DEUTERONOMY 11 - Edisana ñwed Abasi Ibom

Utip Emi Odude ke Owo Ndikop Item

¹ MA ndien Jehovah Abasi fo, nyuŋ tiŋ enyin ke item esie ye mme ewuhɔ esie, ye mme item esie, ye mbet esie, kpukpru usen. Mbufo efiɔk ndien mfin emi:

² koro mendɔhɔke nditɔ mbufo emi mikɔfiɔkke, emi mikonyuŋ ikwe eritunɔ emi Jehovah Abasi mbufo ɔkɔtunɔde, ye ubom esie, ye ɔkpɔsɔŋ ubɔk esie,

³ ye edimenere ubɔk esie, ye mme idiɔŋɔ esie, ye se enye akanamde Pharaoh edidem Egypt, ye ofuri isɔŋ esie, ke ufɔt Egypt;

⁴ ye se enye akanamde mbon ekɔŋ Egypt, ye mme horse mmɔ, ye mme chariot mmɔ; koro enye akanamde mmɔŋ Ididuot Inyanŋ ɔtɔ ofuk mmɔ, nte mmɔ ebinede mbufo, Jehovah onyuŋ osobo mmɔ tutu osim mfin emi;

⁵ ye se enye akanamde mbufo ke wilderness, tutu mbufo edisim ke ebiet emi;

⁶ ye se enye akanamde Dathan ye Abiram, nditɔ Eliab, eyen Reuben: emi isɔŋ akaŋwaŋade inua esie emen, ye ufɔk mmɔ, ye tent mmɔ, ye kpukpru se mmɔ enyenede, ke ufɔt ofuri Israel:

⁷ koro enyin mbufo ema ekut kpukpru ikpɔ ŋkpɔ emi Jehovah akanamde.

⁸ Mbufo enim ndien kpukpru mme ewuhɔ emi ami ŋwukde mbufo mfin emi, man mbufo esɔŋɔ, enyuŋ eduk ekeda isɔŋ emi mbufo eyomde ndibe ŋkada enye nnyene;

⁹ man mme usen mbufo enyuŋ ebigi ke isɔŋ emi Jehovah ɔkɔŋwɔŋɔde ɔnɔ mme ete mbufo, ete inɔ mmɔ ye nditɔ mmɔ, kpa isɔŋ emi ɔfiɔrɔde mmɔŋ-eba ye aran-ɔkwɔk.

¹⁰ Koro isɔŋ emi afo akade do ndida enye nnyene, mibietke isɔŋ Egypt, emi afo okotode ke esit, emi afo ɔkɔtɔde mkpasip fo, onyuŋ adade ukot fo ɔnɔ enye mmɔŋ, nte ebresien:

¹¹ edi isɔŋ emi mbufo ebede eka do ndida enye nnyene, edi isɔŋ obot ye itihere, emi ɔŋwɔŋde mmɔŋ edim emi otode ke enyɔŋ:

¹² isɔŋ emi Jehovah Abasi fo akamade: Jehovah Abasi fo onyuŋ etiŋ enyin ke esit kpukpru ini, ɔtɔŋɔde ke eritɔŋɔ isua, tutu osim utit isua.

¹³ Ndien ama ekem, edieke mbufo edikopde kpukpru mbet mi, emi ami mbetde mbufo mfin emi, enyuŋ ema Jehovah Abasi mbufo, enyuŋ enam ŋkpɔ esie ke ofuri esit mbufo ye ke ofuri ukpɔŋ mbufo,

¹⁴ ndien nyenɔ edim isɔŋ mbufo ke ekem ini, akpa edim ye ekpere-edem, man afo obon ibokpot fo, ye obufa wine fo, ye aran fo.

¹⁵ Nyenyuŋ nnam mbiet otibe ke iŋwaŋ fo ɔnɔ ufene fo, ndien afo eyedia ŋkpɔ ɔyuhɔ.

