ERIYARARE 10 - Edisana ñwed Abasi Ibom

Ɔkpɔsɔŋ Angel oro Otode Enyɔŋ Edi Ye Ekpri Ŋwed Emi Ekubɔrede Enim Iŋwaŋ

¹ NDIEN ŋkut ɔkpɔsɔŋ angel efen otode ke enyɔŋ osuhɔre; enye esine obubit enyɔŋ ke idem; akpara onyuŋ odoro enye ke ibuot, iso esie onyuŋ ebiet utin, ukot esie enyuŋ ebiet mme adaha ikaŋ;

² ndien ke ubɔk esie enye akama ekpri ŋwed emi ekibɔrede enim iŋwaŋ. Enye onyuŋ owuk ukot nnasia esie ke enyɔŋ inyaŋ, onyuŋ owuk ukot ufien esie ke obot;

³ onyuŋ ofiori ke ɔkpɔsɔŋ uyo, nte lion okunide: ndien ke adaŋemi enye ofioride, mme obuma itiaba esioro uyo.

⁴ Ke adaŋemi mme obuma itiaba esiorode uyo, mmɔŋ ŋwewet: ndien ŋkop uyo emi otode ke heaven, ɔdɔhɔ ete, Da ufik-ŋkpɔ fik se obuma mbitiaba etiŋde, men, nim, kunyuŋ uwet.

⁵ Ndien angel, emi ŋkutde nte adade ke enyɔŋ inyaŋ ye obot, emenere ubɔk nnasia esie ese enyɔŋ,

⁶ onyuŋ otomo Enye emi odude ke nsinsi, emi okobotde enyɔŋ ye se idude ke esit, ye isɔŋ ye se idude ke esit, ye inyaŋ ye se idude ke esit, ete ini idibihike aba;

⁷ edi ke mme usen emi ɔyɔhɔ angel itiaba osiorode uyo, ke adaŋemi enye oyomde ndifri ukorowo, adaŋoro ke ndibe uduak Abasi ososu, asaŋa ekekem ye eti etop emi Enye akayararede ɔnɔ nti ikɔt Esie, kpa mme prophet.

⁸ Ekem uyo eke ŋkokopde nte otode ke heaven, ɔtɔŋɔ ntak etiŋ ye ami ete, Ka kɔbɔ ŋwed emi ekibɔrede ana iŋwaŋ ke ubɔk angel oro adade ke inyaŋ ye ke obot.

⁹ Ndien ntiene angel oro, ŋkɔdɔhɔ enye, nte ɔnɔ mi ekpri ŋwed oro. Enye ete mi, bɔ, ta enye; eyenam idibi fo odoro, edi ke inua fo eyeniŋe nte aran-ɔkwɔk.

¹⁰ Ekem nsio ekpri ŋwed oro ke ubɔk angel, nnyuŋ nta; enye onyuŋ eniŋe nte aran-ɔkwɔk ke inua mi; edi ke ini mma ŋkata enye, idibi mi akabare odoro.

¹¹ Ndien edɔhɔ mi ete afo enyene nditɔnɔ ntak ntiŋ nte prophet ndian ediwak mme idut ye mme obio ye mme usem ye ndidem.