EXODUS 16 - Edisana ñwed Abasi Ibom

Abasi Ɔnɔ Nditɔ Israel Ndom Uyo ye Unam

¹ EDIKEM mmɔ edaha ke Elim; ndien ofuri udim nditɔ Israel edisim wilderness Sin, emi odude ke ufɔt Elim ye Sinai, ke ɔyɔhɔ usen efut ke udiana-akpa ɔfiɔŋ, nte mmɔ eketo ke isɔŋ Egypt.

² Ndien ofuri udim nditɔ Israel esuk Moses ye Aaron uyo ke wilderness:

³ nditɔ Israel enyuŋ edɔhɔ mmɔ ete, Akpakam ɔfɔn nnyin ndikpa ke ubɔk Jehovah ke isɔŋ Egypt, ke nnyin iketiede ke ɔtɔ eso unam, inyuŋ idiade udia iyuhɔ! koro mbufo emeda nnyin edi ke wilderness emi, ndiwot ofuri udim owo emi ke biɔŋ.

⁴ Ndien Jehovah ɔdɔhɔ Moses ete, Sese ami mmɔŋ nnam udia oto ke enyɔŋ edep ɔnɔ mbufo; ndien yak kpukpru owo ewɔŋɔ kpukpru usen, ekewobi se ikemde ke usen oro, man ndomo mmɔ, mme mmɔ eyesaŋa ke mbet mi, mme idisaŋake.

⁵ Ndien ama ekem ke ɔyɔhɔ usen itiokiet, mmɔ eyetem se edade edi; ndien enye eyewak utim ikaba akan se ewobide kpukpru usen.

⁶ Ndien Moses ye Aaron edɔhɔ kpukpru nditɔ Israel, ete, Ke mbubreyo ndien mbufo eyefiɔk ete ke Jehovah akada mbufo ɔwɔrɔ ke isɔŋ Egypt:

⁷ ndien ke usenubɔk, mbufo eyekut ubɔŋ Jehovah; koro enye okopde uyo emi mbufo esukde Jehovah; ndien nnyin idi mme anie, eke mbufo esukde nnyin uyo?

⁸ Ndien Moses ɔdɔhɔ ete, (Eyedi ntem) ke ini Jehovah ɔnɔde mbufo unam ke mbubreyo, ete eta, ye uyo ke usenubɔk, ete eyuhɔ: koro Jehovah omokop uyo emi mbufo esukde enye: ndien nnyin idi mme anie? Idige nnyin ke mbufo esuk uyo, edi edi Jehovah.

⁹ Ekem Moses ete Aaron, Dɔhɔ ofuri udim nditɔ Israel, ete, Mbufo esaŋa ekpere ke iso Jehovah: koro enye omokop nsuk uyo mbufo.

¹⁰ Edikem ke ini Aaron osuk ɔdɔhɔde ye ofuri udim nditɔ Israel, mmɔ ewɔŋɔre ese edem wilderness, ndien, sese, ekut ubɔŋ Jehovah ke obubit enyɔŋ oro.

¹¹ Ndien Jehovah ɔdɔhɔ Moses,ete,

¹² Mmokop nsuk-uyo nditɔ Israel; tiŋ nɔ mmɔ ete, Ke adaŋa mbubreyo, mbufo eyeta unam, ndien ke usenubɔk, eyeyuhɔ uyo; ndien mbufo eyefiɔk ete ke ami ndi Jehovah Abasi mbufo.

¹³ Edikem ke mbubreyo, ndien ikukpa ɔdɔk edifuk nna mmɔ: ndien ke usenubɔk mbara ana akan nna okuk.

¹⁴ Ekem adaŋemi mbara oro anade, asatde ama, sese ke iso wilderness mfefere ŋkpɔ nte ŋkpri mkpasip, mfefere nte hoar frost, ke ana ke isɔŋ.

¹⁵ Ndien adaŋemi nditɔ Israel ekutde, mmɔ edɔhɔ kiet ye kiet ete, Emi edi nso? koro mmɔ mifiɔkke se idide. Ndien Moses ete mmɔ, Ke edi udia emi Jehovah ɔnɔde mbufo ete edia.

¹⁶ Emi ke Jehovah owuk ete, Yak kpukpru mbufo ewobi enye nte ediade, omer kiet ke owo kiet, nte ibat ukpɔŋ mbufo edide; yak kpukpru mbufo eda esɔk mmɔ eke edude ke mme tent mbufo.

