ECCLESIASTES 11 - Edisana ñwed Abasi Ibom

Ufɔn ke Owo Nditim Ŋkpeme se Enye Anamde ke Uwem Emi

¹ DUƆK uyo fo ke enyɔŋ mmɔŋ: koro afo eyekut enye ke ediwak usen ebede.

² Da ubak nɔ itiaba, nɔ itiaita ŋko: koro afo mufiɔkke idiɔk-ŋkpɔ eke edidude ke ererimbot.

³ Edieke edim ɔyɔhɔde ke ikpa-enyɔŋ, eyedep ke isɔŋ: ndien edieke eto ɔduɔde ese edem usuk, mme ese edem edere, ke ebiet ke eto ɔduɔde, do ke enye edina.

⁴ Owo eke ekpemede ofum idisuanke mkpasip, ndien owo eke esede ikpa-enyɔŋ idikpeŋeke.

⁵ Kpa nte afo mufiɔkke se idide usuŋ spirit, ye nte mme ɔkpɔ etiede ke idibi aŋwan eke oyomode: kpa ntre ŋko afo ufiɔkke utom Abasi emi anamde kpukpru.

⁶ Suan mkpasip fo ke usenubɔk; kunyuŋ ufara ubɔk fo ke mbubreyo: koro afo mufiɔkke ubak eke ediwɔrɔde usuŋ, mme emi mme oro; unyuŋ ufiɔkke mme mbiba edifɔn ukem-ukem.

⁷ Ndien uŋwana eneniŋe, onyuŋ eye enyin ndikut utin.

⁸ Koro edieke owo oro edidude uwem ediwak isua, yak enye adara kpukpru; edi yak enye eti mme usen ekim: koro mmɔ eyewak; kpukpru se ididide edi ikpikpu.

⁹ O akparawa, dara ke uyen fo; yak esit fo onyuŋ enem fi ke usen emi afo edide akparawa, nyuŋ tiene usuŋ esit fo, ye se enyin fo okutde: edi fiɔk ete ke Abasi edikot fi edi ikpe abaŋa kpukpru ŋkpɔ emi.

¹⁰ Sio iyaresit ke esit fo fep, ndien, nyuŋ bin se idiɔkde ke obukidem fo fep: koro uyen ye usiere uwem edide ikpikpu.