DEUTERONOMY 28 - Edisana ñwed Abasi Ibom

Mme Edidiɔŋ Emi Odude ke Owo Ndinim Ibet ye Mme Isuŋi ke Owo Ndisɔŋ Ibuot

¹ NDIEN ama ekem, edieke afo mudutreke ndikop uyo Jehovah Abasi fo, ke nditim nnim kpukpru mme ewuhɔ esie, emi ami ŋwukde fi mfin emi, Jehovah Abasi fo eyefori fi akan kpukpru mme idut ke ererimbot:

² ndien kpukpru nti ŋkpɔ emi eyetiene fi, enyuŋ esim fi, koro afo okopde uyo Jehovah Abasi.

³ Eyefɔfɔn ɔnɔ fi ke obio, onyuŋ ɔfɔfɔn ɔnɔ fi ke iŋwaŋ.

⁴ Eyefɔfɔn ɔnɔ mfri idibi fo, ye mfri iŋwaŋ fo, ye mfri ufene fo, ye nditɔ enaŋ fo, ye nditɔ ŋkpri ufene fo.

⁵ Eyefɔfɔn ɔnɔ akpasa fo ye ŋkpɔ unuak ndom-uyo fo.

⁶ Eyefɔfɔn ɔnɔ fi ke ini afo odukde, onyuŋ ɔfɔfɔn ɔnɔ fi ke ini afo ɔwɔrɔde.

⁷ Jehovah eyeda mme asua fo eke edahade eda eŋwana ekɔŋ ye afo, onim fo ke iso asuan mmɔ: mmɔ eyewɔŋɔ ekɔŋ ye afo ke usuŋ kierakiet, edi ke usuŋ itiaba ke mmɔ edifeŋe ke iso fo.

⁸ Jehovah eyewuk ete ɔfɔfɔn ɔnɔ fi ke mme ebiet unim-ŋkpɔ fo, ye ke kpukpru se afo edinyande ubɔk fo ke esit; enye eyenyuŋ ɔdiɔŋ fi ke isɔŋ emi Jehovah Abasi fo ɔnɔde fi.

⁹ Jehovah eyenim fi ke edisana ikɔt esiemɔ, kpa nte enye ɔkɔŋwɔŋɔde ɔnɔ fi, edieke afo edinimde mbet Jehovah, kpa nte enye ɔkɔŋwɔŋɔde ɔnɔ fi, edieke afo onyuŋ asaŋade ke usuŋ esie.

¹⁰ Ndien kpukpru mme idut ke ererimbot eyekut nte afo ekerede enyiŋ Jehovah; ndien ndik fo eyenam mmɔ.

¹¹ Ndien Jehovah eyenam fi awak ke nti ŋkpɔ, ke mfri idibi fo, ye ke mfri iŋwaŋ fo, ke isɔŋ emi Jehovah ɔkɔŋwɔŋɔde ɔnɔ mme usɔ, ete eyenɔ fi.

¹² Jehovah eyesio usuŋ ebiet unim nti ŋkpɔ esie ɔnɔ fi, eke enyɔŋ, ndinɔ isɔŋ fo edim ke ekem ini, nnyuŋ ndiɔŋ kpukpru se ubɔk fo anamde: ndien afo eyenɔ ediwak mme idut ebuɔt, edi mmɔ idibuɔtke fi.

¹³ Ndien Jehovah eyenim fi ke ibuot, idinimke ke isim; afo eyenyuŋ odoro ke enyɔŋ-enyɔŋ, ududuhe ke idak; edieke afo edikopde mbet Jehovah Abasi fo emi ŋwukde fi mfin emi, nte ekpeme onyuŋ anam mmɔ:

¹⁴ kunyuŋ ufep idem ke baba ikɔ kiet eke ami ntemede mbufo mfin emi, uwaha uka ke nnasia, mme ke ufien ŋketiene mme abasi efen nnam ŋkpɔ mmɔ.

¹⁵ Ndien ama ekem edieke afo mukopde uyo Jehovah Abasi fo, munyuŋ utimke unim kpukpru mbet esie ye mme ewuhɔ esie emi ami ntemede fi mfin emi; ndien kpukpru mme idiɔk-ŋkpɔ emi eyebine fi:

¹⁶ eyedɔdiɔk ɔnɔ fi ke obio, eyenyuŋ ɔdɔdiɔk ɔnɔ fi ke iŋwaŋ.