¹⁷ Ndien nditɔ Israel enam ntre. Ndien mmɔ ewobi, ndusuk ediwak, ndusuk esisit.

¹⁸ Enyuŋ edomo ke omer, ndien andiwobi ediwak isuhɔke, andiwobi esisit inyuŋ inanake; kpukpru owo ewobi nte ediade.

¹⁹ Ndien Moses ɔdɔhɔ mmɔ ete, Yak owo okusuhɔ enye tutu eyo esiere.

²⁰ Edi mmɔ ikopke uyo Moses; edi ndusuk owo esuhɔ enye tutu eyo esiere, ndien enye amak, oduk ndɔŋ: ndien Moses ayat esit ye mmɔ.

²¹ Ntre ke mmɔ ekewobi enye kpukpru usenubɔk kiet kiet nte ediade: ndien ke ini eyo ofiopde, manna atara.

²² Edikem ke ɔyɔhɔ usen itiokiet mmɔ ewobi udia iba, omer iba ke owo kiet: ndien kpukpru mbɔŋ esop edi editiŋ enɔ Moses.

²³ Ndien enye ɔdɔhɔ ete, Emi ke Jehovah ɔkɔdɔhɔ ete, Mkpɔŋ edi nduɔk-odudu edisana sabath Jehovah: mbufo esaŋ se eyomde ndisaŋ, enyuŋ etem se eyomde nditem; ndien eda ofuri nsuhɔ enim enɔ idem mbufo ekpeme tutu eyo esiere.

²⁴ Ntre ke mmɔ enim enye tutu eyo esiere, nte emi Moses okowukde; ndien enye imakke mak, ndɔŋ inyuŋ iduhe ke esit.

²⁵ Ndien Moses ete, Mbufo edia oro mfin emi: koro mfin emi edi sabath Jehovah: mbufo idikwe enye ke isɔŋ mfin emi.

²⁶ Mbufo ewobi enye ke usen itiokiet: edi ama edi ɔyɔhɔ usen itiaba, emi edide sabbath, manna ididuhe ke esit.

²⁷ Edikem ke ɔyɔhɔ usen itiaba, ndusuk owo ewɔŋɔ ete ikowobi, edi ikwe.

²⁸ Ndien Jehovah ɔdɔhɔ Moses ete, Adaŋa didie ke mbufo edisin ndinim mme ewuhɔ mi ye mme mbet mi?

²⁹ Mbufo ese, koro Jehovah ɔnɔde mbufo sabbath, mmɔdo enye ɔnɔde mbufo udia usen iba ke ɔyɔhɔ usen itiokiet; kpukpru mbufo etie ke itie mbufo; owo baba kiet okuwɔrɔ ɔkpɔŋ ɔtɔ esie ke ɔyɔhɔ usen itiaba.

³⁰ Ntre ke mmɔ eduɔk ododu ke ɔyɔhɔ usen itiaba.

³¹ Ndien ufɔk Israel esio ŋkpɔ oro enyiŋ, Manna! enye onyuŋ ebiet mkpasip coriander, afia; inem esie onyuŋ ebiet uyo eke esinde aran-ɔkwɔk.

³² Ndien Moses ɔdɔhɔ ete, Ŋkpɔ emi ke Jehovah okowuk, ete, Mbufo esin enye ke omer eyɔhɔ, enim enɔ mme emana mbufo; kpaŋ mmɔ ekpekut udia emi mbɔkde mbufo ke wilderness, ke ini ŋkadade mbufo nto ke isɔŋ Egypt.

³³ Ndien Moses ɔdɔhɔ Aaron ete, Da eso, da omer domo manna sin ke esit, nyuŋ nim enye ke iso Jehovah, ete ana ɔnɔ mme emana mbufo.

³⁴ Nte emi Jehovah eketemede Moses, kpa ntre ke Aaron onim enye ke iso ŋkpɔ-ntiense, ete ekpeme enye.

³⁵ Ndien nditɔ Israel edia manna oro ke ofuri isua aba, tutu mmɔ esim ke isɔŋ eke owo eduŋde: mmɔ edia manna oro tutu osim ke adaŋa isɔŋ Canaan.

³⁶ Ndien omer duop ekem ye ephah kiet.