DEUTERONOMY 21 - Edisana ñwed Abasi Ibom

Ikpe Uwot Owo Emi Owo Midiɔŋɔke Andiwot

¹ KE adaŋemi edikutde okpo owo eke akpade afai ke isɔŋ emi Jehovah Abasi fo ɔnɔde fi, ete ada enye enyene, nte enye anade ke ikɔt, ndien mifiɔkke owo emi okowotde enye:

² ndien yak mbiowo fo ye mme ebierikpe fo ewɔrɔ, eka ekedomo esim obio eke ekande owo oro akpade afai ekuk.

³ Ndien ama ekem, obio eke ekperede owo oro akpade afai, kpa mbiowo obio oro eyeda abak unam enaŋ, eke owo mikadaha enye inam ŋkpɔ, eke mika-inyuŋ idudike ke ɔkpɔnɔ;

⁴ ndien yak mbiowo oro eda uman enaŋ oro esuhɔre ke ebedeŋ eke enyenede idim, eke owo mifuŋke isɔŋ, minyuŋ itɔhɔ ŋkpɔ, ndien eyɔk enaŋ oro itɔŋ ke idim:

⁵ ndien yak mme oku, nditɔ Levi, esaŋa ekpere: koro Jehovah Abasi fo ama emek mmɔ ndinam ŋkpɔ esie, nnyuŋ nda enyiŋ Jehovah ndiɔŋ owo; ndien kpukpru ikpe ye kpukpru ufene eyenyuŋ esaŋa ke uyo mmɔ:

⁶ ndien yak kpukpru mbiowo obio eke ekperede owo oro akpade afai, eyet ubɔk mmɔ ke enyɔŋ enaŋ emi eyɔkde enye itɔŋ ke idim oro:

⁷ ndien yak mmɔ ebɔrɔ, ete, Idige ubɔk nnyin ɔkɔduɔk iyip emi, enyin nnyin ikonyuŋ ikwe:

⁸ Dahado nɔ ikɔt fo Israel, emi afo, O Jehovah akafakde; kunyuŋ uda iyip owo emi miduehe isop udori ikɔt fo Israel. Ndien eyedahado ke iyip oro enɔ mmɔ.

⁹ Ntem ke afo edisio iyip owo eke miduehe isop ke otu fo efep, ke ini afo anamde se inende ke iso Jehovah.

¹⁰ Ke adaŋemi afo ediwɔrɔde aka ekɔŋ ye mme asua fo, Jehovah Abasi fo onyuŋ adade mmɔ esin fi ke ubɔk afo onyuŋ omum mbuot-ekɔŋ;

¹¹ onyuŋ okut ediye ŋwan kiet ke otu mbuot-ekɔŋ oro, onyuŋ ama enye onyuŋ ada enye ɔdɔ:

¹² ndien da enye duk ke ufɔk fo: yak enye onyuŋ okporo idet esie, onyuŋ afat mbara esie;

¹³ ndien yak enye osio ɔfɔŋ-idem eke enye esinede ke ini ekemumde enye, efep ke idem esie, onyuŋ etie ke ufɔk fo, onyuŋ atua ete esie ye eka esie ke ɔfiɔŋ kiet: ndien tiene enye, nyuŋ di ebe esie enye onyuŋ edi ŋwan fo.

¹⁴ Ndien ama ekem, edieke enye minemke fi esit, yak enye aka ke ebiet eke enye amade; edi kunyam enye ubɔ okuk, kunyuŋ unyik enye: koro afo asabarede enye.

¹⁵ Ke owo edinyene iban iba, kiet ŋwan ima, kiet eken ŋko eke usua, ndien mmɔ ema eman nditɔ enɔ enye, ŋwan ima, ye ŋwan usua; ndien akpan edi eyen aŋwan usua:

¹⁶ ndien ama ekem, ke usen eke enye edidemede inyene esie ɔnɔ nditɔ esie, enye okunim eyen aŋwan ima ke itie akpan ɔkpɔŋ eyen aŋwan usua eke edide ata akpan:

¹⁷ edi yak enye ɔdiɔŋɔ eyen aŋwan usua ke akpan, ke erinɔ enye udeme kpukpru inyene esie mbiba: koro enye edide akpa odude esie; itie akpan enyene enye.

¹⁸ Ke ini owo edinyenede eyen itun ye eke usɔŋ-enyin, eke mikopke ete esie ye eka esie uyo, ndien mmɔ ema enyuŋ enɔ enye ufen, edi enye mikopke uyo mmɔ:

¹⁹ ndien yak ete esie ye eka esie emum enye ɔwɔrɔ, eda esɔk mbiowo obio mmɔ, ke enyin-usuŋ ebiet mmɔ;

²⁰ ndien yak mmɔ edɔhɔ ye mbiowo obio mmɔ, ete, Eyen nnyin emi edi itun, onyuŋ ɔsɔŋɔ enyin, ikopke uyo nnyin; enye edi owo ndion ye owo mmin.

²¹ Ndien yak kpukpru mbio-obio mmɔ etɔŋɔ enye ke itiat ewot. Ntem ke afo edisio idiɔk ke otu fo efep; ndien ofuri Israel eyekop, enyuŋ edikhe.

²² Ke adaŋemi owo ediduede isop mkpa, ndien mmɔ eka ndiwot enye, afo ama onyuŋ eyiri enye ke eto:

²³ kuyak okpo esie adaŋ ke eto ofuri okoneyo, kunyuŋ utre ndibuk enye kpa usen oro: koro se eyiride edi ŋkpɔ isuŋi Abasi; kubiat ndien isɔŋ fo emi Jehovah Abasi fo ɔnɔde fi ke udeme.