DEUTERONOMY 32 - Edisana ñwed Abasi Ibom

Moses Etiŋ Mme Ewuhɔ Abasi Ɔnɔ Nditɔ Israel Ke Ikwɔ

¹ MBUFO mme enyɔŋ ekpaŋ utɔŋ, ndien nyedɔhɔ; O isɔŋ, nyuŋ kop ikɔ inua mi.

² Item mi eyedep nte edim, uyo mi eyetɔi nte mbara, nte asak-asak edim ke mbiet, ye nte ɔkpɔsɔŋ edim ke ikɔŋ.

³ Koro nyetaŋa enyiŋ Jehovah; mbufo enɔ Abasi nnyin ubom.

⁴ Akwa itiat, utom esie ɔfɔn ama: koro kpukpru usuŋ esie enende: Abasi akpanikɔ emi minamke ukwaŋkpɔ, enye edi eti ye edinen.

⁵ Enye (Israel) amakabare ɔdiɔk ye enye, ndo mmɔ idige eke nditɔ esie: ke edi emana itun ye ukwaŋ.

⁶ Nte mbufo esio usiene ntem enɔ Jehovah, mbon ndisime ye unana ibuot? Nte idige enye edi usɔ emi akafakde fi? Edi enye akanam fi, onyuŋ ɔdiɔŋ fi onim.

⁷ Ti mme usen eset, mbufo ekere isua eyo oko: bup usɔ, ndien enye eyetiŋ ɔnɔ fi; bup mbiowo fo, ndien mmɔ eyedɔhɔ fi.

⁸ Ke ini ata Andikoŋ ɔnɔde mme idut udeme mmɔ, ke ini enye abaharede nditɔ owo, enye onim adaŋa mme idut, nte ibat nditɔ Israel asaŋade.

⁹ Koro udeme Jehovah edi ikɔt esie: Jacob edi ubak emi enye odomode ada.

¹⁰ Enye okokut enye ke isɔŋ desert, ye ke wilderness, ebiet emi mme unam etuade; akan enye okuk, onyuŋ etiŋ enye enyin ke idem, ekpeme enye nte eyen enyin.

¹¹ Nte ntrukpom otimerede efɔk esie, okubɔ nditɔ esie, atat mba esie emen mmɔ, obiom mmɔ ke mba esie;

¹² (kpa ntre ke) Jehovah ikpɔŋ-ikpɔŋ ada enye usuŋ, esen abasi inyuŋ iduhe ye enye.

¹³ Enye anam enye odoro unam asaŋa ke ŋkokoŋo ebiet, isɔŋ, onyuŋ adia mbuŋwum ŋkpɔ iŋwaŋ; onyuŋ osio aran-ɔkwɔk ke itiat ɔnɔ enye awap, ye aran ke itiat flint;

¹⁴ edibari mmɔŋ eba enaŋ, ye mmɔŋ-eba ŋkpri ufene, ye ikpɔŋ nditɔ erɔŋ, ye okukim oruk Bashan, ye okpo ebot, ye wheat ikpɔŋ ekput; afo onyuŋ ɔŋwɔŋ iyip grape, kpa wine.

¹⁵ Ndien Jeshurun akabare esehe, onyuŋ etiga; afo emesehe, omokpon, ɔmɔyɔhɔ; ndien enye ɔkpɔŋ Abasi emi akanamde enye, onyuŋ esin Akwa Itiat eriyaŋa esie ke ndek.

¹⁶ Mmɔ eda isen abasi esin enye ofibe ufup, eyat enye esit ke mbubiam ŋkpɔ mmɔ.

¹⁷ Mmɔ ewa uwa enɔ ekpo, eke midige Abasi: abasi eke mmɔ mikefiɔkke, mbufa abasi eke etode edi ke idahemi eke mme ete mbufo mikebakke.

¹⁸ Afo utihe Akwa Itiat emi okobonde fi, onyuŋ efre Abasi emi okobotde fi.

¹⁹ Ndien Jehovah okut, onyuŋ asua, abaŋa eriyat emi nditɔ-iren esie ye nditɔ-iban esie eyatde enye esit.

²⁰ Ndien enye ɔdɔhɔ ete, Nyedip mmɔ iso mi, nyekut nte utit mmɔ editiede: koro mmɔ edide ndisime emana, nditɔ eke akpanikɔ miduhe mmɔ ke esit.

²¹ Mmɔ ema eda se midige Abasi esin mi mfibe ufup; ema eda mbukpo ŋkpɔ mmɔ eyat mi esit: ami ŋko nyeda se midige idut nsin mmɔ efibe ufup; nyeda ndisime obio nyat mmɔ esit.

²² Koro ikaŋ obuberede ke iyaresit mi, eyenyuŋ ɔfɔp tutu osim ke udem hell, onyuŋ ata isɔŋ ye mbuŋwum-ŋkpɔ esie, onyuŋ okim ikaŋ ke itie obot.

²³ Nyekubi mmɔ mme idiɔk-ŋkpɔ ke idem; nyema idaŋ mi ke idem mmɔ.

²⁴ Biɔŋ esin idem ɔduɔhɔ mmɔ, idiɔk udɔŋɔ ye edidoro nsobo enyuŋ esomo mmɔ: ndien nyedɔŋ ndet mme idiɔk unam, ye ifɔt mme andinyɔni ke ntan, nte ekenam mmɔ.

²⁵ Ofut ke aŋwa, ye ndik ke ubet etera mkparawa ye nditɔ-iban, eyen-nsek, ye owo eke otibede iwat.

