ECCLESIASTES 6 - Edisana ñwed Abasi Ibom

Inyene Inɔhɔ Owo Inemesit

¹ ENYENE idiɔk ŋkpɔ kiet eke ŋkokutde ke idak utin: enye onyuŋ odobi owo ke idem:

² kpa owo eke Abasi ɔnɔde enye ata ediwak inyene eti-eti, ye ubɔŋ, ndien baba ŋkpɔ kiet eke ukpɔŋ esie amade, inanake enye, edi Abasi iyakke enye ekeme ndidia ke esit; koro isen owo edidiade enye: emi edi ikpikpu, onyuŋ edi idiɔk udɔŋɔ.

³ Owo ama obon nditɔ ikie, ama onyuŋ odu uwem ediwak isua, mme usen isua esie ema enyuŋ ewak, ndien ukpɔŋ esie miyuhɔke mfɔn, ndien enye mibuhɔke, ndɔhɔ nte ke eyen eke awakde idibi ɔfɔn akan enye.

⁴ Koro enye asaŋade edi ikpikpu ikpikpu, ndien ɔnyɔŋ ke ekim, ekim onyuŋ ɔfuhɔ enye ke enyiŋ.

⁵ Enye inyuŋ ikwe utin, inyuŋ ifiɔkke ŋkpɔ: emi enyene nduɔk-odudu akan oko.

⁶ Ndien edieke enye odude uwem ke tɔsin isua utim ikaba, ndien mikwe eti ŋkpɔ, nte mmɔ kpukpru ikaha ebiet kiet?

⁷ Ofuri utom owo edi ke eke inua esiemɔ, edi itɔŋ esie iyuhɔke.

⁸ Enyene-ibuot owo enyene nso udori ndien akan ndisime? ubuene emi ɔfiɔkde ndisaŋa ke iso mme andidu uwem, onyuŋ enyene nso udori?

⁹ Se enyin ekutde ɔfɔn akan esit eke oyode; emi ŋko edi ikpikpu ŋkpɔ ye idomo eke miwɔrɔke usuŋ.

¹⁰ Ama edi ŋkpɔ ekededi eke odude, ekekot enyiŋ esie tutuko, enyuŋ efiɔk ete ke enye edi owo, enye inyuŋ ikemeke ndiŋwana ye Andisɔŋ ŋkan enye.

¹¹ Koro enyenede ediwak ŋkpɔ eke esinde ikpikpu ŋkpɔ ewak, owo enyene nso udori?

¹² Koro anie owo ɔfiɔk se ifɔnde ye owo ke uwem esie, ke adaŋa ibat usen ikpikpu uwem esie, emi enye adiade nte ukpɔŋ? ndien anie ekeme ndisian owo ŋkpɔ eke editienede enye odu ke idak utin?