ECCLESIASTES 1 - Edisana ñwed Abasi Ibom

Kpukpru Ŋkpɔ Edi Ikpuikpu ye Ukpɔk

¹ UYO Ɔkwɔrɔ-ikɔ, eyen David, edidem ke Jerusalem.

² Ɔkwɔrɔ-ikɔ ɔdɔhɔ, ete, Ata akpatre ikpikpu ŋkpɔ, ata akpatre ikpikpu ŋkpɔ; kpukpru ŋkpɔ edi ikpikpu.

³ Owo adia nso udori ke ofuri ɔkpɔsɔŋ utom esie emi enye anamde ke idak utin?

⁴ Emana kiet aka, emana efen onyuŋ edi: edi ererimbot ada ke nsinsi.

⁵ Utin asiaha ŋko, utin onyuŋ osop, onyuŋ ɔsɔp aka ke ɔtɔ esiemɔ emi enye asiahade do.

⁶ Ofum aka usuk, ndien akanare aka edere; akanare, akanare asaŋa; ndien ofum ɔtɔŋɔ ntak oduk ke usuŋ emi enye akanarede.

⁷ Kpukpru akpa mmɔŋ ewet eduk ke inyaŋ; edi inyaŋ iyɔhɔke; ke ebiet emi mme akpa etode, do ke mmɔ etɔŋɔ ntak eka.

⁸ Kpukpru ikɔ ekpa mba; owo ikemeke nditiŋ mmɔ; erise iyuhɔke enyin, erikop inyuŋ iyuɔhɔke utɔŋ.

⁹ Se ima idu edi se idinyuŋ idude; se ema enyuŋ enam edi se edinamde: ndien baba obufa ŋkpɔ kiet iduhe ke idak utin.

¹⁰ Nte ŋkpɔ odu eke owo ɔkpɔdɔhɔde abaŋa, ete, Sese, emi edi obufa? Enye ama odu anyan ini ke eset emi ekebemde nnyin iso odu.

¹¹ Owo itihi mbon eset; ndien ŋko, ama edi mmɔ eke edidude ke ini iso, owo eke edidude ke ini iso iditihi mmɔ.

¹² Ami, Ɔkwɔrɔ-ikɔ, ndi edidem Israel ke Jerusalem.

¹³ Ndien nsin esit mi, nda ifiɔk nyom, nnyuŋ ntim nse kpukpru se enamde ke idak ikpa-enyɔŋ. Idiɔk utom kiet emi ke Abasi ɔmɔnɔ nditɔ owo, ete esin ubɔk ke esit.

¹⁴ Mmokut kpukpru ŋkpɔ emi enamde ke idak utin; ndien, sese, kpukpru edi ikpikpu ye idomo eke miwɔrɔke usuŋ.

¹⁵ Owo ikemeke ndineŋere ŋkpɔ eke akwa-ŋade; inyuŋ ikemede ndibat ŋkpɔ eke enanade.

¹⁶ Ami ŋkɔdɔhɔ ke esit mi, nte Sese, mmokpon, nnyuŋ ŋkɔ mbufiɔk ŋkan kpukpru mmɔ emi ebemde mi iso ekara Jerusalem: esit mi onyuŋ okut ata ediwak mbufiɔk ye ifiɔk.

¹⁷ Ami nnyuŋ nsin esit mi ndifiɔk mbufiɔk, ndinyuŋ mfiɔk idat ye ebiɔ. Mmɔfiɔk nte ke emi ŋko onyuŋ edi ikpikpu idomo.

¹⁸ Koro ediwak mbufiɔk esin ediwak ukut: ndien owo eke ɔkɔde ifiɔk ɔkɔ ubiak.