²⁶ Ŋkɔdɔhɔ nte ŋkpofuri mmɔ mfep, ŋkpanam owo etre nditi mmɔ:

²⁷ ke mmeŋkpefeheke iyaresit mbon usua, mbak mme andikɔbɔ mmɔ ekpedue, mbak mmɔ ekpedɔhɔ ete, Ubɔk nnyin okokoŋ, inyuŋ idige Jehovah akanam kpukpru ŋkpɔ emi.

²⁸ Koro mmɔ edide idut unana ibuot, asian inyuŋ iduhe ke otu mmɔ.

²⁹ Ema ekpenyene ibuot, mmɔ ekpetim efiɔk emi, ekpekere utit mmɔ!

³⁰ Owo kiet ekpekeme didie ndibine tɔsin, iba ekpenyuŋ ekeme didie ndisin tɔsin duop efeŋe, ke midige Akwa Itiat mmɔ akanyam mmɔ, Jehovah okonyuŋ ayak mmɔ ɔnɔ?

³¹ Koro itiat mmɔ mibietke Akwa Itiat nnyin, edi mme asua nnyin edomo ese.

³² Koro vine mmɔ okotode ke vine Sodom, ye ke iŋwaŋ vine Gomorrah: mfri vine mmɔ edi mfri ibɔk ubio, mme etuek mmɔ ededoro:

³³ wine mmɔ edi ifɔt urukikɔt, ye ubio ibɔk ibɔm emi edehede.

³⁴ Nte inimke emi ye ami, ikɔbike ke ubet unim ŋkpɔ mi?

³⁵ Ufen ye usiene edi okim; ukot mmɔ eyefiɔnɔde ke ekem ini: koro usen nditaha mmɔ emekpere, ndien se ibeŋede mmɔ ke ɔnyuŋ ɔsɔp itɔk edi.

³⁶ Koro Jehovah eyekpe ikpe ikɔt esie, eyenyuŋ ɔkpuhɔre ido ye ifin esie, ke ini enye okutde nte odudu ɔbɔhɔde mmɔ, ye nte ofin ye eyen isɔŋ miduhe aba.

³⁷ Ndien enye eyedɔhɔ ete, Mme abasi mmɔ edu mmɔŋ, kpa itiat emi mmɔ ekebuɔtde idem mmɔ ke esit:

³⁸ emi eketade ikpɔŋ mme uwa mmɔ, enyuŋ eŋwɔŋde wine ediŋwɔŋ uwa mmɔ? Yak mmɔ edaha-eda enyaŋa mbufo, enyuŋ edi itie-udibe mbufo.

³⁹ Mbufo ese, ndien, ete ke ami, ami, ndi enye, abasi inyuŋ iduhe idian ye ami: ami ŋwot, nnyuŋ nnim owo uwem; ami nnɔ unan, nnyuŋ nsiri: baba owo kiet eke osiode ke ubɔk mi, inyuŋ iduhe.

⁴⁰ Koro mmenerede ubɔk mi ke enyɔŋ, nnyuŋ ndɔhɔ nte, Ke ndu uwem ke nsinsi.

⁴¹ Mma mban ofut mi, obuma, ubɔk mi ama onyuŋ emen ufen, nyesio usiene ye mme asua mi, nnyuŋ nnɔ mmɔ eke esuade mi ŋkpɔ eyen-utom.

⁴² Nyenɔ idaŋ mi iyip eŋwɔŋ eyuhɔ, ofut mi eyenyuŋ ata unam; kpa iyip mmɔ eke ekpaŋade afai, eke owo onyuŋ omumde, kpa ibuot mme etubom mme asua.

⁴³ Mbufo mme idut, etiene ikɔt esie esioŋo mkpo idara: koro enye omosio usiene iyip ifin esie, omonyuŋ osio usiene ye mme asua esie, onyuŋ osio isop isɔŋ esie, kpa eke ikɔt esie.

⁴⁴ Ndien Moses aka eketiŋ kpukpru ikɔ ikwɔ emi ke utɔŋ kpukpru owo, enye, ye Hoshea eyen Nun.

⁴⁵ Ekem Moses ama eketiŋ kpukpru ikɔ emi ɔnɔ nditɔ Israel ama:

⁴⁶ ndien enye ɔdɔhɔ mmɔ, ete, Mbufo esin esit mbufo ke kpukpru ikɔ emi ami ntiŋde ke otu mbufo mfin emi, emi mbufo editemede nditɔ mbufo, man ekpeme ndinam kpukpru ikɔ mbet emi.

⁴⁷ Koro enye midige ŋkpɔ mbubru ye mbufo: koro edide uwem mbufo: ndien mbufo eda ŋkpɔ emi edinam mme usen mbufo ebigi ke isɔŋ emi mbufo ebede Jordan eka do ndida enye nnyene.

⁴⁸ Ndien Jehovah ɔdɔhɔ Moses ke kpasuk usen oro, ete,

⁴⁹ Dɔk ke obot Abarim emi, kpa obot Nebo, emi odude ke isɔŋ Moab, emi asakde iso ese Jericho; ndien se isɔŋ Canaan, emi ami nnɔde nditɔ Israel nte eda enyene;

⁵⁰ ndien afo eyekpa ke obot emi afo akade ndidɔk do, onyuŋ etiene oruk fo; kpa nte Aaron akakpade ke obot Hor, onyuŋ etienede oruk esie:

⁵¹ koro mbufo ekeduede mi ke otu nditɔ Israel ke ikɔ mmɔŋ utɔk Kadesh, ke wildeness Zin; koro mbufo mikekponoke mi ke otu nditɔ Israel.

⁵² Koro afo eyekut isɔŋ oro ko; edi udukaha do ukoduk ke isɔŋ emi ami nnɔde nditɔ Israel.