ERIYARARE 8 - Edisana ñwed Abasi Ibom

Ɔyɔhɔ Ufik-Ŋkpɔ Itiaba ye Ukorowo Itiaba

¹ KE adaŋemi Enye ama akadianare ɔyɔhɔ ufik-ŋkpɔ itiaba, ndobo odu ke heaven ke adaŋa ubak hour kiet.

² Ndien ŋkut angel itiaba emi edade ke iso Abasi; ndien ekenɔ mmɔ ukorowo itiaba.

³ Angel efen edi edida ekpere itie-uwa enyene ŋkpɔ-ufɔp-incense o-gold; ema enyuŋ enɔ enye ekese incense, ete ada adian ye akam kpukpru ikɔt Abasi ke itie uwa o-gold emi odude ke iso ebekpo.

⁴ Ndien nsuŋ ikaŋ incense ye akam ikɔt Abasi eto ke ubɔk angel oro edɔk edi ke iso Abasi.

⁵ Angel oro onyuŋ emen ŋkpɔ-ufɔp-incense esin ikaŋ itie-uwa ke esit ɔyɔhɔ, onyuŋ aŋwaŋa ɔduɔk ke isɔŋ; ndien obuma, ye mme uyo, ye emireŋ-mireŋ, ye unyek-isɔŋ, etibe.

⁶ Ekem mme angel itiaba oro enyenede ukorowo itiaba ebeŋe idem ndifri.

⁷ Akpa angel ofri; ndien edim-itiat ye ikaŋ, eke abuahade ye iyip, etibe, enyuŋ eŋwaŋa mmɔ eduɔk ke isɔŋ; ndien ikaŋ ata ubak isɔŋ kiet ke itie ita, onyuŋ ata ubak eto kiet ke itie ita, onyuŋ ata ofuri awawa mbiet.

⁸ Ekem udiana angel ofri; ndien emen se ibietede akamba obot eke asakde ikaŋ, eduɔk ke inyaŋ;

⁹ ndien ubak inyaŋ kiet ke itie ita akabare edi iyip; ubak ŋkpɔ kiet ke itie ita eke edude ke inyaŋ, kpa ŋkpɔ eke enyenede uwem, enyuŋ ekpaŋa; enyuŋ ebiat ubak mme ubom kiet ke itie ita.

¹⁰ Ekem ɔyɔhɔ angel ita ofri; akamba ntantafiɔŋ, emi asakde nte nsaraŋ ikaŋ, oto ke enyɔŋ ediduɔ; ɔduɔ ke ubak akpa kiet ke itie ita ye ke idim-mmɔŋ.

¹¹ Enyiŋ ntantafiɔŋ oro ekere Etidot. Ndien ubak mmɔŋ kiet ke itie ita akabare etidot, ediwak owo enyuŋ ekpaŋa oto ke mmɔŋ oro, koro enamde enye odoro.

¹² Ekem ɔyɔhɔ angel inaŋ ofri; ndien emia ubak utin kiet ke itie ita, ye ubak ɔfiɔŋ kiet ke itie ita, ye ubak ntantafiɔŋ kiet ke itie ita; ete mmɔ ekabare ebire ke ubak mmɔ kiet ke itie ita, uwemeyo okunyene uŋwana ke ubak kiet ke itie ita, onyuŋ edi kpa ntre ye okoneyo.

¹³ Ndien ŋkut, nnyuŋ ŋkop nte ntrukpom, eke efede ke ufɔt-iba enyɔŋ ɔdɔhɔ ke ɔkpɔsɔŋ uyo ete, Mbɔm, mbɔm, mbɔm ɔnɔ mme andiduŋ ke isɔŋ, ke ntak mme uyo ukorowo efen eke mme angel ita eken edifride.