ERIYARARE 22 - Edisana ñwed Abasi Ibom

Ibighike Jesus Eyefiak Edi

¹ EKEM angel owut mi akpa mmɔŋ uwem, emi asakde nte crystal, emi otode ke ebekpo Abasi ye eke Eyen-erɔŋ, asaŋa ebe ke ufɔt efak obio.

² Eto uwem ada ke ŋkaŋ akpa emi ye ke ŋkaŋ oko, oŋwum oruk mfri duopeba, oŋwum mfri esie ke ɔfiɔŋ ke ɔfiɔŋ, enyuŋ eda ikɔŋ eto oro ekɔk mme idut udɔŋɔ.

³ Ŋkpɔ nsobo idinyuŋ iduhe aba; ebekpo Abasi ye eke Eyen-erɔŋ eyenyuŋ odu do; ikɔt Esie eyenyuŋ enam ŋkpɔ enɔ Enye;

⁴ mmɔ eyenyuŋ ekut iso Esie;

⁵ enyiŋ Esie eyenyuŋ odu mmɔ ke ɔkpɔ-iso. Okoneyo idinyuŋ iduhe aba; mmɔ inyuŋ iyomke uŋwana utuen-ikaŋ mme uŋwana utin; koro Ɔbɔŋ Abasi mmɔ eyenɔ mmɔ uŋwana, ndien mmɔ eyeda ubɔŋ ke nsinsi-nsinsi.

⁶ Angel oro onyuŋ ɔdɔhɔ mi ete, Ikɔ emi edi akpanikɔ eke owo okponimde. Ndien Ɔbɔŋ, emi edide Abasi spirit mme prophet, ɔkɔdɔŋ angel ediwut ikɔt esie se iditibede ke ekpri ibio ini.

⁷ Sese, mmɔŋ ndedi idaha emi. Ɔfɔfɔn ɔnɔ owo eke onimde ikɔ prophecy ŋwed emi.

⁸ Ami John ndi andikop ye andikut mme ŋkpɔ emi. Ndien ke ini ŋkopde nnyuŋ ŋkutde, nduɔ ke isɔŋ nte ntuak ibuot ke ukot angel emi owutde mi ŋkpɔ emi.

⁹ Edi enye ɔdɔhɔ mi ete, Kunam: ndi asaŋutom ye afo ye nditɔ-ete fo mme prophet, ye mmɔ emi enimde ikɔ ŋwed emi. Tuak ibuot nɔ Abasi.

¹⁰ Enye onyuŋ ɔdɔhɔ mi ete, Kudian ikɔ prophecy ŋwed emi, udip, umen, unim; koro ini ke ekpere.

¹¹ Owo eke edide ukwaŋ, yak enye osuk amana anam ukwaŋido; owo eke edehede, yak enye osuk amana edehe; owo eke edide edinen, yak enye osuk amana anam edinen ido; owo eke asanade, yak enye osuk amana asana.

¹² Sese, mmɔŋ ndedi idaha emi; nnyuŋ nsaŋa ye utip Mi, ndinɔ kpukpru owo nte ekemde ye ubɔk-utom esie.

¹³ Ami ndi Alpha ye Omega, mbemiso ye akpatre, ntɔŋɔ ye utit.

¹⁴ Ɔfɔfɔn ɔnɔ mmɔ eke eyetde ɔfɔŋidem mmɔ asana, man mmɔ ekpenyene unen ndisim eto uwem, ekpenyuŋ ebe ke inua-otop eduk ke esit obio.

¹⁵ Mme ebua edu ke edem obio, ye mme abia idiɔŋ, ye mbon use, ye mme owot owo, ye mme okpono ndem, ye kpukpru owo eke emade nsu, enyuŋ esude nsu.

¹⁶ Ami Jesus ŋkɔdɔŋ angel Mi edisian fi ikɔ emi, man ada ɔnɔ mme ufɔk Abasi. Ami ndi Oruŋ ye Eyen David, ediyama ntantafiɔŋ usenubɔk.

¹⁷ Spirit ye ŋwan-ndɔ edɔhɔ ete, Di. Owo eke onyuŋ okopde, yak enye ɔdɔhɔ ete, Di. Owo eke itɔŋ asatde, yak enye edi. Owo eke amade, yak edi edibɔ mmɔŋ uwem ke ikpikpu.

¹⁸ Mmɔsɔŋɔ ndɔhɔ kpukpru owo eke ekopde ikɔ prophecy ŋwed emi nte, Edieke owo ɔkɔrɔde ŋkpɔ kiet ke esit, Abasi eyekɔrɔ mme ufen eke ewetde ke ŋwed emi ɔnɔ enye;

¹⁹ ndien edieke owo osiode ŋkpɔ ke ikɔ prophecy ŋwed emi, Abasi eyesio enye udeme ke eto uwem efep, ye ke edisana obio, kpa ŋkpɔ emi ewetde ke ŋwed emi.

²⁰ Anditiŋ ikɔ emi ete, Ke akpanikɔ, mmɔŋ ndedi iwiwa. Amen. Di, Ɔbɔŋ Jesus.

²¹ Mfɔn Ɔbɔŋ Jesus akpakam odu ye kpukpru ikɔt Abasi.