ERIYARARE 14 - Edisana ñwed Abasi Ibom

Eyen Erɔŋ Abasi ye Ikɔt Esie

¹ EKEM ŋkut, ndien sese, Eyen-erɔŋ ke adada ke Obot Zion, thousand owo ikie ye aba ye inaŋ enyuŋ eda ye Enye, kpa mmɔ emi ekewetde enyiŋ Esie ye enyiŋ Ete Esie ke ɔkpɔ-iso mmɔ.

² Ndien ŋkop uyo emi otode ke heaven, ebiet uyo ediwak mmɔŋ, onyuŋ ebiet uyo ɔkpɔsɔŋ obuma; uyo oro ŋkopde onyuŋ etie nte uyo mme ebre-harp, emi ebrede ikwɔ ke harp mmɔ.

³ Ndien mmɔ ekwɔ ikwɔ emi etiede nte obufa ikwɔ ke iso ebekpo, ye ke iso ŋkpɔ-uwem inaŋ oro ye mbiowo; baba owo kiet inyuŋ ikemeke ndikpep ikwɔ oro, ke mibɔhɔke thousand owo ikie ye aba ye inaŋ, kpa mmɔ oro ekefakde esio efep ke isɔŋ.

⁴ Mmɔ emi edi owo emi mikasabakere idem ye iban; koro mmɔ mikɔdɔhɔ ndɔ. Emi edi mmɔ emi etienede Eyen-erɔŋ eka ɔtɔ nte Enye akaka. Ekefak mmɔ esio ke otu owo, ete mmɔ edi akpa mbuŋwum enɔ Abasi ye Eyen-erɔŋ.

⁵ Ndien owo ikwe mmɔ abiaŋa ke inua; mmɔ inyuŋ inyeneke ndo.

⁶ Ekem ŋkut angel eŋwen efefe ke ufɔt enyɔŋ, emi enyenede nsinsi gospel ete ikwɔrɔ inɔ mmɔ emi eduŋde ke isɔŋ, ye kpukpru idut ye esien ye usem ye obio;

⁷ ndien enye ɔdɔhɔ ke ɔkpɔsɔŋ uyo ete, Mbufo eteŋe Abasi, enyuŋ enɔ Enye ubɔŋ; koro ekem ini ikpe Esie; enyuŋ etuak ibuot enɔ Enye emi okobotde enyɔŋ ye isɔŋ ye inyaŋ ye idim mmɔŋ.

⁸ Ekem angel eŋwen, emi edide udiana-akpa, etiene ke edem, ɔdɔhɔ ete, Babylon, akwa obio oro, ɔmɔduɔ, ɔmɔduɔ, emi akanamde kpukpru mme idut eŋwɔŋ wine ifuresit use esie.

⁹ Ekem angel eŋwen, emi edide ɔyɔhɔ ita, etiene mmɔ, onyuŋ ɔdɔhɔ ke ɔkpɔsɔŋ uyo ete, Edieke owo atuakde ibuot ɔnɔ unam oro ye mbiet esie, onyuŋ ɔbɔde idiɔŋɔ ke ɔkpɔ-iso mme ke ubɔk,

¹⁰ enye nde eyeŋwɔŋ wine ifuresit Abasi, emi ebuakde enana mbɔm ke cup iyaresit Esie; eyenyuŋ etuhɔre enye ke ikaŋ ye brimstone ke iso nti angel ye ke iso Eyen-erɔŋ:

¹¹ ndien nsuŋikaŋ ndutuhɔ mmɔ eyedɔk ke nsinsi-nsinsi: mmɔ inyuŋ ikopke nduɔk-odudu ke uwemeyo ye okoneyo, kpa mmɔ eke etuakde ibuot enɔ unam oro ye mbiet esie, ye owo ekededi eke ɔbɔde idiɔŋɔ enyiŋ esie.

¹² Mi ke ekut ime nti ikɔt Abasi, kpa mmɔ emi enimde mbet Abasi, enyuŋ ebuɔtde idem ye Jesus.

¹³ Ekem ŋkop uyo emi otode ke heaven ɔdɔhɔ ete, Wet ete, Ɔfɔfɔn ɔnɔ mme akpa-mkpa emi ekpade ke Ɔbɔŋ, ɔtɔŋɔde ke ini emi: Spirit ete, Edi ntre; man mmɔ eduɔk odudu ke ɔkpɔsɔŋ utom mmɔ; koro se mmɔ ekenamde etiene mmɔ ke edem.

¹⁴ Ekem ŋkut, ndien sese, afia ikpa-enyɔŋ; ndien kiet ke etie ke ikpa-enyɔŋ emi ebietde eyen owo; enye ayara anyanya o-gold ke ibuot esie, onyuŋ enyene edisɔp ofut ke ubɔk esie.

¹⁵ Angel eŋwen onyuŋ ɔwɔrɔ ke temple ofiori ke ɔkpɔsɔŋ uyo, okot enye emi etiede ke ikpa-enyɔŋ, ete, Sin ofut fo, kpeŋe; koro ekem ini ukpeŋe; koro ini mbuŋwum isɔŋ ekem tutu ebe.

¹⁶ Ndien anditie ke ikpa enyɔŋ esin ofut ke isɔŋ, enyuŋ ekpeŋe mbuŋwum isɔŋ.

¹⁷ Ekem angel eŋwen oto ke temple emi odude ke heaven ɔwɔrɔ edi, ndien enye enyene edisɔp ofut.

¹⁸ Angel eŋwen onyuŋ ɔwɔrɔ ke itie-uwa, kpa angel emi akarade ikaŋ, ndien enye okot andinyene edisɔp ofut ke ɔkpɔsɔŋ uyo ete, Sin edisɔp ofut, kpok mme etuek vine emi edude ke isɔŋ; koro mme grape esie edat ema.

¹⁹ Ndien angel oro esin ofut esie ke isɔŋ, onyuŋ okpok vine isɔŋ, otop esin ke obube udigi-wine, kpa akwa obube udigi-wine iyaresit Abasi.

²⁰ Ndien edigi mmɔ ke obube udigi-wine ke edem obio; iyip onyuŋ ɔwɔrɔ ke obube udigi-wine ɔdɔk okosim ke ukpaha-inua enaŋ-mbakara, onyuŋ ɔfiɔrɔ osim thousand furlong kiet ye ikie itiokiet.