¹⁷ Eyedɔdiɔk ɔnɔ akpasa fo, ye ŋkpɔ unuak ndom-uyo fo.

¹⁸ Eyedɔdiɔk ɔnɔ mfri idibi fo, ye mfri iŋwaŋ fo, ye nditɔ enaŋ fo, ye nditɔ ŋkpri ufene fo.

¹⁹ Eyedɔdiɔk ɔnɔ fi ke ini afo odukde, eyenyuŋ ɔdɔdiɔk ɔnɔ fi ke ini afo ɔwɔrɔde.

²⁰ Jehovah eyedɔŋ isuŋi, ye ndik, ye nduari, etiene fi, ke kpukpru se afo edinyande ubɔk fo ke esit ndinam, tutu edisobo fi ema, tutu afo onyuŋ atak ke iwiwa; kabaŋa mme idiɔk ido fo: koro afo ɔkɔkpɔŋde mi.

²¹ Jehovah eyenam idiɔk udɔŋɔ eyire fi, tutu enye osobo fi efep ke isɔŋ emi afo akade do ndida enye nnyene.

²² Jehovah eyeda ndiɔkidem, ye ufiopidem, ye ŋkunya, ye oyo, ye ofut, ye ikaŋ-ekpo, ye mfut, amiŋa fi: ndien mmɔ eyebine fi tutu esobo fi ema.

²³ Ndien ikpa-enyɔŋ fo emi odorode fi ke ibuot eyedi okpoho, isɔŋ ke idak eyenyuŋ edi ukwak.

²⁴ Jehovah eyenam edim isɔŋ fo akabare edi obu ye ntan: eyeto ke ikpa-enyɔŋ edep fi ke idem, tutu afo abiara ama.

²⁵ Jehovah eyenim fi ke iso mme usua fo, ete esuan fi: afo eyewɔrɔ aka ekɔŋ ye mmɔ ke usuŋ kierakiet, ndien eyefehe ke iso mmɔ ke usuŋ itiaba: ndien afo eyedi se kpukpru mme idut ererimbot enukde.

²⁶ Ndien okpo fo eyedi udia kpukpru inuen enyɔŋ, ye eke mme unam ikɔt, ndien owo eke edibinde mmɔ efep ididuhe.

²⁷ Jehovah eyeda oyo Egypt, ye mme emerod, ye ndɔk ye mfat, amiŋa fi, ndien afo udukwe nte enamde mmɔ ekure fi.

²⁸ Jehovah eyeda idat, ye nnan, ye nyomo-nsia amiŋa fi:

²⁹ ndien afo eyefiɔŋɔ ubɔk ke ufɔt uwem-eyo, kpa nte nnan ɔfiɔŋɔde ke ekim, ŋkpɔ fo idinyuŋ iwɔrɔke usuŋ: ndien afo eyesuk edi se efikde enyuŋ ebumede kpukpru ini, ndien owo eke anyaŋade fi ididuhe.

³⁰ Afo eyebem ŋwan onim, edi owo efen edida enye ɔdɔ: eyebɔp ufɔk, ndien ududuŋke ke esit: eyetɔ iŋwaŋ vine, ndien udutetke mfri esie.

³¹ Eyewot enaŋ fo ke iso fo, ndien udusioho ŋkpɔ ke esit uta: eyebume ass fo ke iso fo, ndien idisanake aba iyak inɔ fi: eyeda ŋkpri ufene fo enɔ mme asua fo, ndien owo eke anyaŋade mmɔ ɔnɔ fi ididuhe.

³² Eyeda nditɔ-iren fo ye nditɔ-iban fo ɔnɔ idut efen, ndien afo eyedori mmɔ enyin fo ese, ofuri usen tutu akak: ndien ididuhe ke odudu ubɔk fo.

³³ Idut eke afo mufiɔkke eyedia mfri iŋwaŋ fo, ye ofuri utom fo; ndien afo eyesuk edi se efikde, enyuŋ etukde, kpukpru usen.

³⁴ Ndien afo eyedama idat abaŋa se edikutde ke enyin fo.

