EXODUS 14 - Edisana ñwed Abasi Ibom

Nditɔ Israel Esaŋa ke Ididuot Inyaŋ Ebe

¹ NDIEN Jehovah ɔdɔhɔ Moses, ete, Dɔhɔ nditɔ Israel ete,

² Efiak ekena ke iso Pihahiroth, ke ufɔt Migdol ye inyaŋ, ekem ye Baal-zephon; mbufo esak iso ese enye, enam nna ke mben inyaŋ.

³ Ndien Pharaoh eyedɔhɔ abaŋa nditɔ Israel, ete, Mmɔ emekɔmɔ ke isɔŋ wilderness omokui mmɔ abaha.

⁴ Ndien nyesɔŋ Pharaoh esit, ndien enye eyebine mmɔ; ndien nyeda ukpono ke idem Pharaoh, ye ke idem kpukpru mbon-ekɔŋ esie: ndien nditɔ Egypt eyefiɔk ete ke ami ndi Jehovah. Ndien mmɔ enam ntre.

⁵ Ekem, etiŋ enɔ edidem Egypt, ete, ke mbio oro emefeŋe: ndien esit Pharaoh ye eke ikɔt esie akabare asua mmɔ, ndien mmɔ edɔhɔ, ete, Nso ke nnyin ikanam emi iyakde Israel eka, etre ndidi ikɔt nnyin?

⁶ Ndien enye otim chariot esie, onyuŋ ada ikɔt esie adian idem.

⁷ Onyuŋ ada edimek chariot ikie itiokiet, ye kpukpru mme chariot Egypt, mbon-ekɔŋ enyuŋ edoro mmɔ kpukpru.

⁸ Ntre ke Jehovah ɔsɔŋ Pharaoh edidem Egypt esit, ndien enye ebine nditɔ Israel: ndien nditɔ Israel ewɔŋɔ ke edimenere ubɔk.

⁹ Edi nditɔ Egypt, kpukpru mme horse a chariot Pharaoh, ye mbon horse esie, ye mbonekɔŋ esie ebine mmɔ, enyuŋ esim mmɔ nte enade ke mben inyaŋ, ekpere Pi-hahiroth, ekem ye Baal-zephon.

¹⁰ Ekem, ke ini Pharaoh asaŋade ekpere, nditɔ Israel emenere enyin mmɔ, ndien sese, nditɔ Egypt esaŋa ebine mmɔ; ndien ndik anam mmɔ eti-eti: nditɔ Israel enyuŋ eseme enɔ Jehovah.

¹¹ Ndien mmɔ edɔhɔ Moses ete, Ndi koro udi mikoduhe ke Egypt esin afo ada nnyin edi ke wilderness, man nnyin ikpaŋa? Ke nso, ke afo anam ntre ye nnyin, osioŋo nnyin ke Egypt?

¹² Nte emi idige ikɔ oro nnyin ikɔdɔhɔde fi ke Egypt, ite, Kpɔŋ nnyin, man nnyin idi ikɔt nditɔ Egypt? Koro ɔfɔnde ye nnyin nte nnyin idide ikɔt nditɔ Egypt, akan nte idikpaŋade ke wilderness.

¹³ Ndien Moses ɔdɔhɔ kpukpru owo, ete, Mbufo ekufehe ndik, etuak eda, enyuŋ ekut erinyaŋa Jehovah, emi enye edinyaŋade mbufo mfin emi: koro nte emi mbufo ekutde nditɔ Egypt mfin emi, mbufo idikwe aba mmɔ ke nsinsi.

¹⁴ Jehovah eyeŋwana ekɔŋ ɔnɔ mbufo, edi mbufo ekam edop uyo.

¹⁵ Ekem Jehovah ɔdɔhɔ Moses ete, Nso ke afo akam eseseme ɔnɔ mi? Dɔhɔ nditɔ Israel ete, Yak mmɔ eka iso.

¹⁶ Edi afo menere esaŋ fo ke enyɔŋ, nyuŋ, nyanare ubɔk fo ke enyɔn inyaŋ, bahare inyaŋ: ndien nditɔ Israel eyesaŋa ke edisat isɔŋ ke ufɔt inyaŋ ebe.

