ERIYARARE 15 - Edisana ñwed Abasi Ibom

Mme Angel Abasi Ye Mme Akpatre Idiɔŋɔ

¹ EKEM ŋkut idiɔŋɔ eŋwen ke enyɔŋ, akamba ye utibe, angel itiaba, emi enyenede akpatre ufen itiaba, koro iyaresit Abasi ɔyɔhɔ ama ke mmɔ.

² Ekem ŋkut se ibietde inyaŋ glass emi abuahade ye ikaŋ; ye mmɔ emi ekekande ebɔhɔ unam oro ye mbiet esie ye ibat enyiŋ esie, nte edade ke mben inyaŋ glass oro, ye harp Abasi ke ubɔk mmɔ.

³ Mmɔ enyuŋ ekwɔ ikwɔ Moses owo Abasi ye ikwɔ Eyen-erɔŋ, ete, Mme utom Fo ekponi enyuŋ enyene nyɔ, O Ɔbɔŋ Abasi, Andikara kpukpru ŋkpɔ; Mme usuŋ Fo enen enyuŋ edi akpanikɔ, O Edidem mme obio.

⁴ Anie editre nditeŋe Fi, O Ɔbɔŋ, ndinyuŋ nnɔ enyiŋ Fo ubɔŋ? Koro Afo ikpɔŋ edi edisana; Kpukpru mme idut eyenyuŋ edi edituak ibuot ke iso Fo; Koro ndinen ikpe Fo ema eyarare ewut idem.

⁵ Ke ŋkpɔ emi ema ekebe, ŋkut, ndien eberere esit-esit ubet efe ntiense emi odude ke heaven;

⁶ ndien angel itiaba emi enyenede ufen itiaba eto ke temple oro ewɔŋɔ, esine edisana nsem-nsem itiat, enyuŋ ebɔbɔ mbɔbɔ o-gold ke ikpanesit mmɔ.

⁷ Ndien kiet ke otu ŋkpɔ-uwem inaŋ ɔnɔ angel itiaba oro eso o-gold itiaba, eke eyɔhɔde ye iyaresit Abasi, Andidu uwem ke nsinsi-nsinsi.

⁸ Ndien temple ɔyɔhɔ ye nsuŋikaŋ eke otode ke ubɔŋ Abasi ye odudu Abasi; baba owo kiet inyuŋ ikemeke ndiduk ke esit temple, tutu ufen itiaba emi angel itiaba oro ekamade ekure.