³⁵ Jehovah eyeda idiɔk eyo eke midikopke ibɔk, amia fi ke edɔŋ fo, ye ke idibi ukot fo, ɔtɔŋɔde ke ikpat ukot fo tutu osim etiŋ-ibuot fo.

³⁶ Jehovah eyeda fi, ye edidem fo eke afo edinimde ke idem fo, aka idut eke afo ye mme usɔ mikɔfiɔkke; ndien do ke afo edinam ŋkpɔ mme abasi efen, eke eto ye itiat.

³⁷ Ndien afo eyedi ŋkpɔ mkpa-idem, ye ikwɔ, ye ufiet ke otu kpukpru mme idut eke Jehovah adade fi aka do.

³⁸ Afo eyesio ediwak mkpasip aka iŋwaŋ, edi editaŋ esisit: koro ŋkukuŋkpɔyɔriyɔ editade enye.

³⁹ Afo eyetɔ iŋwaŋ wine, onyuŋ ɔdiɔŋ, edi uduŋwɔŋke vine, udunyuŋ utetke mfri: koro itut editade enye.

⁴⁰ Afo eyenyene eto olive ke kpukpru adaŋa fo, edi uduyereke aran: koro olive fo eyeduɔhɔ idem.

⁴¹ Afo eyebon nditɔ-iren ye nditɔ-iban, edi ududiaha uku mmɔ: koro eyetaŋ mmɔ efep.

⁴² Ŋkukuŋkpɔyɔriyɔ eyeta kpukpru eto fo ye mfri iŋwaŋ fo.

⁴³ Esen owo eke odude ke otu fo eyeforo akan fi eti-eti; ndien afo eyesuhɔre oduk ke idak.

⁴⁴ Enye eyenɔ fi ebuɔt, ndien afo udunɔŋɔ enye ebuɔt: enye eyedi ibuot, ndien afo eyedi isim.

⁴⁵ Ndien kpukpru mme idiɔk-ŋkpɔ emi eyedoro fi, enyuŋ ebine fi, enyuŋ esim fi, tutu afo atak: koro mukokopke uyo Jehovah Abasi fo, munyuŋ unimke mbet esie ye mme ewuhɔ esie emi enye okowukde fi.

⁴⁶ Ndien mmɔ eyedoro fi ye nditɔ fo ke idem ke nsinsi, ke idiɔŋɔ ye ŋkpɔ ndyɔ.

⁴⁷ Koro mukanamke ŋkpɔ Jehovah Abasi fo ke idara, ye ke inemesit, ke ini kpukpru ŋkpɔ ewakde;

⁴⁸ ndien afo eyenam ŋkpɔ mme asua fo eke Jehovah edidɔŋde etiene fi, ke biɔŋ, ye ke nsat-itɔŋ ye ke iferi, ye ke unana kpukpru ŋkpɔ: ndien enye eyekɔŋɔ fi ŋkpɔ ukwak ke itɔŋ, tutu enye osobo fi ama.

⁴⁹ Jehovah eyeda idut ke anyan ebiet, ke utit ererimbot, etiene fi, kpa nte ntrukpom efede; idut eke afo mudukopke usem mmɔ;

⁵⁰ aŋwai-enyin idut eke miditeŋeke mbiowo enyin, midinyuŋ ituaha nditɔwɔŋ mbɔm:

⁵¹ ndien enye eyedia mfri ufene fo, ye mfri iŋwaŋ fo, tutu afo abiara: idut eke midikpɔŋke baba ibokpot, ye obufa wine, ye aran, ye nditɔ enaŋ fo, ye nditɔ ŋkpri ufene fo, tutu enye osobo fi ama.

⁵² Ndien enye eyekan fi okuk ke kpukpru obio fo, tutu ŋkokoŋo ye mkpɔsɔŋ ibibene fo, emi afo ɔbuɔtde idem fo ke esit, eduɔŋɔ ke ofuri isɔŋ fo: ndien enye eyekan fi okuk ke kpukpru obio fo, ke ofuri isɔŋ fo emi Jehovah Abasi fo ɔnɔde fi.

