ERIYARARE 5 - Edisana ñwed Abasi Ibom

Lion Esien Judah Odot Ndikubɔre Ŋwed Nnyuŋ Ndianare Mme Ufik-Ŋkpɔ Esie

¹ NDIEN ŋkut ŋwed ke ubɔk nnasia Anditie ke ebekpo, emi ewetde ŋkpɔ ke esit-esit ye ke edem-edem; ema enyuŋ eda ufik-ŋkpɔ itiaba esɔŋɔ edian enye.

² Ndien ŋkut ɔkpɔsɔŋ angel nte ɔkwɔrɔde ke ɔkpɔsɔŋ uyo, ete, Anie omodot ndikibɔre ŋwed emi, ndinyuŋ ndianare mme ufik-ŋkpɔ esie?

³ Ndien baba owo kiet ke heaven, ye ke isɔŋ, ye ke idak isɔŋ, ikemeke ndikibɔre ŋwed oro nnyuŋ nse ke esit.

⁴ Ndien ntua eyet eti-eti, koro mikwe baba owo kiet eke odotde ndikibɔre ŋwed nnyuŋ nse ke esit.

⁵ Edi kiet ke otu mbiowo ɔdɔhɔ mi ete, Kutua; sese, Lion emi otode ke esien Judah, kpa Oruŋ David, amakan, adaŋa nte enyenede ukeme ndikibɔre ŋwed oro nnyuŋ ndianare mme ufik-ŋkpɔ itiaba.

⁶ Ndien ŋkut ke ufɔt ebekpo, ye ke ufɔt ŋkpɔ-uwem inaŋ, ye ke ufɔt mbiowo, Eyen-erɔŋ adade do, nte ŋkpɔ eke ekewotde Enye; Enye onyuŋ enyene nduk itiaba ye enyin itiaba, emi edide mme Spirit Abasi itiaba, emi esiode edɔŋ ke ofuri isɔŋ.

⁷ Ndien Enye edi edibɔ ŋwed ke ubɔk nnasia Anditie ke ebekpo.

⁸ Ekem ke adaŋemi Enye ɔkɔbɔde ŋwed, ŋkpɔ-uwem inaŋ, ye mbiowo edip ye inaŋ oro eduɔŋɔ ke iso Eyen-erɔŋ; mmɔ kiet kiet enyene harp ye eso o-gold, emi eyɔhɔde ye incense, emi edide mme akam nti ikɔt Abasi.

⁹ Ndien mmɔ ekwɔ obufa ikwɔ ete, Afo omodot ndida ŋwed, ndinyuŋ ndianare mme ufik-ŋkpɔ esie; koro ekewotde Fi, Afo ama onyuŋ ada iyip fo osio owo ke kpukpru esien, ye usem, ye obio, ye idut, afak mmɔ ɔnɔ Abasi;

¹⁰ omonyuŋ anam mmɔ edi Obio Ubɔŋ ye mme oku enɔ Abasi: mmɔ eyenyuŋ eda ubɔŋ ke isɔŋ.

¹¹ Ndien ŋkut nnyuŋ ŋkop uyo ediwak angel, emi ekande ebekpo ye ŋkpɔ-uwem ye mbiowo ekuk; ibat mmɔ osim thousand duop ke itie thousand duop ye mme thousand ke itie thousand;

¹² mmɔ enyuŋ edɔhɔ ke ɔkpɔsɔŋ uyo, ete, Eyen-erɔŋ emi ekewotde omodot ndibɔ odudu, ye inyene, ye ifiɔk, ye ukeme, ye ukpono, ye ubɔŋ, ye eridiɔŋ.

¹³ Ndien ŋkop kpukpru ŋkpɔ emi ekebotde, emi edude ke heaven, ye ke isɔŋ, ye ke idak isɔŋ, ye ke inyaŋ, ye kpukpru ŋkpɔ eke edude mmɔ ke esit, nte edɔhɔde ete, Yak eridiɔŋ, ye ukpono, ye ubɔŋ, ye erikara ofuri ekondo, enyene Enye emi etiede ke ebekpo, enyuŋ enyene Eyen-erɔŋ ke nsinsi-nsinsi.

¹⁴ Ndien ŋkpɔ-uwem inaŋ oro edɔhɔ ete, Amen. Mbiowo enyuŋ eduɔŋɔ ke isɔŋ, etuak ibuot.