DEUTERONOMY 27 - Edisana ñwed Abasi Ibom

Ewet Ibet ke Itiat Enyuŋ Enam Itie Uwa Itiat ke Obot Ebal

¹ NDIEN Moses ye mbiowo Israel ewuk kpukpru owo, ete, Mbufo enim kpukpru mme ewuhɔ emi ami ŋwukde mbufo mfin emi.

² Ndien ama ekem ke usen emi mbufo edibede Jordan eduk ke isɔŋ emi Jehovah Abasi fo ɔnɔde fi, wuk ikpɔ itiat ke idem fo, nyuŋ top mmɔ ndom:

³ ndien wet kpukpru ikɔ mbet emi sin ke esit, ke afo ama ekebe, man afo oduk ke isɔŋ emi Jehovah Abasi fo ɔnɔde fi, kpa isɔŋ emi ɔfiɔrɔde mmɔŋ-eba ye aran-ɔkwɔk; kpa nte Jehovah mme usɔ ɔkɔdɔhɔde fi.

⁴ Ndien ama ekem, ke mbufo ema ekebe Jordan, mbufo eda mme itiat emi ami ndɔhɔde mbufo mfin emi ewuk ke obot Ebal, afo nyuŋ top mmɔ ndom.

⁵ Nyuŋ nam itie-uwa do nɔ Jehovah Abasi fo, itie-uwa itiat: kumenere ŋkpɔ ukwak udiɔŋ mmɔ.

⁶ Da mfuri itiat nam itie-uwa Jehovah Abasi fo: nyuŋ wa edifɔp uwa nɔ Jehovah Abasi fo ke esit:

⁷ nyuŋ wa uwa emem, nyuŋ dia ŋkpɔ do, nyuŋ dat esit ke iso Jehovah Abasi fo.

⁸ Ndien tim wet kpukpru ikɔ mbet emi kap ke itiat oro.

⁹ Ekem Moses ye mme oku, mme Levite, edɔhɔ ofuri Israel, ete, O Israel, dop, nyuŋ kop; mfin emi afo amakabare edi ikɔt Jehovah Abasi fo.

¹⁰ Kop ndien uyo Jehovah Abasi fo, nyuŋ nim mbet esie ye mme ewuhɔ esie emi ami ŋwukde fi mfin emi.

¹¹ Ndien Moses eteme kpukpru owo ke usen oro, ete,

¹² Mme mmɔ emi edida ke obot Gerizim, ndidiɔŋ kpukpru owo, ke mbufo ema ekebe Jordan; Simeon, ye Levi, ye Judah, ye Issachar, ye Joseph, ye Benjamin:

¹³ ndien mme mmɔ emi edinyuŋ eda ke obot Ebal, ndisuŋi; Rueben, ye Gad, ye Asher, ye Zebulun, ye Dan, ye Naphtali.

¹⁴ Ndien yak mme Levite ebɔrɔ enyuŋ edɔhɔ kpukpru mbon Israel ke ɔkpɔsɔŋ uyo ete,

¹⁵ Ɔdɔdiɔk ɔnɔ owo eke anamde edisɔi mme editara mbiet, emi Jehovah esede ke mbubiam, utom ubɔk anam-usɔ, ndien emen enye onim ke ndibe ebiet. Ndien yak kpukpru owo ebɔrɔ ete, Amen.

¹⁶ Ɔdɔdiɔk ɔnɔ owo eke esinde ete esie ye eka esie ke ndek. Ndien yak kpukpru owo edɔhɔ ete, Amen.

¹⁷ Ɔdɔdiɔk ɔnɔ owo eke eseherede adaŋa mbɔhiduŋ esie. Ndien yak kpukpru owo edɔhɔ ete, Amen.

¹⁸ Ɔdɔdiɔk ɔnɔ owo eke anamde nnan awaha ɔkpɔŋ usuŋ. Ndien yak kpukpru owo edɔhɔ ete, Amen.

¹⁹ Ɔdɔdiɔk ɔnɔ owo eke oyutde ikpe esen owo, ye eyen-akpa, ye ebe-akpa. Ndien yak kpukpru owo edɔhɔ ete, Amen.

²⁰ Ɔdɔdiɔk ɔnɔ owo eke okotde ŋwan ete esie: koro enye ɔfuhɔrede ufuhɔ-ŋkpɔ ete esie. Ndien yak kpukpru owo edɔhɔ ete, Amen.

²¹ Ɔdɔdiɔk ɔnɔ owo eke ɔfiɔkde unam ekededi. Ndien yak kpukpru owo edɔdɔ ete, Amen.

²² Ɔdɔdiɔk ɔnɔ owo eke ɔfiɔkde eyen-ete esie aŋwan, mme eyen-eka esie aŋwan. Ndien yak kpukpru owo edɔhɔ ete, Amen.

²³ Ɔdɔdiɔk ɔnɔ owo eke ɔfiɔkde eka ŋwan esie. Ndien yak kpukpru owo edɔhɔ ete, Amen.

²⁴ Ɔdɔdiɔk ɔnɔ owo eke ɔtɔde mbɔhiduŋ esie ke ndibe. Ndien yak kpukpru owo edɔhɔ ete, Amen.

²⁵ Ɔdɔdiɔk ɔnɔ owo eke ɔbɔde okuk aka okowot owo eke miduehe isop. Ndien yak kpukpru owo edɔhɔ ete, Amen.

²⁶ Ɔdɔdiɔk ɔnɔ owo eke minimke kpukpru ikɔ mbet emi, inyuŋ inam mmɔ. Ndien yak kpukpru owo edɔhɔ ete, Amen.