DEUTERONOMY 13 - Edisana ñwed Abasi Ibom

Mme prophet Abiaŋa

¹ KE adaŋemi prophet, mme adaba ndap, edidahade ida ke otu fo, inyuŋ iwut fi idiɔŋɔ mme utibe ŋkpɔ,

² ndien idiɔŋɔ oro, mme utibe ŋkpɔ ama osu, nte enye ɔkɔdɔhɔde fi, ete, Eyak nnyin ika iketiene abasi efen, eke afo mukɔfiɔkke, inyuŋ inam ido mmɔ;

³ kukop mme ikɔ prophet oro, mme eke adaba ndap oro: koro Jehovah Abasi mbufo ododomo mbufo, ete ifiɔk mme mbufo emema Jehovah Abasi mbufo ke ofuri esit mbufo, ye ke ofuri ukpɔŋ mbufo.

⁴ Mbufo etiene Jehovah Abasi mbufo, enyuŋ ebak enye, enyuŋ enim mbet esie, enyuŋ ekop uyo esie, enyuŋ enam ŋkpɔ esie, enyuŋ eyire ye enye.

⁵ Ndien prophet oro, mme adaba ndap oro enyene ndikpa: koro enye ɔdɔhɔde, ete mbufo ekabare ekpɔŋ Jehovah Abasi mbufo emi okosiode mbufo ke isɔŋ Egypt, okonyuŋ afakde fi osio ke ufɔk ufin, ete inuk fi ifep ke usuŋ emi Jehovah Abasi fo etemede fi ete asaŋa ke esit. Ntem ke afo edinam idiɔk-ŋkpɔ oro okure ke otu fo.

⁶ Ke adaŋemi eyen-uka, mme eyen-eren fo, mme eyen fo aŋwan, mme ŋwan ikpanesit fo, mme ufan fo emi etiede nte ukpɔŋ fo, edinukde fi ke ndibe-ndibe, ete, Yak nnyin ika ikanam ido mme abasi efen, eke afo, ye mme usɔ mikɔfiɔkke;

⁷ ke otu mme abasi mme idut emi ekande mbufo ekuk, edide mme mmɔ emi ekperede fi, mme onyuŋ edide mmɔ emi eyomde fi usuŋ, ɔtɔŋɔde ke utit isɔŋ kiet, tutu osim utit isɔŋ eken:

⁸ kunyime unɔ enye, kunyuŋ ukop uyo esie; enyin fo okunyuŋ atua enye: edi kutre enye ndiwot;

⁹ yak edi ubɔk fo ebem iso odoro enye, onyuŋ owot enye, ndien ubɔk kpukpru owo editiene.

¹⁰ Nyuŋ tɔŋɔ enye ke itiat wot: koro enye okoyomde ndinuk fi mfep ŋkpɔŋ Jehovah Abasi fo, emi okosiode fi ke isɔŋ Egypt, ye ke ufɔk ufin efep.

¹¹ Ndien ofuri Israel eyekop, enyuŋ edikhe, ndien mmɔ idinamke aba idiɔk ido emi ke otu mbufo.

¹² Ke adaŋemi afo edikopde ke obio fo kiet, emi Jehovah Abasi fo ɔnɔde fi ete oduŋ ke esit, ete,

¹³ Ndusuk nditɔ Belial ema ewɔŋɔ ke otu mbufo, ema enyuŋ enam mbio-obio mmɔ ewaha, ete, Eyak nnyin ika ikanam ŋkpɔ mme abasi efen, eke mbufo mikɔfiɔkke:

¹⁴ ndien tim yom, nyuŋ duŋɔ, nyuŋ tim bup; ndien sese, ama edi akpanikɔ, ama ekem ke uyo emi, ema enam mbubiam emi ke otu mbufo;

¹⁵ kutre ndiwot nditɔ obio oro ke iso ofut, da iso ofut sobo enye tak-tak, ye kpukpru se idude ke esit, ye ufene esie.

¹⁶ Ndien bon kpukpru mbume esie ke ufɔt aŋwa esie, nyuŋ fɔp obio ye kpukpru mbume esie ke ikaŋ, tutu okure tak, nɔ Jehovah Abasi fo: ndien obio eyedi mbot-mbot ke nsinsi; yak owo okubɔp aba enye.

¹⁷ Ndien baba ofuri ŋkpɔ nsobo oro kiet okudiana fi ke ubɔk: man Jehovah akpadahado ke ikaŋ iyaresit esie, onyuŋ atua fi mbɔm, onyuŋ okop fi uduk, ndien anam fi ɔtɔt, kpa nte enye ɔkɔŋwɔŋɔde ɔnɔ mme usɔ:

¹⁸ ke ini afo okopde uyo Jehovah Abasi fo, onyuŋ onimde kpukpru mbet esie emi ami ntemede fi mfin emi, ke anam se inende ke enyin Jehovah Abasi fo.