DEUTERONOMY 6 - Edisana ñwed Abasi Ibom

Akakan Ibet

¹ NDIEN mme mmɔ emi edi mbet, ye mme ewuhɔ, ye mme item, emi Jehovah Abasi mbufo okowukde ete ŋkpep mbufo, kpaŋ mbufo ekpenam mmɔ ke isɔŋ emi mbufo eyomde ndibe ŋka do ŋkada enye nnyene:

² man afo abak Jehovah Abasi fo, onyuŋ ekpeme kpukpru mme ewuhɔ esie, ye mbet esie, emi ami ntemede fi, afo, ye eyen fo, ye eyeyen fo, ofuri ini uwem fo; man mme usen fo enyuŋ ebigi.

³ O Israel, kop ndien, nyuŋ tiŋ enyin ndinam: man ɔfɔn fi, man mbufo enyuŋ etɔt eti-eti, ke isɔŋ emi ɔfiɔrɔde mmɔŋ-eba ye aran-ɔkwɔk, kpa nte Jehovah Abasi mme usɔ ɔkɔŋwɔŋɔde ɔnɔ fi.

⁴ O Israel, kop: Jehovah Abasi nnyin edi Jehovah kiet:

⁵ ma ndien Abasi fo ke ofuri esit fo, ye ke ofuri ukpɔŋ fo, ye ke ofuri odudu fo.

⁶ Ndien yak mme ikɔ emi ami ntemede fi mfin emi, edu fi ke esit:

⁷ nyuŋ dɔdiɔŋ siak mmɔ nɔ nditɔ fo, nyuŋ kama mmɔ ke inua fo ke ini afo etiede ke ufɔk fo, ye ini afo asaŋade ke usuŋ, ye ke ini afo anade ke isɔŋ, ye ke ini afo adahade ke enyɔŋ.

⁸ Nyuŋ yiri mmɔ ke ubɔk fo man edi idiɔŋɔ, yak enyuŋ edu fi ke ufɔt enyin nte frontlet.

⁹ Nyuŋ wet mmɔ ke obubɔk enyin-usuŋ fo, ye ke mme itim fo.

¹⁰ Ndien ama ekem ke Jehovah Abasi fo edidade fi oduk ke isɔŋ emi enye ɔkɔŋwɔŋɔde ɔnɔ mme usɔ, Abraham, ye Isaac, ye Jacob, ete iyenɔ fi ikpɔ ye nti obio, eke mikedige afo ɔbɔp,

¹¹ ye ufɔk eke kpukpru nti ŋkpɔ eyɔhɔde ke esit, eke mikedige afo ɔyɔhɔ. Ye obube mmɔŋ eke etibide, eke mikedige afo otibi, iŋwaŋ vine, ye eto olive eke mikedige afo ɔtɔ; ke afo edinyuŋ adiade ɔyuhɔ;

¹² ndien kpeme idem fo mbak afo edifre Jehovah, emi okosiode fi ke isɔŋ Egypt, ke ufɔk ufin efep.

¹³ Bak Jehovah Abasi fo, nyuŋ nam ŋkpɔ esie, nyuŋ tomo enyiŋ esie.

¹⁴ Mbufo ekutiene Abasi eŋwen, ke otu mme abasi mme idut emi ekande mbufo ekuk:

¹⁵ (koro Jehovah Abasi fo edide Abasi ufup ke otu fo); mbak Jehovah Abasi fo ediyat esit ye afo, ndien osobo fi efep ke iso isɔŋ.

¹⁶ Mbufo ekudomo Jehovah Abasi mbufo, kpa nte mbufo ekedomode enye ke Massah.

¹⁷ Mbufo etim enim mbet Jehovah Abasi mbufo, ye mme item esie, ye mme ewuhɔ esie, emi enye okowukde fi.

¹⁸ Nyuŋ nam se inende inyuŋ ifɔnde ke iso Jehovah: man ɔfɔn ye afo, man afo onyuŋ oduk ekenyene eti isɔŋ emi Jehovah ɔkɔŋwɔŋɔde ɔnɔ mme usɔ.

¹⁹ Ete iyebin kpukpru mme asua fo ifep ke iso fo, kpa nte Jehovah ɔkɔdɔhɔde.

²⁰ Ke eyen fo, edibupde fi ke ini iso, ete, Nsidi mbet, ye mme ewuhɔ, ye mme item emi Jehovah Abasi nnyin eketemede mbufo? Dɔhɔ ndien eyen fo, ete,

²¹ Nnyin ikedi ifin Pharaoh ke Egypt: ndien Jehovah ada ɔkpɔsɔŋ ubɔk osioŋo nnyin efep ke Egypt:

²² Jehovah okonyuŋ ada mme ikpɔ ye mme idiɔk idiɔŋɔ, ye mme utibe ŋkpɔ, anam Egypt, ye Pharaoh, ye ofuri ufɔk esie, ke iso nnyin:

²³ ntem ke enye okosioŋo nnyin do, man ada nnyin oduk, onyuŋ ɔnɔ nnyin isɔŋ emi enye ɔkɔŋwɔŋɔde ɔnɔ mme ete nnyin.

²⁴ Jehovah onyuŋ eteme nnyin ndinim kpukpru mme ewuhɔ esie, man nnyin ibak Jehovah Abasi nnyin, man ɔfɔn ye nnyin kpukpru ini, man enye onim nnyin ke uwem, kpa nte edide mfin emi.

²⁵ Ndien eyebat enye ke edinen ido enɔ nnyin, ke nnyin ikpemede ndinam kpukpru mme ewuhɔ emi ke iso Jehovah Abasi nnyin, kpa nte enye okowukde nnyin.