¹⁷ Ndien se mi, ami nyesɔŋ nditɔ Egypt esit, ndien mmɔ eyebine mmɔ: ndien ami nyeda Pharaoh ukpono ke idem, ye ke idem kpukpru mbon-ekɔŋ esie, ye chariot esie, ye ke mbon horse esie.

¹⁸ Ndien nditɔ Egypt eyefiɔk ete ke ami ndi Jehovah, ke ini ndidade ukpono ke idem Pharaoh ye idem mme chariot esie, ye ke mbon horse esie.

¹⁹ Ekem, angel Abasi emi ebemde mme udim Israel iso, oto aka akasaŋa mmɔ ke edem; ndien adaha obubit enyɔŋ oro onyuŋ oto mmɔ ke iso, aka akada mmɔ ke edem.

²⁰ Ndien enye ediduk ke ufɔt nna nditɔ Egypt ye nna Israel; ndien akabare edi idiɔk enyɔŋ ye ekim ɔnɔ mmɔ, edi aŋwaŋa okoneyo ɔnɔ mmɔ eken: kiet inyuŋ isaŋake ikpere kiet ke ofuri okoneyo oro.

²¹ Ndien Moses emenere ubɔk esie ke enyɔŋ inyaŋ; ndien Jehovah anam inyaŋ asaŋa ke ofim ikɔrabak, ke ofuri okoneyo oro, onyuŋ esin inyaŋ asat, ndien mmɔŋ abahare.

²² Ndien nditɔ Israel esaŋa ke edisat isɔŋ ke ufɔt inyaŋ ebe ndien mmɔŋ ada mmɔ nte ibibene ke ubɔk nnasia, ye ke ubɔk ufien.

²³ Ndien nditɔ Egypt, kpa kpukpru mme horse Pharaoh, ye mme chariot esie, ye mbon horse esie ebine mmɔ eduk ke ufɔt inyaŋ.

²⁴ Edikem, ke ŋkim-ŋwaŋa usenubɔk Jehovah etie ke adaha ikaŋ ye eke obubit enyɔŋ, ese mme udim nditɔ Egypt, onyuŋ etimere mme udim nditɔ Egypt:

²⁵ onyuŋ osioŋo mme wheel chariot mmɔ, onyuŋ anam mmɔ esaŋa nuɔn-nuɔn: ndien nditɔ Egypt edɔhɔ ete, Yak nnyin ifehe ikpɔŋ Israel; koro Jehovah aŋwaŋade ekɔŋ ye nditɔ Egypt ɔnɔ mmɔ.

²⁶ Ekem, Jehovah ɔdɔhɔ Moses, ete, Menere ubɔk fo ke enyɔŋ inyaŋ, ndien mmɔŋ eyefiak ofuk nditɔ Egypt, ye mme chariot mmɔ, ye mbon horse mmɔ.

²⁷ Ndien Moses emenere ubɔk esie ke enyɔŋ inyaŋ, ndien, ke akade ke usiere, inyaŋ afiak ɔyɔhɔ nte akam esiyɔhɔde; ndien nditɔ Egypt efeŋe ekesobo ye enye; ndien Jehovah otimere nditɔ Egypt ke ufɔt inyaŋ.

²⁸ Ndien mmɔŋ afiak okofuk mme chariot, ye mbon horse, ye ofuri udim-ekɔŋ Pharaoh emi ekebinede mmɔ eduk ke ufɔt inyaŋ: baba owo mmɔ ndomo kiet isukke.

²⁹ Edi nditɔ Israel esaŋa ke edisat isɔŋ ke ufɔt inyaŋ ebe; mmɔŋ onyuŋ ada mmɔ nte ibibene ke ubɔk nnasia ye ke ubɔk ufien.

³⁰ Ntem ke Jehovah anyaŋa nditɔ Israel osio ke ubɔk nditɔ Egypt, ke usen oro; ndien Israel okut mme okpo nditɔ Egypt enade ke mben inyaŋ.

³¹ Ndien Israel enyuŋ ekut ɔkpɔsɔŋ ubɔk oro Jehovah adade anam nditɔ Egypt: Kpukpru owo enyuŋ ebak Jehovah, enyuŋ enim uyo Jehovah ke akpanikɔ, ye eke owo esie Moses.