EXODUS 15 - Edisana ñwed Abasi Ibom

Nditɔ Israel Ekwɔ Ikwɔ Itoro Enɔ Abasi

¹ NDIEN Moses ye nditɔ Israel ekwɔ ikwɔ emi enɔ Jehovah, enyuŋ edɔhɔ ete, Nyekwɔ nnɔ Jehovah, koro enye okoŋde; enye ekemen horse ye andidoro-horse, ɔduɔk ke inyaŋ.

² Jehovah edi odudu mi ye ikwɔ, omonyuŋ edi erinyaŋa mi: enye edi Abasi mi, ndien nyekpono enye; Abasi ete mi, ndien nyetoro enye.

³ Jehovah edi owo ekɔŋ, Jehovah edi enyiŋ esie.

⁴ Enye ekemen mme chariot Pharaoh ye mme udim esie ɔduɔk ke inyaŋ: akpan mbon-ekɔŋ esie enyuŋ edeŋ ke Ididuot Inyaŋ.

⁵ Akamba mmɔŋ omofuk mmɔ; mmɔ emesuhɔre ke udem nte itiat.

⁶ Ubɔk nnasia fo, O Jehovah omokpon ke odudu: ubɔk nnasia fo, O Jehovah, amanuak mme asua fo mbai-mbai.

⁷ Afo omonyuŋ ada akwa ubom ubɔn fo abiat mmɔ emi eŋwanade ye afo: afo ɔdɔŋ iyaresit fo utom: enye atak mmɔ nte etak nnyanyaŋa.

⁸ Ibifik ibuo fo ŋko ekesin mmɔŋ adahada; mme akpa mmɔŋ eneŋere eda nte ibombom, akamba mmɔŋ abari ke esit inyaŋ.

⁹ Usua ɔdɔhɔ ete, Nyebine; nyesim; nyedeme mbume: mmɔ eyeyuhɔ itɔŋ mi; nyesio ofut mi; ubɔk mi eyesobo mmɔ.

¹⁰ Afo okofri ibifik fo; inyaŋ ofuk mmɔ; mmɔ edeŋ nte ŋket ke mkpɔsɔŋ mmɔŋ.

¹¹ Anie, ke otu mme abasi ebiet fi O Jehovah? Anie ebiet fi, emi okponde ubɔŋ ke edisana ido, emi eteŋede ke itoro, anamde mme utibe ŋkpɔ?

¹² Afo ekemenere ubɔk nnasia fo, isɔŋ emen mmɔ.

¹³ Ima fo esin fi ada ikɔt emi afo akafakde ɔwɔrɔ; ada odudu fo eteme mmɔ usuŋ edisana ebiet fo.

¹⁴ Mme idut eyekop, enyuŋ enyek idem: mbɔribɔ eyemum mme andiduŋ Philistia.

¹⁵ Ndien idem eyekpa mbon Edom; nnyekidem eyemum mkpɔsɔŋ owo Moab: mme andiduŋ Canaan eyeyemere kpukpru.

¹⁶ Ndik ye mbɔribɔ eyefuk mmɔ: akwa ubɔk fo eyesin mmɔ edobo nte itiat, tutu ikɔt fo, O Jehovah, ebe; tutu ikɔt emi afo edepde ebe.

¹⁷ Afo eyeda mmɔ oduk, onyuŋ ɔtɔ mmɔ ke obot emi afo enyenede, ebiet emi afo anamde ete edi iduŋ fo, O Jehovah, edisana ebiet emi ubɔk fo owukde, O Ɔbɔŋ.

¹⁸ JEHOVAH EYEDA UBƆŊ KE NSINSI.

¹⁹ Koro mme horse Pharaoh, ye mme chariot esie, ye mbon horse esie ekedukde ke inyaŋ, ndien Jehovah esin mmɔŋ inyaŋ afiak ofuk mmɔ; edi nditɔ Israel esaŋa ke edisat isɔŋ ke ufɔt inyaŋ ebe.

²⁰ Ndien Miriam prophet aŋwan, eyen-eka Aaron, emen ekɔmɔ ke ubɔk esie; kpukpru iban enyuŋ eda ekɔmɔ etiene enye ke edem ewɔŋɔ, ke enek unek.

²¹ Ndien Miriam ɔbɔrɔ mmɔ, ete, Mbufo ekwɔ enɔ Jehovah, koro enye okoŋde; enye ekemen horse ye andidoro-horse ɔduɔk ke inyaŋ.

²² Ekem Moses ada Israel adaha ke Ididuot Inyaŋ; ndien mmɔ ewɔŋɔ eduk ke wilderness Shur; ndien mmɔ esaŋa usen ita ke wilderness, edi ikwe mmɔŋ.

²³ Ndien adaŋemi mmɔ esimde Marah, mmɔ ikwe nte eŋwɔŋde mmɔŋ Marah, koro odorode: mmɔdo esiode enye Marah.

²⁴ Ndien mmɔ esuk Moses uyo, ete,

²⁵ Nnyin idiŋwɔŋ nso? Ndien enye eseme ɔnɔ Jehovah; ndien Jehovah owut enye eto kiet; ndien enye ada eto oro ɔduɔk ke mmɔŋ oro, ndien mmɔŋ oro akabare enem: do ke Enye ɔnɔ enye ewuhɔ ye item, onyuŋ odomo enye do;

²⁶ onyuŋ ɔdɔhɔ ete, edieke afo editimde okop uyo Jehovah Abasi fo, onyuŋ anamde se inende enye ke enyin, onyuŋ akpaŋde utɔŋ ɔnɔ mbet esie, onyuŋ onimde kpukpru ewuhɔ esie, ndidaha baba udɔŋɔ kiet emi ŋkanamde etiene Egypt, ntiene fi: koro edi ami Jehovah nnam udɔŋɔ okure fi.

²⁷ Edikem mmɔ esim Elim emi idim mmɔŋ duopeba ye eyop ata ye udop edude do: ndien enam nna mmɔ do ke mben mmɔŋ.