DEUTERONOMY 33 - Edisana ñwed Abasi Ibom

Akpatre Edidiɔŋ Emi Moses Ɔkɔdiɔŋde Nditɔ Israel

¹ EMI onyuŋ edi eridiɔŋ emi Moses, owo Abasi, adade ɔdiɔŋ nditɔ Israel, ke enye mika-ikpaha kaŋa.

² Ndien enye ɔdɔhɔ, ete, Jehovah okoto ke Sinai edi, onyuŋ asiaha ke Seir ɔnɔ mmɔ; enye etie ke obot Paran ayama, onyuŋ asaŋa ye tɔsin edisana ikɔt duop edi: ikaŋ oto enye ke ubɔk nnasia ke ewuhɔ mmɔ.

³ Ŋkɔm enye amama mme idut; edisana ikɔt esie edu fi ke ubɔk: mmɔ enyuŋ esuhɔre etie fi ke ukot; mmɔ eyebɔ ikɔ fo.

⁴ Moses okowuk nnyin ewuhɔ, kpa udeme emi esop Jacob edinyenede.

⁵ Enye okonyuŋ edi edidem ke Jeshurun, ke adaŋemi ikpɔ owo obio ye mme esien Israel esopde idem mmɔ ke ɔtɔ kiet.

⁶ Yak Reuben odu uwem, okukpa; ubon esie okunyuŋ edi esisit.

⁷ Ndien emi edi eke Judah: ndien enye ɔdɔhɔ ete, O Jehovah, kop uyo Judah, nyuŋ da enye sɔk oruk esie: ubɔk esie eŋwana enɔ enye; afo eyenyuŋ anyaŋa enye osio mme asua esie ke ubɔk.

⁸ Enye onyuŋ ɔdɔhɔ abaŋa Levi, ete, Akpanikɔ Fo ye uŋwana Fo eyedu ye owo emi Afo amade, emi Afo okodomode ke Massah, okonyuŋ ɔtɔhɔde ye enye ke ikɔ mmɔŋ Meribah:

⁹ emi ɔdɔhɔde abaŋa ete esie ye eka esie, ete, Nsehe enye; minyuŋ idiɔŋɔke nditɔ-eka esie, minyuŋ ifiɔkke nditɔ esiemɔ: koro mmɔ ekpemede ikɔ Fo, enyuŋ enimde ediomi Fo.

¹⁰ Mmɔ eyeteme Jacob mme item fo, enyuŋ eteme Israel mbet fo: eyenim incense ke iso fo, enim ofuri edifɔp uwa ke itie-uwa fo.

¹¹ O Jehovah, diɔŋ odudu esie, nyuŋ ma utom ubɔk esie: tɔ mmɔ eke enamde ikɔ ye enye ke isin, nyuŋ tɔ mme asua esie, man ekutɔŋɔ ntak enam ikɔ.

¹² Enye ɔdɔhɔ abaŋa Benjamin, ete, Eyen ima Jehovah eyeduŋ ke ifure ye enye; Enye ofuk enye kpukpru ini, enye onyuŋ oduŋ ke ufɔt afara Esie.

¹³ Ndien enye ɔdɔhɔ abaŋa Joseph, ete, Isɔŋ esie edi se Jehovah ɔdiɔŋde, ke ata nti ŋkpɔ enyɔŋ, ke mbara, ye ke ntuŋɔ mmɔŋ emi anade ke idak,

¹⁴ ye ke ata nti ŋkpo emi etode ke utin ye ke ŋkpɔ uto emi ɔfiɔŋ oŋwomde,

¹⁵ ye ke mbuot ikpɔ obot eset, ye ke ata nti ŋkpɔ nsinsi obot,

¹⁶ ye ke ata nti ŋkpɔ isɔŋ ye se iyɔhɔde enye ke esit, ye ima Enye emi eketiede ke eto: yak odoro Joseph ke ibuot, ye ke etiŋ-ibuot enye emi mmɔ ekdianarede ke nditɔ-ete esie efep.

¹⁷ Ubɔŋ enyene akpa eyen ayara enaŋ esie, nduk esie enyuŋ ebiet nduk editim: enye ada mmɔ atuak mme idut, ebin mmɔ ɔtɔ kiet ekesin ke utit isɔŋ: ndien mmɔ edi mme tɔsin Ephraim duop, mmɔ enyuŋ edi mme tɔsin Manasseh.

¹⁸ Ndien enye ɔdɔhɔ abaŋa Zebulun, ete, Zebulun, dat esit ke eriwɔrɔ fo.

¹⁹ Issachar, nyuŋ dat esit ke mme tent fo. Mmɔ eyekot mme idut edi ke obot; do ke ediwa mme uwa eke enende: koro mmɔ ewapde uwak ikpɔ inyaŋ, ye nti ŋkpɔ emi edibede ke ntan.

²⁰ Ndien enye ɔdɔhɔ abaŋa Gad, ete, Ekɔm andinam Gad okpon: enye oduŋ nte lion, onyuŋ awai ubɔk ye etiŋ-ibuot.

²¹ Enye onyuŋ oyom akpa ubak ke idem esie: koro enimde udeme etubom do: enye onyuŋ edi ke ɔtɔ ikpɔ owo obio; enye anam edinen ido Jehovah, onyuŋ ekpe ikpe esie ke Israel.

²² Ndien enye ɔdɔhɔ abaŋa Dan, ete Dan edi eyen lion: enye obumere oto ke Bashan.

²³ Enye onyuŋ ɔdɔhɔ abaŋa Naphtali, ete, O Naphtali, ɔmɔyuhɔ nti enɔ, nti ŋkpɔ Jehovah emenyuŋ eyɔhɔ fi ke idem: da edem usop-utin ye edem usuk nyene.

²⁴ Ndien enye ɔdɔhɔ abaŋa Asher, ete, Yak ɔfɔn ye Asher akan nditɔ (eken); yak enye enem nditɔ-ete esie esit, enyuŋ edebi ukot esie ke aran.

²⁵ Ikpa-ukot fo edi ukwak ye okpoho; yak nduɔk-odudu fo onyuŋ ebigi nte mme usen fo.

²⁶ O Jeshurun, baba kiet eke ebietde Abasi iduhe; enye odoro ke enyɔŋ anyaŋa fo, onyuŋ ada ubɔŋ esie odoro ke ikpa-enyɔŋ.

²⁷ Nsinsi Abasi edi ebiet iduŋ, nsinsi ubɔk enyuŋ edu ke idak: ndien enye eyebin mme asua ke iso fo efep, onyuŋ ɔdɔhɔ ete, Sosobo.

²⁸ Ndien Israel oduŋ ke ifure ikpɔŋ ke idem esie, idim Jacob oduŋ ke isɔŋ ibokpot ye wine; enyɔŋ esie onyuŋ ɔtɔi mbara.

²⁹ Ɔfɔfɔn ɔnɔ fi, O Israel; anie ebiet fi, mbio emi Jehovah anyaŋade, emi edide otu ekɔŋ eke ekpemede fi, emi onyuŋ edide ofut ubɔŋ fo; mme asua fo eyenyuŋ enem inua enɔ fi; afo eyenyuŋ edigi ŋkokoŋo ebiet mmɔ.