DEUTERONOMY 16 - Edisana ñwed Abasi Ibom

Mme Usɔrɔ Ita Emi Nditɔ Israel Enyenede Ndinam

¹ NIM ɔfiɔŋ Abib, nyuŋ nim passover nɔ Jehovah Abasi fo: koro ke ɔfiɔŋ Abib ke Jehovah Abasi fo okosio fi ke Egypt ke okoneyo.

² Wot ndien passover oro nɔ Jehovah Abasi fo, edide erɔŋ, onyuŋ edide enaŋ, ke ebiet emi Jehovah edimekde ndinim enyiŋ esie do.

³ Kuta uyo eke leaven esinede udian ye enye; ke ofuri usen itiaba da uyo eke leaven miduhe, kpa uyo ukut, ta ye enye: koro afo ekefehede itɔk ke isɔŋ Egypt ɔwɔrɔ: man afo eti usen oro afo okotode ke isɔŋ Egypt, ke kpukpru usen uwem fo.

⁴ Ndien kuyak ekut baba uyo leaven ye afo ke ofuri mme adaŋa fo ke ofuri usen itiaba; ndien kuyak baba unam eke afo ediwotde ke mbubreyo ke akpa usen, ana adaŋ esiere usen.

⁵ Kuwot passover ke baba obio fo kiet emi Jehovah Abasi fo ɔnɔde fi:

⁶ ibɔhɔke ke ebiet emi Jehovah Abasi fo edimekde ndinim enyiŋ esiemɔ, do ke afo ediwot passover oro ke mbubreyo, ke eyo okutde, kpa ke ekem ini emi afo okotode ke Egypt.

⁷ Nyuŋ tem enye ta ke ebiet emi Jehovah Abasi fo edimeke: ndien, eyo ama esiere, fiak nyɔŋ ke tent fo.

⁸ Ke ofuri usen itiokiet ke afo edita uyo eke leaven miduhe: ndien ɔyɔhɔ usen itiaba edi usɔrɔ Jehovah Abasi fo: kunam utom ke esit.

⁹ Bat urua itiaba nɔ idem fo: tɔŋɔ ndibat urua itiaba oro ke ini eke afo ɔtɔŋɔde ndisin ukpi-ŋkpɔ ke ibokpot.

¹⁰ Ndien nim usɔrɔ mme urua nɔ Jehovah Abasi fo, ke utomo enɔ ubɔk fo eke afo ɔnɔde ke ima esit, kpa nte Jehovah Abasi fo ɔdiɔŋde fi:

¹¹ ndien dat esit ke iso Jehovah Abasi fo, afo, ye eyen eren fo, ye eyen fo aŋwan, ye ofin eren fo, ye ofin aŋwaŋ fo, ye Levite eke odude ke obio fo, ye esen owo, ye eyen-akpa, ye ebe-akpa eke edude ke otu fo, ke ebiet emi Jehovah Abasi edimekde ndinim enyiŋ esiemɔ do.

¹² Nyuŋ ti nte afo ekedide ofin ke Egypt: kpeme ndien, nyuŋ nim mme ewuhɔ emi.

¹³ Nim usɔrɔ mme ataya ke ofuri usen itiaba, ke adaŋemi afo ama akataŋ kpukpru ibokpot fo ye wine fo obok ɔtɔ kiet:

¹⁴ ndien dat esit ke usɔrɔ fo, afo, ye eyen eren fo, ye eyen fo aŋwan, ye ofin eren fo, ye ofin aŋwan fo, ye Levite ye esen owo, ye eyen-akpa, ye ebe-akpa, eke edude ke obio fo.

¹⁵ Ke usen itiaba ke afo edinim usɔrɔ ɔnɔ Jehovah Abasi fo ke ebiet emi Jehovah edimekde: koro Jehovah Abasi fo eyediɔŋ fi ke kpukpru mbuŋwum-ŋkpɔ fo, ye ke kpukpru utom ubɔk fo, kutre ndien ndidat esit.

¹⁶ Yak kpukpru iren-owo fo ewut Jehovah idem mmɔ utim ikata ke isua ke ebiet emi enye edimekde; ke usɔrɔ uyo eke leaven miduhe, ye ke usɔrɔ mme urua, ye ke usɔrɔ mme ataya: ndien yak owo okudi ke iso Jehovah ubɔk-ubɔk:

¹⁷ edi kpukpru owo edi ye enɔ ke ubɔk, ekem ye ufɔn eke Jehovah Abasi fo ɔfɔnde fi.

¹⁸ Nyuŋ nim mme ebierikpe ye mme andidaha ke idem fo ke kpukpru obio fo eke Jehovah Abasi fo ɔnɔde fi ke ofuri mme esien fo: ndien yak mmɔ ekpe edinen ikpe enɔ kpukpru owo.

¹⁹ Kuyut ikpe; kuteŋe owo enyin, kunyuŋ ubɔ enɔ: koro enɔ editibide mme enyene ibuot owo enyin, onyuŋ akwaŋde ikɔ owo eke enende.

²⁰ Tim tiene se inende nen, man afo odu uwem, onyuŋ ada isɔŋ emi Jehovah Abasi fo ɔnɔde fi enyene.

²¹ Kuda eto ekededi uwuk eto-mkpe ke ŋkaŋ itie-uwa Jehovah Abasi fo, eke afo edinamde ɔnɔ idem fo.

²² Kunyuŋ uwuk adaha unɔ idem fo: emi Jehovah Abasi fo asuade.