ECCLESIASTES 4 - Edisana ñwed Abasi Ibom

Edu Uwem, Ufɔk ye mme Ufan ye Ukara

¹ NDIEN ami ŋwɔŋɔre nnyuŋ nse kpukpru ufik emi enamde ke idak utin: ndien se mmɔŋ-eyet mmɔ emi owo efikde: ndien baba owo kiet eke ɔdɔŋde mmɔ esit iduhe; mme andifik mmɔ enyuŋ ekan mmɔ ubɔk; ndien baba owo kiet eke ɔdɔŋde mmɔ esit iduhe.

² Ndien ami ntoro mme akpa-mkpa emi ema eke-kpaŋa, ŋkan mme odu-uwem emi edude tutu osim emi.

³ Ndien ama edi owo eke mika-iduhe kaŋa, minyuŋ ikwe mme idiɔk ŋkpɔ emi enamde ke idak utin, ɔfɔn enye akan mmɔ mbiba.

⁴ Ndien nse ofuri ɔkpɔsɔŋ utom, ke kpukpru utom eke ɔwɔrɔde unen, nte ke enye edi ntak emi mbɔhiduŋ owo ofibede ufup ye owo. Emi ŋko onyuŋ edi ikpikpu ŋkpɔ ye idomo eke miwɔrɔke usuŋ.

⁵ Ndisime owo akpaŋ ubɔk esie, onyuŋ ata obukidem esiemɔ.

⁶ Ifure eke ɔyɔhɔde ubɔk kiet ɔfɔn akan ɔkpɔsɔŋ utom ye ikpikpu idomo eke eyɔhɔde ubɔk mbiba.

⁷ Ndien ami ntɔŋɔ ntak nse ikpikpu ŋkpɔ kiet ke idak utin.

⁸ Owo kiet odu, ndien efen iduhe; ndien enye inyeneke eyen, inyuŋ inyeneke eyen-eka: ndien ofuri ɔkpɔsɔŋ utom esie inyeneke utit; enyin esie ŋko iyuhɔke inyene; inyuŋ idɔhɔke ite, “Ami ŋkpakpa utom, nnyuŋ mbɔ ukpɔŋ mi eti ŋkpɔ, nnɔ anie?” Emi ŋko onyuŋ edi ikpikpu ŋkpɔ; onyuŋ edi ukut-ukut idomo.

⁹ Owo iba efɔn ekan owo kiet; koro mmɔ ediade eti ŋkpɔ eyen utom mmɔ.

¹⁰ Koro edieke mmɔ eduɔŋɔde, kiet eyemenere ufan esie: edi mbɔm ikpɔŋ owo eke ɔduɔde, ndien owo efen eke emenerede enye miduhe.

¹¹ Ndien ŋko, edieke owo iba enade ɔtɔ kiet, mmɔ ekop ufiop; edi ikpɔŋ owo edikop ufiop didie?

¹² Ndien ema ekan ikpɔŋ owo oro, mmɔ mbiba ekeme ndida ke iso enye eken: ndien uruk eke efiakde ita-ita iwarake ndikibe.

¹³ Enyene-ibuot akparawa kiet eke obuenede, ɔfɔn akan mbiowo ye ndisime edidem eke miyomke aba ndikop item.

¹⁴ Koro enye otode ke ufɔk ŋkpɔkɔbi ada ubɔŋ; koro enye emi akamanade ada ubɔŋ akabare ubuene.

¹⁵ Ŋkokut kpukpru mme andidu-uwem eke esaŋade ke idak utin eda ye akparawa oro, kpa udiana-akpa oro adade ke itie esie.

¹⁶ Kpukpru mbio oro inyeneke utit, kpa kpukpru mmɔ emi enye adade mmɔ ke iso; edi mmɔ eke editienede edem ididarake enye. Ŋkɔm emi ŋko edi ikpikpu ye idomo eke miwɔrɔke usuŋ.