ERIYARARE 2 - Edisana ñwed Abasi Ibom

Etop Enɔde Esɔk Ufɔk-Abasi ke Ephesus, Smyrna, Pergamos ye Thyatira

¹ NƆ ŋwed esɔk angel ufɔk Abasi emi edude ke Ephesus, ete: Ntem ke Enye, emi omumde ntantafiɔŋ itiaba akama ke ubɔk nnasia Esie, onyuŋ asaŋade ke ufɔt udiɔk-utuenikaŋ o-gold itiaba, ɔdɔhɔ ete,

² Mmɔfiɔk mme utom fo, ye ɔkpɔsɔŋ eŋwan, ye ime fo; mmonyuŋ mfiɔk nte ukemeke ndibiom mme idiɔk owo, okonyuŋ odomo mmɔ emi ekotde idem mme apostle, ndien midige, okonyuŋ ayarare ɔfiɔk ete mmɔ edi mme osu-nsu;

³ omonyuŋ enyene ime, okonyuŋ obiom ukut kabaŋa enyiŋ Mi, unyuŋ ukabakere ukpa mba.

⁴ Edi mmenyene se ndade mbiom fi, emi ɔkɔkpɔŋde akpa ima fo.

⁵ Mmɔdo ti itie emi ɔkɔduɔde ɔkpɔŋ, nyuŋ kabare esit, nyuŋ nam se akanamde ke akpa; midige ntre, mmɔŋ ndi ke ɔtɔ fo, nyenyuŋ mmen udiɔk-utuenikaŋ mfep ke itie esie, ke afo mukabakere esit.

⁶ Edi emenyene emi, ete asasua utom mme Nicolaitan, emi Ami nde nsuade.

⁷ Yak owo eke enyenede utɔŋ okop se Spirit ɔdɔhɔde mme ufɔk Abasi. Owo eke akande, nyenɔ enye ndidia mfri eto uwem, emi odude ke Paradise Abasi.

⁸ Nyuŋ nɔ ŋwed esɔk angel ufɔk Abasi emi odude ke Smyrna, ete: Ntem ke Enye emi edide Mbemiso ye Akpatre, emi akakabarede akpa-mkpa, edi osuk odude uwem, ɔdɔhɔ ete,

⁹ Mmɔfiɔk ukut ye ubuene fo (edi emenyene inyene) ye isuŋi emi ɔbɔde ke ubɔk mmɔ emi edɔhɔde ete idi mme Jew, minyuŋ idige, edi edi synagogue Satan.

¹⁰ Kunyene ndik ubaŋa ukut eke ɔmɔŋ edisim fi. Sese, Satan ɔmɔŋ edisin ndusuk mbufo ke ufɔk-ŋkpɔkɔbi, man edomo mbufo ese, ndien mbufo eyekut ukut ke usen duop. Wut idem nte anam-akpanikɔ tutu osim mkpa, ndien nyenɔ fi anyanya uwem.

¹¹ Yak owo eke enyenede utɔŋ okop se Spirit ɔdɔhɔde mme ufɔk Abasi. Owo eke akande, udiana-akpa mkpa idifiomoke enye.

¹² Nyuŋ nɔ ŋwed esɔk angel ufɔk Abasi emi odude ke Pergamum, ete: Ntem ke Enye emi enyenede edisɔp ofut iso iba ɔdɔhɔ ete,

¹³ Mmɔfiɔk ebiet eke oduŋde do; kpa ebiet eke ebekpo Satan ɔdiɔhɔde; ndien ɔmɔsɔŋɔ omum enyiŋ Mi akama, ukonyuŋ ukaŋke mbuɔtidem Mi, kpa ke mme usen ntiense Mi Antipas, owo akpanikɔ Mi, emi ekowotde ke otu mbufo, ke ebiet oro Satan oduŋde.

¹⁴ Edi mmenyene ndusuk ŋkpɔ eke ndade mbiom fi, ete, emenyene ndusuk owo do eke emumde ukpep-ŋkpɔ Balaam ekama, emi ekekpepde Balak ndinim ŋkpɔ-iduɔ ke iso nditɔ Israel, ete edia se ekewade enɔ ndem, enyuŋ enam use:

¹⁵ ntre ŋko emenyene ndusuk owo eke emumde ukpep-ŋkpɔ mme Nicolaitan kpasuk ke ido oro ekama.

¹⁶ Kabare esit ndien; midige ntre, nsɔsɔp ndi ke ɔtɔ fo, nyenyuŋ nda ofut inua Mi ŋwana ekɔŋ ye mmɔ.

¹⁷ Yak owo eke enyenede utɔŋ okop se Spirit ɔdɔhɔde mme ufɔk Abasi. Owo eke akande, nyesio ndibe manna nnɔ enye adia, nyenyuŋ nnɔ enye afia itiat, emi ewetde obufa enyiŋ ke esit, eke baba owo kiet mifiɔkke, ke mibɔhɔke andibɔ.

¹⁸ Nyuŋ nɔ ŋwed esɔk angel ufɔk Abasi emi odude ke Thyatira, ete: Ntem ke eyen Abasi, emi enyin Esie ebietde edeme-ikaŋ, ukot Esie enyuŋ ebietde nsak-nsak okpohɔ, ɔdɔhɔ ete,

¹⁹ Mmɔfiɔk mme utom fo, ima ye mbuɔtidem fo, ye se anamde ɔnɔ Mi, ye anyan ime fo; mmonyuŋ mfiɔk nte ukperedem utom fo okpon akan akpa.

²⁰ Edi mmenyene se ndade mbiom fi, ete, ayak itie ɔnɔ ŋwan oro, Jezebel, emi okotde idem prophet-aŋwan; onyuŋ adade abiaŋa ekpep ikɔt Mi ndinam use, nnyuŋ ndia se ekewade enɔ ndem.

²¹ Ndien mmɔnɔ enye ifet ndikabare esit, ndien enye inyimeke ndikabare ŋkpɔŋ use esie.

²² Sese, mmemen enye nduɔk ke nna udɔŋɔ, nnyuŋ nsin mmɔ eke esinde efibe ye enye ke akwa ukut, edieke mmɔ midikabare ikpɔŋ mme utom esie;

²³ nyenyuŋ nda mkpa ŋwot nditɔ esie; ndien kpukpru mme ufɔk Abasi eyefiɔk ete ke Ami ndi Andiduŋɔre ekput ye esit; nyenyuŋ nnɔ kpukpru mbufo kiet kiet nte ekemde ye utom mbufo.

²⁴ Edi ama edi mbufo eken emi edude ke Thyatira, kpa kpukpru mbufo emi midaha ukpep-ŋkpɔ oro, minyuŋ ifiɔkke udem Satan, nte mmɔ edɔhɔde, ndɔhɔ mbufo ntem nte, Mmenke mbiomo eŋwen mbiom mbufo ke idem;

²⁵ esɔŋɔ emum se mbufo enyenede ekama tutu ndi.

²⁶ Owo eke akande, onyuŋ anamde mme utom Mi tutu osim utit,

²⁷ nyenɔ enye odudu ndikara mme idut; ndien enye eyeda esaŋ ukwak akara mmɔ, nte emi ebomde eso obot-eso mbai-mbai: kpa nte Ami nde ŋkɔbɔde ke ubɔk Ete Mi.

²⁸ Ndien nyenɔ enye ntantafiɔŋ usenubɔk.

²⁹ Yak owo eke enyenede utɔŋ okop se Spirit ɔdɔhɔde mme ufɔk Abasi.