DEUTERONOMY 8 - Edisana ñwed Abasi Ibom

Ndurutɔŋ Ete Owo Okufre Abasi ke Ini Abasi Ɔdiɔŋde Enye

¹ MBUFO etiŋ enyin enim kpukpru mme ewuhɔ emi ami ŋwukde fi mfin emi, man mbufo edu uwem, enyuŋ etɔt, enyuŋ eduk ekeda isɔŋ emi Jehovah ɔkɔŋwɔŋɔde ɔnɔ mme ete mbufo.

² Nyuŋ ti ofuri usuŋ emi Jehovah Abasi fo akadade fi asaŋa ke ofuri isua aba emi ke wilderness, man enye anam fi osuk idem, onyuŋ odomo fi ete, ifiɔk se idude fi ke esit, mme afo eyetiŋ enyin ke mme ewuhɔ imɔ, mme udutiŋke.

³ Ntem ke enye ɔsuhɔre fi onyuŋ ayak fi etie biɔŋ, onyuŋ ada manna, emi afo mukɔfiɔkke, ye eke mme usɔ mikenyuŋ ifiɔkke, ɔnɔ fi adia; ete ikpep fi ite ke idige uyo ikpɔŋ-ikpɔŋ ke owo ada odu uwem, ke edi kpukpru se itode Jehovah ke inua ke owo ada odu uwem.

⁴ Edisine-ŋkpɔ fo ikatahake fi ke idem, ukot fo ikonyuŋ ifutke, ke ofuri isua aba emi.

⁵ Fiɔk ndien ke esit fo, ete ke nte owo ɔtunɔde eyen esiemɔ, kpa ntre ke Jehovah Abasi fo ɔtɔtunɔ fi.

⁶ Nyuŋ tiŋ enyin ke mme ewuhɔ Jehovah Abasi fo, ke ndisaŋa ke usuŋ esie, nnyuŋ mbak enye.

⁷ Koro Jehovah Abasi fo ke ada fi aka ndiduk ke eti isɔŋ, isɔŋ akpa, ye eke idim, ye edituŋɔ obube emi etode ke mme itihere ye ke ikpɔ obot:

⁸ isɔŋ wheat, ye eke barley, ye eke vine, ye eke eto fig, ye eke pomegranate; isɔŋ aran olive, ye eke aran-ɔkwɔk;

⁹ isɔŋ emi afo mudutaha uyo ke esit ke unana, udunanake baba ŋkpɔ kiet ke esit; isɔŋ emi itiat esie edide ukwak, emi afo edinyuŋ etibide okuk osio ke ikpɔ obot esie.

¹⁰ Adaŋemi afo adiade ŋkpɔ ɔyuhɔ, kɔm ndien Jehovah Abasi fo ke eti isɔŋ emi enye ɔnɔde fi.

¹¹ Tiŋ enyin mbak afo edifre Jehovah Abasi fo, ke eritre ndinim mbet esie, ye mme item esie, ye mme ewuhɔ esie emi ami ŋwukde fi mfin emi.

¹² Mbak afo edidia ŋkpɔ ɔyuhɔ, onyuŋ ɔbɔp ndiye ufɔk oduŋ ke esit;

¹³ enaŋ fo ye ŋkpri ufene fo edinyuŋ etɔt, silver ye gold enyuŋ ewak enɔ fi, kpukpru se afo enyenede onyuŋ ɔtɔt ŋko;

¹⁴ ndien esit fo edikpon, afo onyuŋ efre Jehovah Abasi fo, emi okosiode fi ke isɔŋ Egypt, ye ke ufɔk ufin;

¹⁵ emi akadade fi usuŋ ke akwa ye akpakop wilderness oro, ebiet ikaŋ-ikaŋ urukikɔt, ye eke scorpion, ye eke nsat-itɔŋ, emi mmɔŋ mikoduhe ke esit; emi okosiode mmɔŋ ke itiat a fransi ɔnɔ fi;

¹⁶ emi adade manna emi mme usɔ mikɔfiɔkke, ɔbɔk fi ke wilderness, man enye ɔsuhɔre fi onim, onyuŋ odomo fi, ete ifɔn ye afo ke utit fo;

¹⁷ mbak afo edidɔhɔ ke esit fo, ndien, ete, ke odudu fo ye ŋsɔŋubɔk fo ke ekekɔ kpukpru inyene emi enɔ imɔ.

¹⁸ Edi ti Jehovah Abasi fo: koro edi enye ɔnɔ fi odudu erikɔ inyene, man enye anam ediomi esie emi enye ɔkɔŋwɔŋɔde ɔnɔ mme usɔ ɔsɔŋɔ ada, kpa nte edide mfin emi.

¹⁹ Ndien ama ekem, edieke afo edifrede Jehovah Abasi fo, edinyuŋ etienede mme abasi eŋwen, onyuŋ anamde ido mmɔ, onyuŋ ɔnuhɔde ɔnɔ mmɔ, mmɔdɔhɔ mbaŋa mbufo mfin emi, nte ke edisobo mbufo tak-tak.

²⁰ Kpa nte mme idut emi Jehovah okosobode ke iso mbufo efep, kpasuk ntre ke edisobo mbufo; koro mbufo midinyimeke ndikop uyo Jehovah Abasi mbufo.