¹⁶ Mbufo ekpeme idem, mbak esit edibiaŋa mbufo, mbufo edinyuŋ ekabare enam ido mme abasi eŋwen, enyuŋ enuhɔ enɔ mmɔ;

¹⁷ ndien Jehovah edifiop esit ye mbufo, enye onyuŋ omum ikpa-enyɔŋ, akpan edim okudi, onyuŋ akpan isɔŋ okuŋwum mfri esie; mbak edinyuŋ ewara ndisobo mbufo efep ke eti isɔŋ emi Jehovah ɔnɔde mbufo.

¹⁸ Mbufo eda ndien ikɔ emi esin ke esit mbufo, ye ke ukpɔŋ mbufo, enyuŋ etebe mmɔ edian ke ubɔk mbufo nte idiɔŋɔ, yak mmɔ enyuŋ ena mbufo ke ufɔt enyin ke ŋkpɔ ɔkpɔ-iso.

¹⁹ Mbufo enyuŋ eda mmɔ eteme nditɔ mbufo, enyuŋ edɔhɔ ebaŋa mmɔ ke ini afo etiede ke ufɔk fo, ye ke asaŋade ke usuŋ, ye ke anade ke isɔŋ, ye ke edemerede ke idap.

²⁰ Nyuŋ wet mmɔ ke obubɔk enyin-usuŋ ufɔk fo, ye ke itim fo:

²¹ man usen mbufo, ye usen nditɔ mbufo ekpebigi ke isɔŋ emi Jehovah ɔkɔŋwɔŋɔde ɔnɔ mme ete mbufo, ete iyenɔ mmɔ, adaŋa ini nte enyɔŋ ofukde isɔŋ.

²² Koro edieke mbufo edikpemede kpukpru mme ewuhɔ emi ami ŋwukde mbufo, enyuŋ enim mmɔ, enyuŋ ema Jehovah Abasi mbufo, enyuŋ esaŋa ke kpukpru usuŋ esie, enyuŋ eyire ye enye;

²³ ndien Jehovah eyebin kpukpru mme idut emi ke iso mbufo efep, mbufo eyenyuŋ eda mme idut emi ekponide enyuŋ esɔŋɔde ekan mbufo, enyene.

²⁴ Kpukpru ebiet eke ikpat ukot mbufo edidigide ke esit, eyenyene mbufo: adaŋa mbufo eyetɔŋɔ ke wilderness, ye ke Lebanon, ye ke akpa, idem akpa Euphrates, tutu akatuak ke inyaŋ ke edem usop-utin.

²⁵ Baba ofuri owo kiet idikemeke ndida ke iso mbufo: Jehovah Abasi mbufo eyenam kpukpru mme idut emi mbufo edisaŋade ke esit, ebak mbufo, enyuŋ edikhe mbufo, kpa nte enye ɔkɔdɔhɔde mbufo.

²⁶ Sese mfin emi mmada ufɔn ye isuŋi nnim mbufo ke iso;

²⁷ ufɔn, edieke mbufo edikopde kpukpru mme ewuhɔ Jehovah Abasi mbufo emi ami ŋwukde mbufo mfin emi:

²⁸ ye isuŋi, edieke mbufo midikopde ewuhɔ Jehovah Abasi mbufo, edi ewaha ekpɔŋ usuŋ emi ami ntemede mbufo mfin emi, enyuŋ etiene mme abasi efen, eke mbufo mikɔfiɔkke.

²⁹ Ndien ama ekem, adaŋemi Jehovah Abasi fo edidade fi oduk ke isɔŋ emi afo akade do ndida enye nnyene, dori ufɔn emi ke obot a Gerizim, nyuŋ dori isuŋi obot Ebal.

³⁰ Nte mmɔ iduhe ke edem Jordan oko, ke edem usop-utin, ke isɔŋ mme Canaanite emi eduŋde ke itihere Jordan, ikem ye Gilgal, ikpere mme terebinth Moreh?

³¹ Koro mbufo eyebe Jordan ekeduk, man eda isɔŋ emi Jehovah Abasi mbufo ɔnɔde mbufo, mbufo eyenyuŋ eda enye enyuŋ eduŋ ke esit.

³² Mbufo ekpeme ndien, ndinim kpukpru mme ewuhɔ, ye mme item emi ami nnimde ke iso mbufo mfin emi.