ERIYARARE 19 - Edisana ñwed Abasi Ibom

Akwa Otu Owo Ke Enyɔŋ Etoro Abasi

¹ KE ŋkpɔ emi ema ekebe, ŋkop se ibietde uyo akwa otu owo nte ɔdɔhɔde ke heaven, ete, Hallelujah; Erinyaŋa, ye ubɔŋ, ye ukeme enyene Abasi nnyin:

² koro mme ikpe Esie edi ata akpanikɔ enyuŋ enen; koro Enye ama ebiere ikpe akwa akpara, emi akadade use esie abiat isɔŋ, Enye onyuŋ ada usiene iyip ikɔt Esie odori enye ke ibuot.

³ Mmɔ enyuŋ etɔŋɔ ntak edɔhɔ ete, Hallelujah. Nsuŋikaŋ nsobo esie ke ɔdɔdɔk ke nsinsi-nsinsi.

⁴ Ekem mbiowo edip ye inaŋ ye ŋkpɔ-uwem inaŋ oro eduɔ ke isɔŋ etuak ibuot enɔ Abasi emi etiede ke ebekpo, ete, Amen; Hallelujah.

⁵ Uyo onyuŋ oto ke ebekpo ɔwɔrɔ ete, Etoro Abasi nnyin, kpukpru mbufo ikɔt Esie, Emi eteŋede Enye, ŋkpri ye ikpo.

⁶ Ndien ŋkop uyo emi ebietde mkpo akwa otu, ye uyom uwak mbufut, ye uyom ɔkpɔsɔŋ obuma ɔdɔhɔde ete, Hallelujah; koro Ɔbɔŋ Abasi nnyin, Andikara kpukpru ŋkpɔ, ada ubɔŋ.

⁷ Eyak nnyin idara inyuŋ idat esit, inyuŋ inɔ Enye ubɔŋ; Koro ekem ini ndɔ Eyenerɔŋ, Ŋwan Esie otim idem ebeŋe Enye;

⁸ Enyuŋ enɔ enye ndisine ediye linen eke asanade onyuŋ esemde; Koro ediye linen oro edi edinen ido nti ikɔt Abasi.

⁹ Angel onyuŋ ɔdɔhɔ mi ete, Ɔfɔnfɔn ɔnɔ mmɔ emi ekekotde edi udia ndɔ Eyen-erɔŋ. Enye onyuŋ ɔdɔhɔ mi ete, Ikɔ emi edi ata ikɔ Abasi.

¹⁰ Ndien nduɔ Enye ke ukot, nte ntuak ibuot nnɔ enye. Edi enye ɔdɔhɔ mi ete, Kunam: ndi asaŋutom ye afo ye nditɔ-ete fo emi enyenede ikɔ-ntiense Jesus: tuak ibuot nɔ Abasi. Koro ikɔ-ntiense Jesus edi spirit prophecy.

¹¹ Ekem ŋkut nte ebererede heaven; ndien sese, afia enaŋ-mbakara, Andidoro enye ke edem ekere Anam-akpanikɔ ye Ata Akpanikɔ, Enye onyuŋ asaŋa ke edinen ido ekpe ikpe onyuŋ aŋwana ekɔŋ.

¹² Enyin Esie ebiet edeme-ikaŋ, Enye onyuŋ ayara ediwak anyanya ke ibuot; enyuŋ ewet enyiŋ esin Enye ke idem, eke baba owo kiet mifiɔkke, ke mibɔhɔke Enye ke Idem Esie.

¹³ Enye onyuŋ esine ɔfɔŋidem emi ekedebide ke iyip: enyiŋ Esie onyuŋ ekere IKƆ ABASI.

¹⁴ Ndien udim ekɔŋ emi edude ke heaven edoro ke mfia enaŋ-mbakara etiene Enye ke edem, mmɔ esine ediye linen emi afiade onyuŋ asanade.

¹⁵ Edisɔp ofut onyuŋ oto Enye ke inua ɔwɔrɔ, man Enye ada ekpeŋe mme idut; Enye eyenyuŋ ada esaŋ ukwak akara mmɔ. Enye onyuŋ edigi obube udigi-wine ikaŋ-ikaŋ iyaresit Abasi Andikara kpukpru ŋkpɔ.

¹⁶ Enye onyuŋ enyene enyiŋ emi ewetde ke ɔfɔŋ-idem Esie ye ke ifuhi Esie ete, EDIDEM NDIDEM YE ƆBƆŊ MBƆŊ.

¹⁷ Ekem ŋkut angel kiet nte adade ke utin; ndien enye ofiori ke ɔkpɔsɔŋ uyo okot kpukpru mme inuen eke efede ke ufɔt ikpa-enyɔŋ, ete, Edi ediboho ɔtɔ kiet, man edia akamba udia Abasi;

¹⁸ man eta obuk ndidem, ye obuk mme etubom-ekɔŋ, ye obuk mkpɔsɔŋ owo, ye obuk enaŋ-mbakara, ye eke mme andidoro mmɔ ke edem, ye obuk kpukpru owo, nditɔ ye ifin, ŋkpri ye ikpɔ.

¹⁹ Ekem ŋkut unam oro, ye ndidem isɔŋ, ye mbon-ekɔŋ mmɔ, nte esopde idem ɔtɔ kiet ndiŋwana ekɔŋ ye Andidoro ke enaŋ-mbakara ye mbon-ekɔŋ Esie.

²⁰ Ndien emum unam oro, enyuŋ emum prophet nsu emi adade ke iso esie anam mme idiɔŋɔ, eke enye adade abiaŋa mmɔ emi ekebɔde idiɔŋɔ unam oro, ye mmɔ emi etuakde ibuot enɔ mbiet esie. Etop mmɔ mbiba ye uwem esin ke inyaŋ ikaŋ emi asakde ye mbrimstone.

²¹ Ama edi mmɔ eken emi esuhɔde, ewot mmɔ ke ofut Andidoro ke edem enaŋ-mbakara, kpa ofut oro ɔwɔrɔde Enye ke inua. Kpukpru mme inuen enyuŋ eta obuk eyuhɔ.