.

¹⁷ Kuyom ufɔk mbɔhiduŋ fo; kuyom ŋwan mbɔhiduŋ fo, ye ofin eren esie, ye ofin aŋwan esie, ye enaŋ esie, ye ass esie, ye ŋkpɔ ekededi eke enyenede mbɔhiduŋ fo.

¹⁸ Ndien kpukpru owo ekut uyom enyɔŋ; ye obuma, ye uyom ukorowo, ye nte obot ɔwɔrɔde nsuŋikaŋ: ndien adaŋemi kpukpru owo ekutde, mmɔ efiak edem, ekeda nsan-nsan.

¹⁹ Ndien mmɔ edɔhɔ Moses ete, Afo tiŋ nɔ nnyin, nnyin iyekop: edi yak Abasi okudɔhɔ ye nnyin, mbak nnyin idikpaŋa.

²⁰ Ndien Moses ɔdɔhɔ mmɔ ete, Mbufo ekufehe ndik; koro Abasi emedi ndidomo mbufo, man uteŋe esie odu mbufo ke iso ŋko, man mbufo ekunam idiɔk.

²¹ Ndien kpukpru owo eda nsan-nsan, ndien Moses asaŋa ekpere ŋkim-ŋkim ebiet oro Abasi odude do.

²² Ndien Jehovah ɔdɔhɔ Moses, ete, Ntem ke afo edidɔhɔ nditɔ Israel, ete, Mbufo emekut nte ami ntiede ke enyɔŋ ndɔhɔ ye mbufo.

²³ Mbufo ekuda silver enam abasi edian ye ami, ekunyuŋ eda gold enam abasi enɔ idem mbufo.

²⁴ Afo edinam itie-uwa ke ntan-isɔŋ ɔnɔ mi, onyuŋ ada edifɔp uwa fo, ye uwa emem fo, ye ŋkpri ufene fo, ye mme enaŋ fo awa ke esit. Ke kpukpru ebiet eke ndinamde owo eti enyiŋ mi, nyetiene fi do, nnyuŋ ndiɔŋ fi.

²⁵ Edi afo ama oyom ndinam itie-uwa itiat nnɔ mi, kuda edisɔi itiat unam enye: koro ama ada ŋkpɔ usɔ fo otuk enye, afo abiat enye.

²⁶ Kunyuŋ udɔk ke udigukot uka itie uwa mi, mbak edifuhɔre iferi fo ke esit.