ECCLESIASTES 2 - Edisana ñwed Abasi Ibom

Ikpuikpu Emi Odude ke Mme Edinam Uwem

¹ AMI ndɔhɔ ke esit mi, nte, Di ndien, yak nda mbre ndomo fi, nyuŋ dia eti ŋkpo. Ndien, sese, emi ŋko onyuŋ edi ikpikpu.

² Ndɔhɔ mbaŋa imam, nte, Idat: ndɔhɔ mbaŋa mbre, nte, Enye anam nso?

³ Ŋkekere ke esit mi, nte nda wine mbɔk idem mi, esit mi onyuŋ osuk ada mbufiɔk eteme (mi) usuŋ: nte nnyuŋ mmum ndisime ŋkama, tutu ndikut se ifɔnde ye nditɔ owo, eke mmɔ ekpenamde ke idak ikpa-enyɔŋ, ka adaŋa ibat mme usen uwem mmɔ.

⁴ Ŋkpɔ emi nnamde ikpɔn; mbɔp ufɔk nnɔ idem mi; ntɔ iŋwaŋ-vine nnɔ idem mi.

⁵ Nnam iŋwaŋ-esa, ye mbaha mfri eto nnɔ idem mi, nnyuŋ ntɔ mmɔ kpukpru oruk mfri eto ke esit:

⁶ Nnam mkpɔdiɔhɔ-mmɔŋ nnɔ idem mi man nda mmɔŋ ke esit mbit akai emi otibede eto:

⁷ Ndep ifin iren ye ifin iban, nnyuŋ nnyene nditɔ eke emanade ke ufɔk mi. Nnyuŋ nnyene ediwak enaŋ ye ŋkpri ufene ŋkan kpukpru mmɔ emi ebemde mi iso edu ke Jerusalem.

⁸ Nnyuŋ ŋkɔ silver ye gold, ye inyene ndidem, ye eke mme province, nnɔ idem mi: nnyuŋ ŋkɔ mme ɔkwɔ-ikwɔ iren ye iban, ye ŋkpɔ eke enemde nditɔ owo esit, ɔbɔŋ-aŋwan ye iban-esa, nnɔ idem mi.

⁹ Ndien ami ŋkabare ŋkpon, nnyuŋ ntɔt ŋkan kpukpru mmɔ emi ekebemde mi iso edu ke Jerusalem: ndien ifiɔk mi onyuŋ osuk odu mi ke idem.

¹⁰ Ndien nsinke enyin mi baba ŋkpɔ kiet eke mmɔ eyomde, mfarake esit mi ke baba idara kiet: koro esit akadatde mi ke ofuri ɔkpɔsɔŋ utom mi: ndien emi onyuŋ edi udeme mi, eke otode ke ofuri ɔkpɔsɔŋ utom mi.

¹¹ Ndien ŋwɔŋɔre nse kpukpru ŋkpɔ mi emi ubɔk mi enamde, ye ofuri utom emi ŋkaŋwanade ndinam: ndien sese, kpukpru edi ikpikpu ye idomo eke miwɔrɔke usuŋ: baba udori inyuŋ iduhe ke idak utin.

¹² Ndien ŋwɔŋɔre nse mbufiɔk, ye idat, ye ebiɔ: koro nso ŋkpɔ ke owo eke editienede edidem edem, edinam? Kpa se enye akanamde ama.

¹³ Ndien ami ndikut nte ke ifiɔk enyene se ikande ndisime, kpa nte uŋwana akande ekim.

¹⁴ Ama edi enyene-ibuot owo, enyin esie edu enye ke ibuot; edi ndisime asaŋa ke ekim: ndien ami ŋko ke idem mi mmɔfiɔk, nte ke unɔmɔ kiet ɔnɔmɔ mmɔ kpukpru.

¹⁵ Ndien ndɔhɔ ke esit mi, nte, ke emi ŋko onyuŋ edi ikpikpu.

¹⁶ Koro mitihi enyene-ibuot owo, kpa nte mitihi ndisime owo ke nsinsi koro efrede kpukpru toto ko ke usen eke edide! ndien anam didie enyene-ibuot owo akpa nte ndisime?

¹⁷ Ndien nsua uwem emi: koro ŋkpɔ eke enamde ke idak utin akabarede ɔdiɔk ye ami: koro kpukpru edide ikpikpu ye idomo eke miwɔrɔke usuŋ.

¹⁸ Ndien ŋko ami nsua ofuri ɔkpɔsɔŋ utom mi emi nnamde ke idak utin: koro nnyenede ndinim enye nnɔ owo eke editienede mi edem.

¹⁹ Ndien anie ɔfɔfiɔk mme enye edidi owo eti ibuot, mme edidi owo ndisime? Edi enye eyekara ofuri ɔkpɔsɔŋ utom mi emi ŋkadade eti ibuot nnam ke idak utin: emi onyuŋ edi ikpikpu ŋko.

²⁰ Ndien ŋkabare ndinam esit mi okudori aba enyin ke ofuri utom emi nnamde ke idak utim.

²¹ Koro enyenede owo eke akanamde ŋkpɔ ke eti-ibuot, ye ke ifiɔk, ye ke ikike; ndien enye enyene ndida udeme esit nnɔ owo eke mika-namke ŋkpɔ ke esit. Emi ŋko edi ikpikpu ye akamba idiɔk ŋkpɔ.

²² Koro nso ŋkpɔ ana ɔnɔ owo ke ofuri utom esie ye ɔkpɔsɔŋ ifik esit esiemɔ emi enye anamde ke idak utin?

²³ Koro kpukpru usen esie edide ndutuhɔ; utom esie onyuŋ edi uyat-uyat; ke idem okoneyo esit esie inaŋa suŋ. Emi ŋko onyuŋ edi ikpikpu.

²⁴ Baba ŋkpɔ kiet ifɔnke ye owo, ikan ndidia ŋkpɔ, nnyuŋ ŋŋwɔŋ, nnyuŋ nnam ukpɔŋ esie adia se ifɔnde ke utom esiemɔ. Ama edi emi ŋko, ami mmokut nte ke oto Abasi ke ubɔk.

²⁵ Koro anie adia, anie onyuŋ ɔsɔp ubɔk akan mi?

²⁶ Koro enye (Abasi) adade eti-ibuot, ye ifiɔk, ye idaresit, ɔnɔ owo eke ɔfɔnde enye ke iso: edi ama edi idiɔk owo, Enye ɔnɔ enye utom ete ɔkɔ, onyuŋ obon, man ada ɔnɔ owo eke ɔfɔnde Abasi ke iso. Emi onyuŋ edi ikpikpu ye idomo eke miwɔrɔke usuŋ.