EXODUS 11 - Edisana ñwed Abasi Ibom

Moses Oduri Nditɔ Israel Utɔŋ Abaŋa Mme Akpan Emi Edikpaŋade

¹ NDIEN Jehovah ɔdɔhɔ Moses ete, Nyeda ufen kiet efen kaŋa nnɔ Pharaoh ye Egypt; emi ama ebe, enye eyeyak mbufo edaŋa ke ɔtɔ emi; ke ini enye ediyakde mbufo ama, enye eyebin mbufo ke ɔtɔ emi efep.

² Tiŋ ndien ke utɔŋ mbio oro, ete, Yak eren ebeŋe mbɔhiduŋ esie eren, yak ŋwan onyuŋ ebeŋe mbɔhiduŋ esie aŋwan, ŋkpɔ silver ye ŋkpɔ gold.

³ Ndien Jehovah esin nditɔ Egypt enen iso ye mbio oro. Moses oro onyuŋ okpon eti-eti ke isɔŋ Egypt, ke enyin ikɔt Pharaoh, ye ke enyin mbio-obio.

⁴ Ndien Moses ete, Ntem ke Jehovah ɔdɔhɔ, ete, Ke ufɔt okoneyo emi, ami nyewɔrɔ nduk ke ufɔt Egypt;

⁵ ndien kpukpru akpan ke isɔŋ Egypt eyekpaŋa, ɔtɔnɔde ke akpan Pharaoh emi etiede ke ebekpo esie, tutu osim akpan ofin aŋwan eke etiede ke edem itiat-ɔkɔk; ye kpukpru akpa nditɔ ufene ŋko.

⁶ Akwa ntuaŋa eyenyuŋ odu ke ofuri isɔŋ Egypt, eke akanam oruk oro mikoduhe, oruk oro idinyuŋ iduhe tutu amama.

⁷ Edi baba ebua kiet iditopke edeme esie ise baba eyen Israel kiet, ke owo ye ke ufene; man mbufo efiɔk nte Jehovah adianarede nditɔ Egypt ye Israel.

⁸ Ndien kpukpru mme mmɔ emi ikɔt fo eyesuhɔre etiene mi, enyuŋ enuhɔ enɔ mi, ete, Wɔrɔ, afo ye kpukpru mbio emi esaŋade ye afo; ndien ke ŋkpɔ emi ebede, nyewɔrɔ. Ndien enye ɔwɔrɔ ɔkpɔŋ Pharaoh ke akwa ikpahesit.

⁹ Ndien Jehovah ɔdɔhɔ Moses, ete, Pharaoh idikopke inɔ mbufo; man mme utibe ŋkpɔ mi ewak ke isɔŋ Egypt.

¹⁰ Ntre ke Moses ye Aaron enam kpukpru mme utibe ŋkpɔ emi ke iso Pharaoh: ndien Jehovah ɔsɔŋ Pharaoh esit, ndien enye iyakke nditɔ Israel edaŋa ke isɔŋ esie.