ERIYARARE 4 - Edisana ñwed Abasi Ibom

Ebekpo Abasi ye Ntuahibuot ke Ebekpo

¹ KE ŋkpɔ emi ema ekebe, ŋkut, ndien sese, inua-otop eberere ke heaven; ndien akpa uyo eke ŋkokopde, nte ukorowo osiorode uyo ke utɔŋ mi, ete, Dɔk di ken, ndien nyewut fi se idisude ke ini emi edidide.

² Idaha oro ŋkabare ndu ke Spirit; ndien sese, ebekpo ɔdiɔhɔ ke heaven, Anditie ke ebekpo onyuŋ odu.

³ Anditie ke ebekpo oro onyuŋ ebiet itiat jasper ye sardius ke enyin; akpara onyuŋ akan ebekpo okuk, ebiet emerald ke enyin.

⁴ Ebekpo edip ye inaŋ enyuŋ ekan ebekpo oro ekuk; ndien ke mme ebekpo oro mbiowo edip ye inaŋ etie, esine mfia ɔfɔŋidem, enyuŋ eyara anyanya o-gold ke ibuot mmɔ.

⁵ Emireŋ-mireŋ ye mme uyo ye obuma enyuŋ eto ke ebekpo ewɔŋɔ; utuenikaŋ itiaba eke ikaŋ ke esasak ke iso ebekpo, emi edide mme Spirit Abasi itiaba.

⁶ Ndien ke iso ebekpo se itiede nte inyaŋ a-glass odu, ebiet crystal. Ndien ke ufɔt ebekpo ye ke ŋkan-ŋkuk ebekpo ŋkpɔ-uwem inaŋ edu, emi enyin ɔyɔhɔde mmɔ idem ke iso-iso ye ke edem-edem.

⁷ Akpa ŋkpɔ-uwem ebiet lion, udiana ŋkpɔ-uwem ebiet eyenenaŋ, ɔyɔhɔ ŋkpɔ-uwem ita enyene iso nte eke owo, ɔyɔhɔ ŋkpɔ-uwem inaŋ ebiet nturukpom eke efede.

⁸ Ndien ŋkpɔ-uwem inaŋ oro enyene mba itiokiet, emi enyin eyɔhɔde mmɔ ke enyɔŋ ye ke esit. Mmɔ inyuŋ inyeneke nduɔk-odudu ke uwem-eyo ye ke okoneyo, esuk edɔdɔhɔ ete, Edisana, edisana, edisana, Jehovah Abasi, Andikara kpukpru ŋkpɔ. Enye emi okodude-du, emi onyuŋ odude-du, emi edinyuŋ edide.

⁹ Ndien ke adaŋemi ŋkpɔ-uwem edimende ubɔŋ ye ukpono ye ekɔm enɔ Anditie ke ebekpo, kpa

¹⁰ Andidu-uwem ke nsinsi-nsinsi, mbiowo edip ye inaŋ oro eyeduɔŋɔ ke isɔŋ ke iso Anditie ke ebekpo, etuak ibuot enɔ Andidu-uwem ke nsinsi-nsinsi, enyuŋ eyak anyanya mmɔ eduɔŋɔ ke iso ebekpo, ete,

¹¹ Ɔbɔŋ ye Abasi nnyin, Afo omodot ndibɔ ubɔŋ ye ukpono ye odudu, koro Afo okobotde kpukpru ŋkpɔ; ndien oto uduak Fo ke mmɔ edu, ekenyuŋ eboro.