DEUTERONOMY 34 - Edisana ñwed Abasi Ibom

Moses Akpa Ndien Joshua Ada Itie Esie

¹ EKEM Moses oto ke una-isɔŋ Moab aka ɔkɔdɔk obot Nebo, aka ibuot Pisgah emi asakde iso ese Jericho. Ndien Jehovah owut enye ofuri isɔŋ Gilead, tutu osim ke Dan,

² ye ofuri Naphtali, ye isɔŋ Ephraim ye Manasseh, ye ofuri isɔŋ Judah,

³ tutu osim ke inyaŋ edem usop-utin, ye edem usuk, ye edem itihere Jericho, obio eyop, tutu osim ke Zoar.

⁴ Ndien Jehovah ɔdɔhɔ enye, ete, Emi edi isɔŋ emi ŋkɔŋwɔŋɔde nnɔ Abraham, ye Isaac, ye Jacob, nte, Nyeda enye nnɔ ubon fo: mmayak fi okut ke enyin, edi udubehe uka do.

⁵ Ndien Moses owo Jehovah akpa do ke isɔŋ Moab, ke uyo Jehovah.

⁶ Ndien enye obuk enye ke ebedeŋ kiet, ke isɔŋ Moab, emi asakde iso ese Beth-poer; edi baba owo kiet ifiɔkke udi esie tutu osim mfin emi.

⁷ Ndien Moses osim isua ikie ye edip ke ini enye akpade: enyin ikimke enye odudu esie inyuŋ imemke.

⁸ Ndien nditɔ Israel etuaŋa Moses usen aba ye duop ke una-isɔŋ Moab: ndien usen emi mmɔ etuaŋade Moses ekure.

⁹ Ndien spirit ɔniɔŋ ɔyɔhɔ Joshua eyen Nun ke idem: koro Moses akadade ubɔk esie odori enye ke idem: ndien nditɔ Israel ekop uyo esie, enyuŋ enam kpa nte Jehovah eketemede Moses.

¹⁰ Ndien baba prophet kiet, ebietde Moses, idahake aba ida ke otu Israel, emi Jehovah ɔfiɔkde iso ke iso,

¹¹ ke kpukpru mme idiɔŋɔ ye mme utibe ŋkpɔ emi Jehovah ɔdɔŋde enye, ete anam ke isɔŋ Egypt, ye Pharaoh, ye kpukpru ikɔt esie, ye ofuri isɔŋ esie,

¹² ye ke ofuri nsɔŋubɔk oro, ye kpukpru akpakop ŋkpɔ ndik emi Moses akanamde ke iso ofuri Israel.