ECCLESIASTES 3 - Edisana ñwed Abasi Ibom

Enim Ini Enɔ Kpukpru Ŋkpɔ

¹ EMENIM ini enɔ kpukpru ŋkpɔ: kpukpru utom ke idak enyɔŋ enyuŋ enyene ekem ini mmɔ:

² ini eke emande, ye ini eke ekpade; ini eke etɔde ke isɔŋ, ye ini eke ediberede se etɔde:

³ ini eke ewotde, ye ini eke ekɔkde (unan); ini eke ewuride, ye ini eke ediɔŋde;

⁴ ini eke etuade, ye ini eke esakde; ini eke esemede, ye ini eke enekde;

⁵ ini eke emende itiat eduɔk, ye ini eke etaŋde itiat ekubi; ini eke efatde, ye ini eke etrede mfari;

⁶ ini eke eyomde, ye ini eke esopde; ini eke enimde, ye ini eke eduɔkde;

⁷ ini eke ewakde ɔfɔŋ, ye ini eke ekimde; ini eke edopde, ye ini eke etiŋde ikɔ;

⁸ ini eke emade, ye ini eke esuade; ini ekɔŋ, ye ini emem.

⁹ Owo eke anamde ŋkpɔ adia nso udori ke se enye akpade utom?

¹⁰ Mma ŋkut utom emi Abasi ɔnɔde nditɔ owo, ete esin idem ke esit.

¹¹ Enye ama anam kpukpru ŋkpɔ eye ke ini mmɔ: ama onyuŋ esin mmɔ asian ke esit, koro edieke asian miduhe, owo ikemeke ndikut ŋkpɔ emi Abasi anamde, ɔtɔŋɔde ke ibuot tutu osim utit.

¹² Mmɔfiɔk nte ke baba eti ŋkpɔ kiet iduhe mmɔ ke esit, ke mibɔhɔke owo ndidat esit, nnyuŋ nnam se ifɔnde ke uwem esie.

¹³ Ndien ŋko ama edi kpukpru owo eke ediade ŋkpɔ enyuŋ eŋwɔŋde, enyuŋ ekutde eti ŋkpɔ ke kpukpru ɔkpɔsɔŋ utom mmɔ, emi onyuŋ edi enɔ Abasi.

¹⁴ Mmɔfiɔk nte ke kpukpru se Abasi anamde edibigi ke nsinsi: inyeneke nte ediande ŋkpɔ ke esit, inyuŋ inyeneke nte esiode ŋkpɔ ke esit efep: ndien Abasi anam ntem, man mmɔ efehe ndik ke iso esie.

¹⁵ Ŋkpɔ eke odude okodu tutu ko; ŋkpɔ ŋko eke edidude ama onyuŋ odu tutu ko; Abasi eyenyuŋ oyom se ima ibe ika.

¹⁶ Ndien ŋko ŋkonyuŋ ndu ke idak utin ŋkut ebiet emi ekpede ikpe, nte ke idiɔk ido odu do; ŋkut ebiet edinen ido, nte ke mme idiɔk owo edu do.

¹⁷ Ndɔhɔ ke esit mi, nte, Abasi eyedomo eti owo ye idiɔk: koro ini anade ɔnɔ kpukpru se eyomde, ye kpukpru se enamde do.

¹⁸ Ami ŋkɔdɔhɔ ke esit mi, nte (edi ntre) abaŋa nditɔ owo, man Abasi ɔduŋɔ mmɔ, man enyuŋ ekut ete ke mmimɔ idi mme unam ke idem mmimɔ.

¹⁹ Koro amadi se inɔmɔde nditɔ owo, oro ɔnɔmɔ mme unam: ŋkɔm ŋkpɔ kiet ɔnɔmɔ mmɔ; nte enye emi akpade, kpa ntre ke eken akpa; kpukpru mmɔ enyene kpasuk ibifik kiet; akakan eke owo akande unam inyuŋ iduhe koro kpukpru edide ikpikpu.

²⁰ Kpukpru eka ɔtɔ kiet: kpukpru eto ke ntan: kpukpru eyenyuŋ efiak ke ntan.

²¹ Anie owo ɔfiɔk spirit nditɔ owo emi ɔdɔkde ke enyɔŋ, ye spirit unam emi ɔsuhɔrede ke idak isɔŋ?

²² Ndien ŋkut nte ke eti ŋkpɔ iduhe ikan nte owo adatde esit ke se enye anamde: koro udeme esie edi oro: koro anie edida enye owut se ididude enye ke edem?