ECCLESIASTES 9 - Edisana ñwed Abasi Ibom

Ŋkpa, Uwem ye Ifiɔk

¹ KORO ŋkenimde ibuot mi ke ofuri ŋkpɔ emi, ŋkonyuŋ ntim ndomo ofuri ŋkpɔ emi (mfiɔk): nte ke nti owo, ye mme enyene-ibuot owo, ye utom mmɔ, edu ke ubɔk Abasi; baba owo kiet inyuŋ ifiɔkke ima ye usua: ofuri ŋkpɔ odu mmɔ ke ini iso.

² Kpukpru ŋkpɔ ewɔrɔ kpukpru owo ukem-ukem: ŋkpɔ kiet ɔnɔmɔ nti owo, ye mme idiɔk owo, ye owo eke ɔfɔnde, ye ndisana, ye ndidehe, ye owo eke awade uwa, ye owo eke miwaha; nte eti owo etiede, kpa ntre ke idiɔk owo etie: owo eke otomode etie nte owo eke abakde eritomo.

³ Emi ɔdiɔk ke kpukpru se mmɔ enamde ke idak utin, emi ŋkpɔ kiet ɔnɔmɔde kpukpru: ndien ŋko idiɔk ɔyɔhɔ nditɔ owo ke esit, idat onyuŋ odu mmɔ ke esit, ke uwem mmɔ; ndien ke ini oro ebede, mmɔ eka mkpa.

⁴ Koro anie owo eke ɔbɔhɔde odu? Kpukpru mme odu-uwem enyene mbuɔtidem. Koro ebua eke odude uwem ɔfɔn akan okpo lion.

⁵ Koro mme odu-uwem efiɔkde ete ke mmimɔ inyene ndikpa: edi ama edi mme akpa-mkpa, mmɔ ifiɔkke baba ŋkpɔ kiet: mmɔ inyuŋ inyeneke aba ŋkpɔ-eyen-utom: koro owo mitihi aba enyiŋ mmɔ.

⁶ Ndien ŋko ima mmɔ, ye usua mmɔ, ye ufup mmɔ emetak ema; mmɔ idinyuŋ inyeneke aba udeme ke nsinsi ke ŋkpɔ baba kiet eke enamde ke idak utin.

⁷ Ka kadia udia fo ke idaresit, nyuŋ ŋwɔŋ wine fo ke inemesit: koro utom fo ama enem Abasi esit ama.

⁸ Yak edisine-ŋkpɔ fo edi edisana kpukpru ini; kunyuŋ uyak ibuot fo anana aran.

⁹ Afo ye ŋwan emi afo amade, dia uwem kpukpru usen ikpikpu uwem fo, emi Enye ɔnɔde fi ke idak utin, kpa kpukpru usen ikpikpu uwem fo: koro enye emi edide udeme fo ke uwem, ye ke utom fo eke afo anamde ke idak utin.

¹⁰ Da odudu fo nam kpukpru se ubɔk fo okutde ndinam: koro baba erinam, baba uduak, baba ifiɔk, baba mbufiɔk miduhe ke obio ekpo emi afo akade do.

¹¹ Ntie ke idak utin ŋkabare, nnyuŋ ŋkut nte ke idige mbon nsɔp-itɔk ekan ke mbuba, inyuŋ idige mbon-uko ekan ke ekɔŋ, nte ke idige mbon eti ibuot enyene udia, inyuŋ idige mbon ikike ekut inyene, inyuŋ idige mme ɔfiɔkŋkpɔ owo enyene itoro: koro ini ye unɔmɔ etibede enɔ mmɔ kpukpru.

¹² Koro owo minyuŋ ifiɔkke ini esie oro; kpa nte iyak eke emumde ke idiɔk iyire, ye nte ntarusuŋ eke emumde ke afia; kpa ntre ke nditɔ owo esike ke idiɔk ini, ke adaŋemi ɔduɔde mmɔ ke idem ini kiet.

¹³ Ŋkokut emi ŋko ke idak utin, kpa eti ibuot, ndien nse enye ke akamba ŋkpɔ.

¹⁴ Ekenyene ekpri obio kiet, ndien mbio eke edude ke esit iwakke; ndien akamba edidem kiet aka ekɔŋ ye enye, onyuŋ akan enye okuk, onyuŋ anam akamba tower ekem ye enye.

¹⁵ Ndien enyene-ibuot eyen ubuene odu ke esit, ndien enye ada eti ibuot esie anyaŋa obio oro: edi baba owo kiet itihi eyen ubuene oro.

¹⁶ Ndien ami ndɔhɔ, nte ke eti ibuot ɔfɔn akan uko; edi mmɔ ese eti ibuot eyen-ubuene oro ke ndek, inyuŋ ikopke uyo esie.

¹⁷ Uyo mbon eti ibuot eke ekopde suŋ (ɔfɔn) akan mfiori etubom ke otu mbon ndisime.

¹⁸ Eti ibuot ɔfɔn akan ŋkpɔ-ekɔŋ, ndien anam-idiɔk kiet abiat ediwak nti ŋkpɔ.