⁵³ Ndien afo eyeda mfri idibi fo, kpa unam nditɔ-iren fo ye eke nditɔ-iban fo, eke Jehovah Abasi fo ɔnɔde fi, ata ke ukuk obio, ye ke mbaba eke mme asua fo edisinde fi:

⁵⁴ ndien owo mmemido ye ndiin ke otu fo eyeda idiɔk enyin ese eyen-eka esie, ye ŋwan ikpanesit esie, ye nditɔ esie eŋwen eke enye edisuhɔde:

⁵⁵ ndien enye idinɔŋɔ owo mmɔ baba kiet unam nditɔ esie eke enye editade: koro baba ŋkpɔ kiet midisuhɔke inɔ enye ke ukuk obio, ye ke mbaba eke mme asua fo edisinde fi, ke kpukpru obio fo.

⁵⁶ Ŋwan mmemido ye ndiin ke otu fo, eke ndiin ye mmemido minyimeke enye onim ikpat esie ke isɔŋ, kpa enye eyeda idiɔk enyin ese ebe ikpanesit esie, ye eyen-eren esie, ye eyen-aŋwan esie,

⁵⁷ ye obiet eke otode enye ke idibi, ye nditɔ esie eke enye edimande: koro enye eyeta mmɔ ke ndibe ke unana kpukpru ŋkpɔ ke uku obio, ye ke mbaba emi mme asua fo edisinde fi ke obio mbufo.

⁵⁸ Edieke afo mukpemeke ndinim kpukpru ikɔ mbet emi ewetde ke ŋwed emi, ndinyuŋ mbak enyiŋ ukpono ye ndik emi, JEHOVAH ABASI FO;

⁵⁹ ndien Jehovah eyenam ufen fo, ye ufen ubon fo edi utibe, ikpɔ ye odutdut ufen, ye mme idiɔk ye odutdut udɔŋɔ.

⁶⁰ Enye eyenyuŋ ada kpukpru mme idiɔk udɔŋɔ Egypt emi afo ekefehede, anam fi; ndien mmɔ eyeyire fi.

⁶¹ Ndien ŋko ama edi kpukpru udɔŋɔ, ye kpukpru ufen emi miwetke ke ŋwed ibet emi, Jehovah eyenyuŋ anam mmɔ etiene fi.

⁶² Ndien mbufo eyesuk owo esisit eti-eti, emi mbufo ekewakde nte ntanta-ɔfiɔŋ ke enyɔŋ; koro afo mukonyimeke ndikop uyo Jehovah Abasi fo.

⁶³ Ndien ama ekem, nte Jehovah akadatde esit abaŋa mbufo, ndifɔn ye mbufo, nnyuŋ nnam mbufo ewak; kpa ntre ke Jehovah edinyuŋ adat esit abaŋa mbufo ndibiat mbufo, nnyuŋ nsobo mbufo; ndien eyedibere mbufo efep ke isɔŋ emi mbufo ekade do ndida enye nnyene.

⁶⁴ Ndien Jehovah eyesuan fi ke oto kpukpru mme idut, ɔtɔŋɔde ke utit ererimbot oko, tutu osim ke utit ererimbot eken; ndien do ke afo edinam ŋkpɔ mme abasi efen, eke afo ye mme usɔ mikɔfiɔkke, eke eto ye itiat.

⁶⁵ Ndien afo udukwe nsuk-itie ke otu mme obio oro, ikpat ukot fo idinyuŋ ikwe nduɔk-odudu: ndien do ke Jehovah edinɔ fi esit ndutime, ye nnaneyin, ye nyomo-nsia:

⁶⁶ uwem fo enyenyuŋ ɔkɔŋɔ ke iso fo; afo eyenyuŋ edikhe ke okoneyo ye ke uwemeyo, udunyuŋ uberike idem ke uwem fo:

⁶⁷ afo eyedɔhɔ ke usenubɔk, ete, Akpakam edi mbubreyo; eyenyuŋ ɔdɔhɔ ke mbubreyo, ete, Akpakam edi usenubɔk, oto ke esit ndutime eke editimerede fi, onyuŋ abaŋa se enyin fo edikutde.

⁶⁸ Ndien Jehovah eyenam fi afiak ke Egypt ke ubom mbakara ke usuŋ emi ŋkɔdɔhɔde fi mbaŋa, nte, Ke udukwe aba enye: ndien do ke edinyam mbufo enɔ mme asua mbufo ke ifin iren ye ifin iban, ndien owo eke edepde ididuhe.