ERIYARARE 12 - Edisana ñwed Abasi Ibom

Ŋwan oro ye Akamba Ididuot Dragon oro

¹ EKEM akamba idiɔŋɔ owut idem ke enyɔŋ; ŋwan emi esinede utin ke idem, ɔfiɔŋ onyuŋ odude enye ke idak ikpat, anyanya ntantafiɔŋ duopeba onyuŋ odorode enye ke ibuot;

² ndien enye oyomo, onyuŋ osio mkpo ke mbumiaŋa ye ubiak itie-uman, oyom ndiman eyen.

³ Idiɔŋɔ efen onyuŋ owut idem ke enyɔŋ; ndien sese, akamba ididuot dragon, emi enyenede ibuot itiaba ye nduk duop, onyuŋ ayarade anyanya itiaba ke mbuot esie.

⁴ Ndien isim esie odudi ubak ntantafiɔŋ ikpa-enyɔŋ kiet ke itie ita, osioŋo mmɔ ɔduɔŋɔ ke isɔŋ. Dragon oro onyuŋ ada ke iso ŋwan oro oyomde ndiman eyen, kpaŋ ŋwan oro ama aman, ekpemen eyen esie ata.

⁵ Ekem ŋwan oro aman eyen, erenowo, emi edidade esaŋ ukwak akara kpukpru mme idut; enyuŋ ekpobi eyen esie ufime emen esɔk Abasi ekedori ke ebekpo Esie.

⁶ Edi ŋwan oro efehe ɔnyɔŋ ke desert, ke ebiet eke Abasi okotimde itie onim ɔnɔ enye do, man ebɔk enye do ke thousand usen ye usen ikieiba ye ata.

⁷ Ekem ekɔŋ otibe ke heaven; Michael ye me angel esie eŋwana ekɔŋ ye dragon; dragon ye mme angel esie enyuŋ eŋwana ekɔŋ, edi mmɔ ikanke.

⁸ Ufaŋ inyuŋ iduhe aba inɔ mmɔ ke heaven.

⁹ Ndien esio akwa dragon eduɔk ke isɔŋ, kpa akani urukikɔt oro ekotde enye ete, andidori ikɔt Abasi ikɔ ye Satan, andibiaŋa ofuri ererimbot; esio enye eduɔk ke isɔŋ, enyuŋ esioŋo mme angel esie eduɔŋɔ ye enye.

¹⁰ Ndien ŋkop ɔkpɔsɔŋ uyo ke heaven nte ɔdɔhɔde ete, Ke emi, erinyaŋa ye erikara emedi, Ye Ubɔŋ Abasi nnyin ye odudu Christ Esie; Koro ema esio enye emi odoride nditɔ-ete nnyin ikɔ eduɔk ke isɔŋ. Emi odoride mmɔ ikɔ ke iso Abasi ke uwemeyo ye okoneyo.

¹¹ Mmɔ ema ekan enye oto ke iyip Eyen-erɔŋ, Onyuŋ oto ke se mmɔ etiŋde nte ntiense. Mmɔ imaŋa uwem mmɔ tutu osim mkpa.

¹² Ntre edara, O mme heaven, ye mbufo emi eduŋɔde ke esit. Mbɔm isɔŋ ye inyaŋ, Koro andidori ikɔt Abasi ikɔ ama ɔsuhɔre etiene mbufo; Enye asaŋa ye akwa ifuresit, sia enye ɔdiɔŋɔde ete ini imɔ edi ibio.

¹³ Ntre ke ini dragon okutde ete ema esio imɔ eduɔk ke isɔŋ, enye ɔkɔbɔ ŋwan emi akamande eyen-eren oro.

¹⁴ Edi enɔ ŋwan oro mba iba eke akamba ntrukpom, man enye efe ɔnyɔŋ ke ebiet iduŋ esie ke desert; do ke ebɔk enye ke ini ye ke mme ini ye ke ubak ini, uruk-ikɔt okunyuŋ okut enye.

¹⁵ Ndien urukikɔt otop mmɔŋ ke inua esie nte akpa, ada ebine ŋwan oro, ete ida idim mmɔŋ oro imen enye ifep.

¹⁶ Edi isɔŋ aŋwam ŋwan; isɔŋ onyuŋ atat inua esie ɔŋwɔŋ mmɔŋ oro dragon otopde ke inua esie.

¹⁷ Ndien dragon ayat esit ye ŋwan, onyuŋ adaha ndiŋwana ekɔŋ ye nditɔ esie emi esuhɔde emi enimde mme item Abasi, enyuŋ eyirede emum ikɔ-ntiense Jesus ekama.