DEUTERONOMY 23 - Edisana ñwed Abasi Ibom

Mme Mmɔ Emi Esiode Efep ke Efe Esop Ikɔt Abasi

¹ ANUAHA nsen, ye osibe ekpeta, okuduk ke esop Jehovah.

² Eyen akpara okuduk ke esop Jehovah; baba ke idem ɔyɔhɔ emana esie duop, enye okuduk ke esop Jehovah.

³ Eyen Ammon ye eyen Moab ekuduk ke esop Jehovah, baba ke idem ɔyɔhɔ emana mmɔ duop, ekuduk ke esop Jehovah ke nsinsi:

⁴ koro mmɔ mikedaha uyo ye mmɔŋ isobo ye mbufo ke usuŋ, ke ini mbufo etode ke Egypt ewɔŋɔ; koro mmɔ ekenyuŋ edade okuk enɔ Balaam eyen Beor emi otode ke Pethor ke Mesopotamia, ebaŋa fi, ete enye edisuŋi fi.

⁵ Edi Jehovah Abasi fo ikonyimeke ndikop nnɔ Balaam; edi Jehovah Abasi fo ama ɔkpuhɔre isuŋi esin ke eridiɔŋ ɔnɔ fi: koro Jehovah Abasi fo amade fi.

⁶ Kuyom emem mmɔ, ye se ifɔnde ye mmɔ, ofuri ini fo tutu amama.

⁷ Kusua eyen Edom: koro enye edide eyen-usɔ; kusua eyen Egypt: koro afo ekededi esen ke isɔŋ mmɔ.

⁸ Nditɔ eke emanade enɔ mmɔ eyekeme ndiduk ke esop Jehovah ke ɔyɔhɔ emana mmɔ ita.

⁹ Ke adaŋemi mbon ekɔŋ ewɔŋɔde eka ekɔŋ ye mme asua fo, kpeme idem fo ke kpukpru idiɔk.

¹⁰ Ke adaŋemi owo eke edehede abaŋa ŋkpɔ eke otibede ke okoneyo odude ke otu fo, yak enye ɔwɔrɔ aka edem nna, okuduk ke esit nna:

¹¹ ndien ke utin osopde, yak enye oduk ke esit nna.

¹² Ndien ŋko nyene ɔtɔ ke edem nna, nyuŋ wɔrɔ ke ikɔt do:

¹³ nyuŋ kama udɔk ke otu ŋkpɔ-ekɔŋ fo; ndien ama ekem, ke afo ɔsɔrɔde ke edem nna, da enye tibi isɔŋ, ndien kabare fuk ndek fo.

¹⁴ Koro Jehovah Abasi fo asaŋade ke esit fo, ete inyaŋa fi, inyuŋ ida mme asua fo inim fi ke iso: ndien nna fo edi edisana: mbak enye edikut mbubiam ke otu fo, ndien akabare ɔkpɔŋ fi.

¹⁵ Kuda ofin eke efehede itɔk ɔkpɔŋ andinyene etiene fi, uyak unɔ andinyene:

¹⁶ yak enye oduŋ ye afo ke otu fo, ke ɔtɔ eke enye edimekde ke obio mbufo kiet, kpa nte enye amade: kufik enye.

¹⁷ Baba akpara kiet okudu ke otu nditɔ-iban Israel, baba ekpe akpara kiet okunyuŋ odu ke otu nditɔ-iren Israel.

¹⁸ Kuda ŋkpɔ akpara, ye ekɔm-urua ebua, uduk ke ufɔk Jehovah Abasi fo, ke eke akaŋa ekededi: koro Jehovah Abasi fo esede mbiba emi ke ŋkpɔ mbubiam.

¹⁹ Kubuɔt eyen-usɔ ubɔ udori; edide udori ke okuk, onyuŋ edide udori ke udia, mme udori ke ŋkpɔ ekededi eke ebuɔtde edia udori:

²⁰ buɔt esen owo dia udori; edi kubuɔt eyen-usɔ ubɔ udori: kpaŋ Jehovah Abasi fo ɔkpɔdiɔŋ fi ke kpukpru utom ubɔk fo, ke isɔŋ emi afo akade do ndida enye nnyene.

²¹ Ke adaŋemi afo edikaŋade akaŋa ɔnɔ Jehovah Abasi fo, kubigi ndisio enye: koro Jehovah Abasi fo miditreke ndiyom enye ke ubɔk fo; ndien afo, eyedue isop.

²² Edi edieke afo etrede ndikaŋa, ududuehe isop.

²³ Kpeme se itode fi ke inua: nyuŋ nam kpa nte afo akaŋade ɔnɔ Jehovah Abasi fo, kpa ŋkpɔ ima esit, eke afo asiakde ke mkpɔk-inua fo.

²⁴ Ke adaŋemi afo edidukde ke iŋwaŋ vine mbɔhiduŋ fo, dia grape nte afo amade yuhɔ; edi kuda usin ke akpan fo.

²⁵ Ke adaŋemi afo akade ke ebiet ibokpot mbɔhiduŋ fo, kibi ibuot ke ubɔk fo, edi kusin ukpi-ŋkpɔ ke ibokpot mbɔhiduŋ fo.